Read Batak Angkola PAMUNGKAAN 27 Bible Online

PAMUNGKAAN 27 - Batak Angkola bible

PAMUNGKAAN 27

¹Sanoli di na dung matobang si Ishak, boti ma mapitung muse, dipiohon ia ma si Esau anaknia siangkaan i, jadi ning ia ma, “Amang!” “Olo, amang,” ning si Esau mangalusi.

²Didok si Ishak ma, “Ma diboto ho na matobang au, jana betak na so honok be au mangolu.

³Jadi buat ma jolo sior dohot anak ni pana, kehe ma jolo ho marburu binatang tu padang.

⁴Tabo ma jolo lompa hagiotku, jadi oban ma tu au. Dung hupangan i, lehenonku ma pasupasungku na parpudi tu ho painte so marujung ngolungku.”

⁵Dibege si Ribka do pangkataion ni si Ishak i dohot si Esau. Jadi dung kehe si Esau na marburu i,

⁶didok si Ribka ma tu si Jakob, “On dope hubege songon on didok amangmu tu si Esau,

⁷‘Marburu ma ho jana baen ma panganonku. Dung abis au mangan, hulehen ma pasupasungku tu ho di jolo ni TUHAN, painte so marujung ngolungku,’ ning ia.”

⁸“Antong amang tangihon ma na hudok on jana patulus,” “ning si Ribka manambai.

⁹Kehe ma ho tu bara ni biri-birinta i, pili ma dua anak ni hambeng na mokmok-mokmok i, anso hulompa panganon hagiot ni amangmu.

¹⁰Jadi ho ma marobansa tu amangmu anso dipangan ia. Jadi dung i lehenonnia ma pasupasunia tu ho painte so marujung ngolunia.”

¹¹Tapi didok si Jakob ma tu inangnia i, “O inang, marimbulu do da pamatang ni si Esau, hape pamatangku limus do?

¹²Naron diapus ia pamatangku gabe tarboto tusia na hupaoto-oto ia, naron nada pasupasu dilehen ia tapi gabe buraannia noma au.”

¹³Dialusi inangnia i ma, “Ulang pola ganggu rohamu da amang. Au pe mananggung sude burania i, sandok baen sajo ma sanga aha na hudok, kehe ma ne ho mangalap angka hambeng i.”

¹⁴Bulus kehe ma si Jakob mambuat hambeng i jana dioban ia ma tu inangnia. Dipature si Ribka ma panganon giot ni roha ni si Ishak.

¹⁵Dung i dibuat si Ribka ma pakean ni si Esau na jumegesna, na nisimpannia di bagas, jadi dipapakehon ia ma i tu si Jakob.

¹⁶Dibalutkon ia muse ma bobak ni anak ni hambeng i tu tangan dohot tu rungkung ni si Jakob na so marimbulu i.

¹⁷Jadi dilehen ia ma panganon na tabo i tu si Ishak dohot roti na nitutungnia i.

¹⁸Dung salpu i, kehe ma si Jakob mandapotkon amangnia i, didok ia ma, “O Amang!” “Olo,” ning si Ishak mangalusi, “Ise dehe ho, si Esau do sanga si Jakob?”

¹⁹Ning si Jakob ma, “Si Esau do au, anakmu siangkaan; madung tulus hubaen na nidok ni amang nangkin. Pajuguk ma da amang anso pangan juhut na huoban on, anso pasupasu au.”

²⁰Didok si Ishak ma, “Tibuna i antong dapotan ho, amang!” Dialusi si Jakob ma, “Hara ni pasupasu ni TUHAN Debata na nisomba ni amang i do na manolong au.”

²¹Jadi ning si Ishak ma tu si Jakob, “Padonok ma jolo anso tarapus au ho. Tutu dehe ho si Esau?”

²²Dipadonok si Jakob ma tu amangna i, jana diapus-apus amangnia i ma ia jana didok ia ma, “Songon sora ni si Jakob do da hubege soramu, hape tanganmu songon tangan ni si Esau.”

²³Nada ditanda si Ishak si Jakob hara ni na niimbuluannia i tangannia gabe songon tangan ni si Esau. Tapi di na giot pasupasuonnia si Jakob,

²⁴laing disapai ia dope sanoli nari, “Tutu dehe ho si Esau?” “Tutu do amang,” ning si Jakob.

²⁵Jadi didok si Ishak ma, “Buat ma jolo juhut i saotik di au. Dung hupangan, hulehen ma pasupasungku tu ho.” Dilehen si Jakob ma juhut i tusia dohot anggur saotik inumonnia.

²⁶Jadi didok amangnia i ma tusia, “Padonok ma tar tuson amang anso umma au.”

²⁷Di na nipadonok ni si Jakob laho mangummasa, muap pakean ni si Esau dianggo si Ishak — jadi dipasupasu ia ma si Jakob. Didok si Ishak, “Tabona i antong uap ni anakkon baya, songon dia ma uap ni padang na nipasupasu ni TUHAN.

²⁸Sai dilehen Debata ma di ho ombun sian langit, jana napuma angka ladangmu baenonNa! Sai dilehen ma di ho gandum dohot anggur marlobi-lobi!

²⁹Sai gabe naposomu ma da angka bangso na marragam, jana talu ma maradopkon ho angka marga ni bangso na asing. Sai rajaanmu ma sude angka kahanggimu jana marsomba di jolomu ma pomparan ni inangmu. Sai hona bura ma sanga ise na mamurai ho jana tarpasupasu ma sanga ise na mamasumasu ho.”

³⁰Dung sidung dilehen si Ishak pasupasunia i; jana disi kehe si Jakob, mulak ma si Esau angkangnia i sian parburuan.

³¹Dilompa ia muse ma sipanganon na tabo lalu dioban ia ma tu amangnia i. Ning ia ma, “Juguk bo jolo amang. Dipangan amang bo juhut na huoban on di amang, anso tarpasupasu amang au.”

³²“Ise dehe ho?” ning si Ishak. “Si Esau do da au anak ni amang siangkaan i,” ning ia mangalusi.

³³Mamungka ma humitir sude pamatang ni si Ishak, jana disapai ia ma, “Anggo songon i, ise dehe nangkin na marburu binatang i jana na mangalehen di au? Ma sanga hupangan nangkin dompak so ro ho. Jadi ma sanga hupasahat pasupasungku na parpudi tusia, jana gabe ia puna noma pasupasu i salolot-lolotna.”

³⁴Dung dibege si Esau na songon i, mangangguk godang ma ia jana dangol sajo dihilala ia; jadi didok ia ma, “Laing pasupasu ma da au, amang!”

³⁵Didok si Ishak ma, “Na dung ro do anggimu tuson jana dipaoto-oto ia au. Madung dibuat ia pasupasu i, na giot tu ho hian do satutuna lehenonku.”

³⁶Didok si Esau ma, “Padua noli on ma dipaoto-oto ia au. Patut do antong si Jakob[7] goarnia. Ma dibuat ia hakku siangkaan jana saonnari dibuat ia muse dope pasupasu na aturan di au. Na so adong be he pasupasu na asing di amang silehenonmu di au?”

³⁷Dialusi si Ishak ma, “Madung hubaen ia gabe tuanmu, jana sude kahangginia hubaen do gabe naposonia. Madung hulehen disia gandum dohot anggur. Saonnari nada adong be na tarpatupa au di ho, amang!”

³⁸Nada marnamantak si Esau mangelek-elek amangnia i, “Hum i sajo ma he amang pasupasumu? Laing pasupasu ma da dohot au, amang!” Dung i tangis ma ia mangulahi.

³⁹Dung i mandok hata ma si Ishak mangulahi, “Indangkon na adong ombun sian langit di ho, nada adong ladang na napu di ho.

⁴⁰Sian podangmi ma ho mangolu. Tapi laing naposo ni anggimu do ho. Tapi muda mangarunta ho, malua ma ho sian kuasonia.”

⁴¹Gabe goyak ma roha ni si Esau mida si Jakob harani na nilehen ni amangnia i pasupasuna tu angginia i. Ning ia ma di bagasan rohania, “Nada pola sadia honok nari marujung ma ngolu ni damang on jana marsiluluton ma hami. Dung salpu i, hubunu ma si Jakob.”

⁴²Dung tarbege si Ribka sangkap ni si Esau i, disuru piohon ia ma si Jakob jana didok ia ma, “Tangihon, marmaksud do angkangmu si Esau giot palalu hosom jana giot bunuonnia ho.

⁴³Jadi, oloi ma na hudok on amang. Kehe ma ho manigor tu ibotongku si Laban, di Haran.

⁴⁴Jana disi ma ho rap dohot ia sanga na sadia honok lopus mombun roha ni angkangmu

⁴⁵jana dilupahon ia sude sanga aha na nibaenmu tusia. Dung i husuruhon pe halak laho mangalap ho mulak tuson. Nada ringkot rohangku muda agoan anak au dua-dua di bagasan sada ari.”

⁴⁶Jadi didok si Ribka ma tu si Ishak, “Loja do da au paida-ida angka ripe ni si Esau na sian boru ni bangso na asing i. Anggo dohot noma si Jakob muse mambuat boru ni halak Het, gumonan noma da mate iba.”