Read Batak Angkola PAMUNGKAAN 33 Bible Online

PAMUNGKAAN 33 - Batak Angkola bible

PAMUNGKAAN 33

¹Diida si Jakob ma di na dao na ro si Esau rap dohot opat ratus halak. Jadi dibagi ia ma angka dakdanaknia di si Lea, si Rahel dohot di radingnia na dua.

²Di jolo ma dibaen ia radingnia na dua i dohot anak na nitubuhonna i, dung i ihut ma si Lea rap dohot angka anak na nitubuhonna i, dung i si Rahel ma dohot si Josep parpudi.

³Mardalan ma si Jakob di jolo ni halahi sude, di na mur mandonok ia mandapotkon angkangnia i, manungkap ma ia marsomba pitu noli.

⁴Tapi marlojong ma si Esau mandapotkon ia, lalu dihaol ia ma si Jakob jana diumma ia. Marsitangis-tangisan ma halahi na dua.

⁵Dung manaili si Esau humaliang, diida ia ma angka dadaboru dohot angka dakdanak i, jadi disapai ia ma, “Angka ise dehe donganmon?” “Angka dakdanakku do i da tuanku,” ning si Jakob mangalusi. “Madung dipataridahon Debata tu iba holong ni rohaNa jana dilehen angka dakdanak i tu au.”

⁶Dung i maju ma rading na dua i dohot dakdanakna laho sujud marsomba.

⁷Dung i ro ma si Lea dohot angka dakdanaknia, jana na parpudi ro ma si Josep dohot si Rahel padonokkon, jadi manungkap ma halahi sude marsomba.

⁸Disapai si Esau ma, “Na mambaen bia dehe ho di rombongan sinangkin na huida i?” Dialusi si Jakob ma, “Laho pajop rohamu do hubaen songon i.”

⁹Tapi didok si Esau ma, “Tuk do di au anggi, indangkon pola sai pasahat i tu au.”

¹⁰Ning si Jakob ma, “Ulang ale angkang! Muda hupajop rohamu, jagit ma da antong somba-sombangkon. Anggo di au, hum marnida bohimu madung songon na mida bohi ni Debata, hara ni denggan ni rohamu mida au.

¹¹Na mangido ma au, anso laing jagitonmu somba-somba na huoban on di ho. Madung dihaholongi Debata au jana dilehen di au sanga aha na porlu di au.” Sai torus ma disosoi si Jakob lopus dijagit si Esau ujungna silehen-lehen i.

¹²Jadi didok si Esau ma, “Marhobas ma da anso kehe hita, parjolo ma au mardalan ulang ho.”

¹³Dialusi si Jakob ma, “Diboto ho do da, na gale-gale dope angka dakdanak on, boti angkon laing mataanku do angka pahan-pahanan na manyusu dope. Muda niompot mangayak-ayak anso hipas, hum sadari pe marmatean ma lalu sudena.

¹⁴Pajolo hamu ma da mardalan, hami deget-degeti pe sian pudi mangihutkon hamu. Intap ni na lobas huompoti pe mardalan rap dohot pahan-pahanan on dohot angka anakta on anso hudapoti ho di Edom.”

¹⁵Ning si Esau ma, “Antong anggo songon i, hutinggalkon ma deba angka halakkon rap dohot ho.” Tapi dialusi si Jakob ma, “I pe nada pola, harana hum na giot pasonang rohamu do giotku.”

¹⁶Songon i ma di ari i, mulak ma si Esau tu Edom.

¹⁷Tapi kehe ma si Jakob tu Sukot, jadi dipajongjong ia ma bagasnia dohot parsilaungan ni angka pahan-pahanannia. Hara ni i ma umbaen na nigoaran inganan i, Sukot.[26]

¹⁸Di pardalanan na sian Mesopotamia lalu ma si Jakob horastorkis tu Sikem na di Kanaan, jadi dipajongjong ia ma bandarnia di sada padang-padang na donok tu kota.

¹⁹Na nitobusannia do padang inganan ni bandarnia i sian sada halak pomparan ni si Hemor, amang ni si Sikem, arga saratus hepeng perak.

²⁰Dung i dipajongjong ia ma langgatan disi jana dibaen ia ma goarna, “Debata, Debata ni si Israel”.