Read Batak Angkola PAMUNGKAAN 29 Bible Online

PAMUNGKAAN 29 - Batak Angkola bible

PAMUNGKAAN 29

¹Dipatorus si Jakob ma pardalanannia jana kehe ma ia tu Habincaran ni tano Kanaan.

²Na so niambang-ambang diida ia ma sumur di padang, jana adong ma di lambungna i modom-modom tolu hulanan hambeng na giot lehenon minum songon na somal. Ditutupi dohot batu na godang do sumur i.

³Dung marlagut sude angka hambeng dohot biri-biri di inganan i, baru pe anso digulang angka parmahan i batu i tu topi, dilehen ma angka pahan-pahanan i minum. Dung sidung i, ditutup angka parmahan i ma mangulahi sumur i.

⁴Jadi marsapa ma si Jakob tu angka parmahan na disi i, “Sian dia dehe hamu dongan?” ning ia. “Sian Haran do,” ning halahi mangalusi.

⁵Disapai si Jakob mangulahi, “Ditanda hamu dehe si Laban pahompu ni si Nahor?” “Hami tanda,” ning halahi.

⁶“Horas-horas dehe ia?” ning si Jakob mangulahi. “Horas torkis do da ia,” ning halahi mangalusi. “Ligi ma indadu, borunia do i, si Rahel goarna. Na ro maroban hambeng ni amangnia i do ia.”

⁷Ninna si Jakob ma, “Arian dope saonnari, na so hatihana dope pabara hambeng. Biasi nada dipainum hamu pahan-pahanan i anso manjampali mangulahi?”

⁸Dialusi halahi ma, “Nada tarbaen songon i anggo so jolo marlagut dison sude angka pahan-pahanan i. Dung i baru ma anso nigulang batu panutup ni sumur on tu topi laho mangalehen minum angka pahan-pahanan i.”

⁹Andorang mangkobari dope si Jakob dohot halahi, lalu ma si Rahel na marmahan biri-biri ni amangnia, maroban biri-biri i tu sumur.

¹⁰Dung diligi si Jakob si Rahel dohot angka biri-biri ni tulangnia si Laban i, dibuka ia ma batu panutup ni sumur i, jana dipainum ia sude biri-biri i.

¹¹Dung i diumma ia ma si Rahel, lalu tartangis-tangis ma ia hara ni mogana.

¹²“Si Ribka do dainang, i ma iboto ni amanta,” ning ia tu si Rahel. Jadi marlojong ma si Rahel muli tu bagas laho paboahon na masa i tu amangnia.

¹³Jadi di na nibege ni si Laban barita ni si Jakob baberenia i, marlojong ma ia mandapotkonsa. Dihaol si Laban ma si Jakob lalu diummai ia, jana dioban ia ma masuk tu bagas. Dung abis dicaritohon si Jakob sude na tarjadi i tu si Laban,

¹⁴didok si Laban ma, “Olo, tutu do sudena i, na samudar do ho dohot au.” Di bagas i ma maringanan si Jakob sabulan.

¹⁵Sanoli didok si Laban ma tu si Jakob, “Hum hara ni na markoum do da hita, nanggo da sapatutna ho karejo di au perei-perei. Aha ma dipangido rohamu upamu?”

¹⁶Adong do boru ni si Laban topet dua halak; siangkaan i margoar si Lea jana anggina i si Rahel.

¹⁷Songon na pede-pede do mata ni si Lea, tapi anggo si Rahel jeges pamatangna jana jogi dohot bohina.

¹⁸Si Rahel do na nisolom mata ni si Jakob, jadi gabe dialusi ia ma tu si Laban, “Ra do au markarejo di ho pitu taon honokna asal ma dipatola ho hubuat si Rahel.”

¹⁹Ning si Laban ma, “Au pe gumonan do huhilala di ho hulehen ia ulang pado tu halak na asing; antong dison ma ho.”

²⁰Jadi karejo ma si Jakob pitu taon honokna anso dapot ia si Rahel, jana songon na manyalpui piga-piga ari sajo do dihilala ia na pitu taon i hara ni holong ni rohania mida anak boru i.

²¹Dung salpu i, didok si Jakob ma tu si Laban, “Ma abis da hatihana; paloas ma marbagas au dohot borumunu i.”

²²Jadi dibaen si Laban ma pesta pabagaskon borunia i jana diontang ia ma sude koum sisolkotnia.

²³Tapi di borngin i, nanggo si Rahel na nitaruhon ni si Laban tu si Jakob; si Lea do hape. Campur ma si Jakob di podoman dohot si Lea. (

²⁴Dilehen si Laban muse ma naposonia dadaboru na margoar si Zilpa tu si Lea borunia i gabe naposonia.)

²⁵Dung ancogotna i pe anso diboto si Jakob, hapengani si Lea do na niparsaripenia i. Jadi kehe ma si Jakob tu si Laban mandok, “Biasi ma he songon i baenonmu tu au? Nada he anso si Rahel do di au umbaen na karejo au? Biasi dipaoto-oto ho au?”

²⁶Dialusi si Laban ma, “Mangihutkon adat dison, na so tola do pabagason parjolo anggina sian angkangna.

²⁷Painte ma jolo sidung pesta parbagasonmu na pitu ari on, dung i hulehen pe di ho dohot si Rahel — asal ma laing ra ho markarejo di au pitu taon nari,” ning ia.

²⁸Satuju ma si Jakob. Jadi dung salpu pesta parbagason i, dilehen si Laban ma dohot si Rahel borunia gabe daboru ni si Jakob. (

²⁹Dilehen si Laban ma hatobannia dadaboru na margoar si Bilha di si Rahel;

³⁰jana humolong do rohania di si Rahel ulang tu si Lea. Jadi karejo ma ia di si Laban pitu taon nari.)

³¹Di na niida ni TUHAN na so sadia si Lea dihaholongi songon si Rahel, dipaloas TUHAN ma si Lea mardakdanak. Tapi anggo si Rahel nada maruntungan.

³²Denggan ma pamatang ni si Lea, jadi sorang ma sada anaknia halaklahi. Ning ia ma, “Ditatap TUHAN do hape hasusaanku, jana haholongan ni halaklahingku noma au.” Jadi dibaen ia ma goar ni anaknia i, si Ruben.[9]

³³Denggan ma pamatang ni si Lea mangulahi jana sorang ma sada nari anaknia. Ning si Lea ma, “Laing dilehen TUHAN muse dope di au anakkon, angke tarbege do tuSia, na so nihaholongan au.” Jadi dibaen ia ma goar ni anaknia i, si Simeon.[10]

³⁴Denggan ma pamatang ni si Lea mangulahi jana sorang ma sada anaknia halaklahi. Ning ia ma, “Saonnari mur tarihot ma tu au roha ni halaklahingku, angke ma pola tolu anak hutubuhon.” Jadi dibaen ia ma goar ni anaknia i, si Levi.[11]

³⁵Dung i denggan ma mangulahi pamatang ni si Lea, jana sorang ma sada anaknia. Ning ia ma, “Anggo on, pujionku ma TUHAN.” Gabe digoar ia ma anaknia i, si Juda.[12] Dung i manyampul ma si Lea.