Read Batak Angkola PAMUNGKAAN 21 Bible Online

PAMUNGKAAN 21 - Batak Angkola bible

PAMUNGKAAN 21

¹Dipasupasu Debata ma si Sara, songon na nijanjihonNa i.

²Di hatiha na dung ditontuhon ni Debata hian tu si Abraham, dung matobang si Abraham, denggan ma pamatang ni si Sara, jana sorang ma sada anaknia.

³Dibaen si Abraham ma goarna si Ishak.

⁴Jana di na marumur salapan ari si Ishak, disunat si Abraham ma ia hombar tu parenta na nidok ni Debata.

⁵Marumur saratus taon ma si Abraham di parsorang ni si Ishak.

⁶Jana didok si Sara ma, “Ma martata[1] au dibaen Debata hara ni jop ni roha. Sanga ise na umbege pangalaho on, gabe martata ma rap dohot au.”

⁷Dung i laing didok ia dope, “Ise ma he mandok tu halaklahingku na salpu on, na giot pasusuhon anak si Sara? Hape angkon laing sorang dope anak sian au haru pe ma matobang situtu halaklahingku.”

⁸Simbur magodang ma dakdanak i, jana di ari pangantakna manyusu dipatupa si Abraham ma horja siriaon.

⁹Sanoli, marmayam-mayam ma si Ismael anak ni si Hagar boru Mesir i dohot si Ishak tubu ni si Sara i.

¹⁰Diida si Sara ma halahi, didok ia ma tu si Abraham, “Paorot ma da boru hatoban i dohot anakna i. Nada tola anak ni boru hatoban i dapotan bagian sian sinadonganmu na giot teanon ni si Ishak anakki.”

¹¹Marsak ma roha ni si Abraham pasari-sari pangalaho i, harana si Ismael pe laing anaknia do antong.

¹²Tapi didok Debata ma tu si Abraham, “Ulang pola ganggu rohamu salaho tu dakdanak i bope tu hatobanmu si Hagar i. Baen sajo ma songon na nidok ni si Sara i tu ho, harana sian si Ishak do jagitonmu pomparan na Hujanjihon i.

¹³Laing lehenonKu do hagabean tu anak ni si Hagar i, anso gabe sada bangso halahi. Harana ia pe laing anakmu do.”

¹⁴Manyogotna i dipasahat si Abraham ma tu si Hagar saotik sipanganon dohot aek di bagasan kantongan kulit anso adong bohal di dalan. Dipaompahon ia ma dakdanak i tu tanggurung ni si Hagar jana disuru ia ma kehe anakboru i. Jadi kehe ma si Hagar jana madangadang ma ia di padang parhorsihan Berseba.

¹⁵Dung abis aek na niobannia i, dipayakkon ia ma dakdanak i tu toru ni sada rompo-rompo,

¹⁶juguk muse ma ia hira-hira saratus meter sian inganan i. Didok ia ma di bagasan rohania, “Nada tarpaligi-ligi au anakki mate.” Tangis muse ma ia disi.

¹⁷Dibege Debata ma sora ni tangis ni si Ismael i jana ro ma sora ni surusuruan ni Debata sian langit mandok hata tu si Hagar, ninna ma, “Aha dehe na niarsakkonmu Hagar? Ulang ho mabiar, madung dibege Debata tangis ni anakmi.

¹⁸Dapotkon ma anakmi, abing jana apoi. Baenonku ma pomparannia gabe sada bangso na godang.”

¹⁹Dung i diungkap Debata ma mata ni si Hagar, gabe diida ia ma sada sumur. Jadi kehe ma ia laho mangisi kantongan kulit i dohot aek, dilehen ia ma anaknia i minum.

²⁰Didongani Debata do si Ismael. Mur magodang ma dakdanak i laing di padang parhorsihan Paran ma ia maringanan jana gabe parburu na utusan ma ia.

²¹Dipabagas inangnia ma ia dohot sada boru Mesir.

²²Di hatiha i ro ma Raja Abimelek dohot si Pikol panglima ni tentarania tu si Abraham, didok halahi ma, “Sai didongani Debata do ho di sude na nikarejohonmu.

²³Jadi sumpahon ma dison diadopan ni Debata paboa na so baenonmu na so tama tu au, songon i tu dakdanakku sanga pe tu pomparanku. Madung hubaen haburjuon tu ho, jadi hara ni i janjihon ma laing na burju muse baenonmu tu au dohot tu luat na huingani on.”

²⁴Jadi didok si Abraham ma, “Hujanjihon ma i.”

²⁵Tapi dung salpu i humolos ma si Abraham tu si Abimelek hara ni sada sumur na nirampas ni angka hatoban ni raja i.

²⁶Didok si Abimelek ma, “Nada huboto dope bagi aha taringot tusi, nada unjung dope dipaboa ho i tu au, jana on dope huboto taringot tusi.”

²⁷Jadi dilehen si Abraham ma biri-biri dohot lombu deba tu si Abimelek, jana dibaen halahi na dua ma parjanjian.

²⁸Disirang si Abraham ma pitu anak ni biri-biri sian hulanan ni pahan-pahanannia,

²⁹jana disapai si Abimelek ma tusia, “Biasi dibaen ho songon i?”

³⁰Dialusi si Abraham ma, “Jagit ma anak ni biri-biri na pitu on songon tanda ni na niokumu, au do na mangkuar sumur on.”

³¹Songon i ma umbaen digoari inganan i Berseba,[2] harana disi ma halahi na dua mambaen sumpa.

³²Dung dibaen halahi parjanjian i di Berseba, mulak ma si Abimelek dohot si Pikol tu luat ni halak Pilistin.

³³Jadi disuan si Abraham ma sada hayu tamariska jana disomba ia ma TUHAN Debata na manongtong i.

³⁴Dung i laing diingani si Abraham dope sanga na sadia honok nari di tano ni halak Pilistin i.