Read Batak Angkola PAMUNGKAAN 19 Bible Online

PAMUNGKAAN 19 - Batak Angkola bible

PAMUNGKAAN 19

¹Di na lalu surusuruan sidua halak na marsuo dohot si Abraham sinangkinan i di Sodom borngin i, topet ma hatiha juguk si Lot di horbangan ni kota i. Disi diida ia halahi manigor jongjong ma ia mangalo-alo. Manungkap ma ia di jolo ni halahi,

²jana didok ia ma, “Loas hamu ma au mangoloi hamu, tuan. Tu bagasta ma hamu masuk. Adong do parbasuan ni pat di bagasta dohot parbornginan. Ancogot tarbaen hamu do sigop ngot lalu paudutkon pardalananmunu.” Tapi dialusi halahi ma, “Tarimakasi ma da, dison pe hami marborngin di alaman ni kota on.”

³Sai disosoi si Lot ma halahi, ujungna kehe ma halahi rap dohot ia tu bagasnia. Disuru si Lot ma angka pangoloinia manutungi roti intap ni na tuk jana diparade ia sipanganon na tabo di angka tamu i. Dung singkop sude mangan ma halahi.

⁴Andorang so modom dope angka tamu i, dihaliangi angka halaklahi na di Sodom i ma bagas i. Sude halaklahi na sakota i, na poso dohot na matobang ma disi sude.

⁵Pio-pio ma halahi tu si Lot jana disapai halahi ma, “Ma di dia halak na ro i na giot marborngin di bagasmon? Pasahat ma da tu hami anso hami pardadaboru halahi.”

⁶Ruar ma si Lot sian bagasnia i, dung ditutup ia pintu i,

⁷didok ia ma tu halak Sodom i, “Tangkas ma hupangido tu hamu ale angka dongan, ulang ma da baen hamu pangalaho na jat songon i!

⁸Tangihon hamu ma jolo, adong do dua halak borungku bujing-bujing. Padiar ma hupasahat borungki tu hamu. Padiar ma baen hamu sanga aha por ni rohamunu tu halahi. Tapi anggo tamungki ulang hahua hamu, tamu do da halahi di bagas jana angkon ondihononkon do halahi.”

⁹Tapi didok halak Sodom i ma tu si Lot, “Morot ho, halak na ro do da ho! Ise ma he ho lakna umbaen na pabotohononmu tu hami sanga aha na giot baenonnami? Kehe ma ho morot! Anggo inda, anso hami balbali ho humancit sian tu sidua halak i.” Jadi dionjar halahi ma si Lot tu pinggir jana diroro halahi ma laho manombom pintu i.

¹⁰Tapi disurduhon tamu sidua halak na di bagasan i ma tangan ni halahi jana ditarik halahi ma si Lot masuk tu bagas, ditutup halahi muse ma pintu i.

¹¹Dung i dipapitung halahi ma sude mata ni halak na di ruar ni bagas i lopus nada dapot angka jolma i be pintu i mangulahi.

¹²Didok tamu na dua i ma tu si Lot, “Betak adong dope koum sisolkotmu na asing dison — i ma anak, boru, hela angka koummu na maringanan di kota on — oban ma halahi ruar sian on,

¹³harana abiskononnami ma kota on. Madung ditangihon TUHAN angka tuhas-tuhas na dokdok maradopkon halak na dison, jana na diutusNia do hami laho mangabiskon kota Sodom on.”

¹⁴Jadi kehe ma si Lot mandapotkon dua halak doli-doli tunangan ni borunia i, jana didok ia ma, “Ompoti hamu ma ruar sian kota on, harana giot abiskonon ni TUHAN ma kota on.” Tapi diambang halahi na margonjak do si Lot.

¹⁵Di andostorang i disosoi surusuruan na dua i ma si Lot anso marhobas, “Ompoti bo,” ning halahi, “Kehe ma ho dohot ripemi dohot borumu na dua i sian on, anso ulang mate hamu muda diabiskon kota on.”

¹⁶Ganggu dope si Lot. Tapi ibo ma roha ni TUHAN mida ia; jadi gabe ditogu tamu na dua i ma si Lot dohot daborunia dohot borunia na dua i, dioban ma halahi tu ruar ni kota i.

¹⁷Dung i didok sahalak sian surusuruan i ma, “Marlojong ma hamu, palua hosamunu! Ulang manaili tu pudi jana ulang maradian di rura. Tu dolok-dolok ma lojongi hamu, anso ulang mate hamu!”

¹⁸Tapi dialusi si Lot ma, “Ulang antong tu dolok hami suru.

¹⁹Tutu do nian na sun do pangurupimu di au jana dipalua ho hosangku. Tapi songon i ma daona dolok i; kojaron ni hamamago i ma da iba, jana mate noma iba painte so lalu tusi.

²⁰Ligi pe da tu adu, adong disi kota na menek na so pola sadia dao. Loas ma au tusi kehe gabe malua ma au.”

²¹Dialusi surusuruan i ma, “Olo, huloas pe ho tusi! Nada pola dohot kota na menek i abiskononku.

²²Ompoti ma marlojong! Nada tarbaen au bagi aha anggo so lalu ho tusi.” Hara ni na nidok ni si Lot kota i menek, gabe Zoar ma goar ni kota i.

²³Bincar ma mataniari di na lalu si Lot tu kota i.

²⁴Tompu ma dipaijur TUHAN udan barerang na marapi tu Sodom dohot Gomora

²⁵jana disegohon ma angka kota i dohot sude rura, dohot sude halak na disi dohot sandok na tubu di tano i.

²⁶Tapi manaili ma dadaboru ni si Lot tu pudi jadi muba ma ia gabe batu sira.

²⁷Ancogotna i manyogot, marhobas ma si Abraham laho kehe tu inganan hajongjongannia di jolo ni TUHAN sadari dompak so i.

²⁸Manatap ma ia sabola Sodom dohot Gomora dohot tu rura i sude, jana diida ia ma timus marbual-bual sian tano i, songon timus ni pamurunan na godang.

²⁹Songon i ma di na niabiskon ni Debata angka kota na di rura na niinganan ni si Lot i, diingot Debata do si Abraham jana ditolong Ia do si Lot paluahon dirina.

³⁰Dibaen biarna si Lot maringanan di Zoar, gabe kehe ma ia tu dolok-dolok rap dohot borunia na dua i, disi ma halahi maringanan di bagasan sada liang.

³¹Didok borunia siangkaan i ma tu anggina, “Madung mur matobang amanta, jadi di luat on sudena nanggo adong halaklahi na gabe parbagasanta anso adong anakta.

³²Tole ma tapamabuk amanta anso tarbaen hita campur dohot ia anso adong anakta.”

³³Di borngin i dilehen halahi ma amang ni halahi minum anggur, jadi marcampur ma boruna siangkaan i dohot amangna i; hara ni santakna mabuk ma amangna i nanggo diboto ia pangalaho i.

³⁴Ancogotna i, didok boruna siangkaan i ma tu anggina, “Napotangin madung marcampur au dohot amanta; tapamabuk ma ia annon borngin mangulahi, anso modom ho annon rap dohot ia. Songon i noma dalanna baenonta anso adong anakta.”

³⁵Songon i ma, borngin i mabuk ma si Lot dibaen halahi jana marcampur ma borunia paduahon i dohot ia. Jana masantaktu do mabuk ni si Lot, nada diboto ia na masa i.

³⁶Jadi denggan ma pamatang ni boru ni si Lot na dua i hara ni amang ni halahi sandiri.

³⁷Sorang ma anak siangkaan ni halahi, dibaen ma goarna si Moab. I ma na gabe ompu ni halak Moab na saonnari.

³⁸Boruna paduahon i pe sorang ma anakna laing halaklahi muse dibaen ma goarna si Ben Ami. I ma na gabe ompu ni halak Amon na saonnari.