Read Batak Angkola PAMUNGKAAN 22 Bible Online

PAMUNGKAAN 22 - Batak Angkola bible

PAMUNGKAAN 22

¹Dung adong sanga sadia honok diuji Debata ma haburjuon ni roha ni si Abraham; dipio Debata ma si Abraham, “Jo Abraham!” ninna. Jadi dialusi si Abraham ma, “Dison do au TUHAN!” ning ia.

²Didok Debata ma, “Piohon ma si Ishak anakmu sisada-sada i, anak hasianmi jana kehe ma hamu tu tano Moria. Di adu di sada dolok na giot patuduhononKu tu ho, angkon pasahatonmu ma anakmi gabe haul na nitutung tu Au.”

³Manyogotna i dung torang ari, ditahai si Abraham ma soban baen tu haul situtungon i, dibobok ia ma i dibaen ia tu tanggurung ni halodenia. Dioban ia ma si Ishak dohot dua halak hatobannia, jadi kehe ma halahi mandapotkon inganan na nidok ni Debata i tu si Abraham.

⁴Di ari patoluhon tartatap si Abraham ma inganan i sian na dao.

⁵Jadi ning ia ma tu hatobannia na dua i, “Dison ma hamu na dua dohot halode on. Anggo au dohot anakkon kehe ma hami jolo tu adu laho manyomba TUHAN, mulak pe hami tuson mandapotkon hamu.”

⁶Dipaporsankon si Abraham ma soban i tu abara ni si Ishak, jana ia sandiri ma maroban piso dohot surpu panutung ni soban i. Di na udur i halahi mardalan,

⁷jadi disapai si Ishak ma, “Amang!” ning ia. Jana dialusi si Abraham, “Aha do amang?” Jadi disapai si Ishak ma, “Ma taoban api dohot soban, tapi dia do anak ni biri-biri na giot haul situtungon i?”

⁸Dialusi si Abraham ma, “Debata sandiri do pasingkopkon anak ni biri-biri i.” Jadi didatdati halahi ma na mardalan i.

⁹Di na lalu halahi tu inganan na nidok ni Debata tu si Abraham, dipajongjong ia ma sada langgatan jana diatak ia ma soban i di ginjang ni langgatan i. Bulus ditambat ia ma anaknia i jana dipapodom ia di langgatan i di ginjang ni soban i.

¹⁰Dung i dibuat ia pisonia laho manyambol anakna i.

¹¹Tapi pio-pio ma surusuruan ni TUHAN sian langit tusia, “Jo Abraham, Abraham!” ninna. Dialusi si Abraham ma, “Dison do au TUHAN.”

¹²“Ulang palalu tanganmu tu dakdanak i sanga dihahua ho ia,” ninna surusuruan i. “Saonnari madung huboto sangapmu dohot pangoloimu tu Debata, angke nada manjua ho pasahat anakmu sisada-sada i tu Debata.”

¹³Jadi mangaranap ma si Abraham humaliang jana diida ia ma sada biri-biri jantan na sangkot tandukna di ramba-ramba i. Dibuat si Abraham ma biri-biri i bulus dilehen ia ma i tu TUHAN songon somba-sombania gabe haul na nitutung panggonti ni anaknia i.

¹⁴Dibaen si Abraham ma goar ni inganan i, “TUHAN do paradehon”. Jana lopus saonnari laing didokkon halak do, “TUHAN do paradehon di dolokNia”.

¹⁵Pio-pio ma mangulahi surusuruan ni TUHAN sian langit tu si Abraham palalu tona ni Debata tu si Abraham,

¹⁶“Husumpahon mangasahon goarKu sandiri — paboa na angkon pasupasuonKu ma ho marlompit ganda. Dibaen madung dipatulus ho pangalaho on jana nada dijua ho laho pasahatkon anakmu na sasada i tu Au.

¹⁷Marjanji ma Au, paboa baenonKu ma pomparanmu sabahat ni bintang na di langit sanga sabahat ni horsik na di topi ni laut. Taluhonon ni angka pomparannia ma angka musu ni halahi.

¹⁸Pangidoan ni sude bangso na di tano on ma tu Au anso Hupasupasu halahi — hara ni na nioloanmu parentangKu.”

¹⁹Dung i mulak ma si Abraham mandapotkon hatobannia sidua halak i, torus ma halahi rap kehe tu Berseba, jana laing disi ma si Abraham maringanan.

²⁰Adong do angkang ni si Abraham na margoar si Nahor. Dung adong sadia honok tarbege ma tu si Abraham na dung adong tubu ni si Milka dadaboru ni si Nahor i salapan anak halaklahi, i ma:

²¹Si Us siangkaan, si Bus ma na nitadohonna, si Kemuel i ma muse na gabe amang ni si Aram.

²²Si Kesed, si Haso, si Pildas, si Jidlap dohot si Betuel.

²³Di pudi ni ari si Betuel on ma na gabe amang ni si Ribka.

²⁴Adong do rading ni si Nahor na margoar si Reuma jana tubu ni rading on ma si Tebah, si Gaham, si Tahas dohot si Maaka.