Read Batak Angkola PAMUNGKAAN 26 Bible Online

PAMUNGKAAN 26 - Batak Angkola bible

PAMUNGKAAN 26

¹Masa muse ma mangulahi haleon di luat i songon na masa di hatiha ni si Abraham. Mangadop ma si Ishak tu si Abimelek raja ni halak Pilistin i di Gerar mangidohon anso dipaloas ia maringanan disi.

²Dibaen ia songon i mardomu na dung dipataridahon TUHAN do diriNa tusia jana didok, “Ulang kehe ho tu Mesir, dison ma ho maringanan, laing songon na Hudokkon tu ho.

³Hudongani pe ho jana Hupasupasu. LehenonKu do di ho dohot di pomparanmu sude banua on. GohanKu do janji na dung Hupasahat tu si Abraham amangmi.

⁴LehenonKu do hagabean anso maranak marpahompu ho sabahat ni bintang na di langit jana lehenonKu do sude luat on tu halahi. Pangidohonon ni bangso na satano on ma sudena tu Au anso Hupasupasu halahi songon pamasumasungKu di pomparanmu.

⁵PasupasuonKu ma ho, hara ni na nioloan ni si Abraham Au jana ditiop ia togu uhum dohot haputusanKu.”

⁶Jadi di Gerar ma si Ishak maringanan.

⁷Jadi di na nisapaan ni angka halak na disi salaho tu si Ribka, didok si Ishak ma ibotonia do i jana nada dongan saripenia. Biar roha ni si Ishak betak sai bunuon ni halak na disi ia laho mambuat si Ribka na santak jogi i.

⁸Jadi dung adong sadia honok si Ishak maringanan disi, manatap-natap ma si Abimelek sanoli sian jandelania tu ruar. Jadi diida ia ma topet marsiumma-ummaan si Ishak dohot si Ribka.

⁹Jadi dipiohon si Abimelek ma si Ishak, didok ia ma, “Dongan saripemu do hape anak boru i! Biasi didokkon ho ia, ibotomu?” Dialusi si Ishak ma, “Ning rohangku, hona bunu do au muda hupaboa ia dongan sabagasku.”

¹⁰“Na mambaen bia dehe ho tu hami?” ning si Abimelek. “Adong do da sada halak sian rayatkon na tarbaen modom dohot dongan saripemi. Jadi ampot sai tarjadi na songon i, ho ma da na martanggung jawab di hasalaannami i,” ning si Abimelek.

¹¹Dung i dipaingot si Abimelek ma sude rayatnia songon on, “Sanga ise mambaen na jahat tu halak on dohot tu dongan sabagasnia, mate uhumon ma halakna i.”

¹²Disabur si Ishak ma same ni suan-suanan di luat i, jana di bagasan taon i dapot ia ma suhana saratus lompit sian na nisaburnia i, dibaen dipasupasu TUHAN do ia.

¹³Mur martamba-tamba do sinadongannia jana gabe halak na maradong situtu ma ia.

¹⁴Hara ni bahatna biri-birinia dohot lombu dohot angka naposonia, gabe mangiburu ma halak Pilistin i tusia.

¹⁵Jadi gabe dibuta halahi ma sude angka sumur na nihuar ni angka naposo ni si Abraham amangnia i dompak mangolu si Abraham.

¹⁶Dung i didok si Abimelek ma tu si Ishak, “Tadingkon ma da luatnami on. Ma gabe gumogo ho ulang hami.”

¹⁷Jadi kehe ma si Ishak marbandar di Rura Gerar. Disi ma ia maringanan sanga na sadia honok.

¹⁸Dihuar ia ma mangulahi angka sumur na dung dihuar hian di hatiha ni si Abraham, i ma angka na nibuta ni halak Pilistin dohot tano disi marujung ngolu ni si Abraham. Dibaen si Ishak ma goar ni angka sumur i laing songon na nibaen ni amangnia i.

¹⁹Dihuari angka naposo ni si Ishak ma angka sumur di rura i jana dapot halahi ma aek.

²⁰Tapi gabe martangkangi ma angka parmahan ni halak Gerar dohot angka parmahan ni si Ishak. Ning halahi ma, “Hami do puna aek on.” Hara ni i, digoari si Ishak ma sumur i, “Partangkangan”.

²¹Dihuar angka naposo ni si Ishak ma mangulahi sumur na asing. Tarjadi muse ma partangkangan hara ni sumur on mangulahi. Jadi digoari si Ishak ma sumur i, “Parbadaan”.

²²Dung i pinda muse ma ia sian i jana dihuar ma mangulahi sumur na patoluhon. Anggo sanoli on, nada masa be partangkangan, jadi hara ni i dibaen si Ishak ma goar ni sumur i, “Haluaan”. Didok ia, “Saonnari madung dilehen TUHAN di hita haluaan anso tola hita maringanan di luat on jana dison ma hita anso makmur.”

²³Jadi kehe ma si Ishak jana lalu ma ia tu Berseba.

²⁴Jadi borngin i dipataridahon Debata ma diriNa tusia mandok, “Au ma da Debata ni amangmu si Abraham. Ulang ho mabiar. Au do mandongani ho. PasupasuonKu ma ho jana lehenonKu ma tu ho bahat pomparanmu hara ni janjingKu tu naposongKu si Abraham.”

²⁵Dung i dipajongjong si Ishak ma langgatan disi jana disomba ia ma TUHAN. Disi ma ia mambaen bandar jana dihuar angka hatobannia ma sumur na asing.

²⁶Sanoli ro ma si Abimelek sian Gerar dohot si Ahusat panuturinia, dohot si Pikol panglima ni tentarania laho mandapotkon si Ishak.

²⁷Marsapa ma si Ishak, “Biasi ulaning ro hamu saonnari mandapotkon au, hape nabaruon dimusui hamu au jana disuru hamu do au morot sian luatmunu i?”

²⁸Jadi ninna halahi ma mangalusi, “Saonnari madung hami boto hape na nidonganan ni TUHAN do ho jana didok rohanami, dengganan ma tabaen ihot-ihot ni parjanjian. Sumpahon ma,

²⁹bahaso na so baenonmu na jahat tu hami, songon hami na so unjung mambaen na jat maradopkon ho. Ma denggan rohanami adop ho jana hami padiar do ho kehe di bagasan dame. Madung torang di hami na nipasupasu ni TUHAN do ho.”

³⁰Dung i dibaen si Ishak ma pesta manjamu halahi, jadi mangan minum ma halahi.

³¹Ancogotna i di hananaek ni mataniari marsidokkon janjina be ma halahi mardongan sumpa. Dung i marsirang ma halahi dung marsijalangan songon na marale-ale.

³²Laing di ari i, ro ma da angka naposo ni si Ishak paboahon tusia taringot tu sumur na nihuar ni halahi. Didok halahi, “Ma dapot hami aek.”

³³Jadi digoari si Ishak ma sumur i “Sumpa”. I ma mulana umbaen na nigoaran kota i, Berseba.

³⁴Di na marumur opat pulu taon si Esau, dialap ia ma boru dua halak sian marga ni bangso Het, i ma si Judit boru ni si Beeri dohot si Basmat boru ni si Elon.

³⁵Mambaen susa do anak boru na dua i di ngolu ni si Ishak dohot si Ribka.