Read Batak Angkola PAMUNGKAAN 12 Bible Online

PAMUNGKAAN 12 - Batak Angkola bible

PAMUNGKAAN 12

¹Didok TUHAN ma tu si Abram, “Tadingkon ma tano hagodanganmu, angka sisolkotmu dohot bagas ni amangmu, jana kehe ma ho mandapotkon luat na giot patuduhononKu tu ho.

²Hulehen pe bahat di ho pomparanmu jana gabe bangso na godang ma halahi. Hupasupasu pe ho jana tarbonggal pe goarmu Hubaen, lopus gabe pasupasu ho di halak na bahat.

³PasupasuonKu ma sanga ise na mamasumasu ho. Tapi buraanKu ma sanga ise na mamurai ho. Jana hara ni ho, pasupasuonKu ma sude angka bangso na di tano on.”

⁴Di na marumur si Abram pitu pulu lima taon, bungkas ma ia sian Haran, hombar tu na nidok ni TUHAN tusia, rap kehe ma ia dohot si Lot.

⁵Dioban si Abram do si Sarai dadaborunia i, dohot si Lot anak ni angginia bope sude arta dohot angka hatoban na dapotnia di Haran jana kehe ma halahi tu tano Kanaan. Dung lalu halahi di Kanaan,

⁶dibolusi si Abram ma luat i lopus lalu ia tu tombak More inganan na badia na di Sikem. (Di hatiha i laing didapot ia dope disi maringanan halak Kanaan.)

⁷Dipatidahon TUHAN ma diriNa tu si Abram jana didok ma, “Luat on ma da na giot lehenonKu di pomparanmu.” Jadi dipajongjong ia ma sada langgatan di inganan i di TUHAN na patidahon diriNa tusia.

⁸Dung salpu i pinda ma ia tu Selatan tu luat na mardolok-dolok di Habincaran ni Betel. Jana dipajongjong ia ma disi undung-undungnia di holang-holang ni Betel di Hasundutan dohot Ai di Habincaran. Laing dipajongjong ia muse do disi sada langgatan parsombaan tu TUHAN, laing dipio ia ma goar ni TUHAN disi.

⁹Dung i marpinda-pinda ma ia sian inganan na sada tu inganan na asing di Selatan ni tano Kanaan i.

¹⁰Tapi masa do haleon potir di tano Kanaan, jana sun ma hancitna pambaen ni bala i, gabe kehe ma si Abram mur dumao tu Selatan lalu tu tano Mesir, anso disi noma ia jolo maringanan sanga na sadia honok.

¹¹Di na laho manyalpui batas ia laho masuk tu Luat Mesir i, didok ia ma tu si Sarai dadaborunia i, “Na jeges do da rupamu.

¹²Jadi muda diida halak Mesir i ho, diboto roha ni halahi do na dadaborungku ho; jadi bunuon ni halahi ma au tapi anggo ho padiaron ni halahi do mangolu.

¹³Jadi hara ni i dokkon ma tu halahi, ibotongku do ho anso hara ni ho gabe paloason ni halahi au mangolu jana denggan baenon ni halahi tu au.”

¹⁴Jana tutu ma antong, dung disalpui si Abram batas, masuk ma ia tu Mesir; diida halak Mesir i ma na tutu do hape na jeges sajo tompa ni si Sarai.

¹⁵Adong ma piga-piga halak pagawe ni bagas godang na midaan ia jana dipaboa halahi ma tu raja sanga songon dia hajegeson ni dadaboru i; jadi gabe dioban ma ia tu bagas godang ni raja i.

¹⁶Hara ni si Sarai, gabe denggan ma pambaenan ni raja i tu si Abram, jana dilehen ma disia angka hatoban, biri-biri dohot hambeng, lombu, halode dohot unto.

¹⁷Tapi patunda ni na nibuat ni raja i si Sarai, diparo TUHAN ma angka nyae na jorbut tu raja i dohot tu halak na adong di bagas godang i.

¹⁸Jadi dipiohon raja i ma si Abram jana didok ma tusia, “Na mambaen bia dehe ho tu au? Biasi nada dipaboa ho na dongan saripemu ia?

¹⁹Biasi didokkon ho ibotomu ia jana dipadiar ho hubuat ia gabe dadaborungku? Na ma indon dadaborumon; jagit ma ia jana kehe ma hamu!”

²⁰Diparentahon raja i ma tu angka pagawena i anso dipaorot halahi si Abram sian luat i rap dohot dadaborunia bope sude sinadongannia.