Read Batak Angkola PAMUNGKAAN 34 Bible Online

PAMUNGKAAN 34 - Batak Angkola bible

PAMUNGKAAN 34

¹Sanoli kehe ma si Dina boru ni si Jakob na nitubuhon ni si Lea i, mandapotkon piga-piga halak boru Kanaan.

²Di na niida ni si Sikem anak ni si Hemor halak Hewi i, i ma raja ni luat i si Dina, dilojongkon ia ma anak boru i, dipaksa ia ma mambaen na so ture.

³Tapi solom do matania mida si Dina gabe por rohania sugari disia nian si Dina jana diusahahon ia ma, anso laing por muse roha ni si Dina disia.

⁴Jadi didok si Sikem ma tu amangnia, “Pangidoanku, dialap amang ma anak boru i di au. Por do rohangku marripehon ia.”

⁵Tarbege ma tu si Jakob na dung disego-sego habujingon ni borunia i, tapi hara ni na topet marmahan di padang-padangan angka anaknia, gabe nada adong sanga aha tarbaen ia salolot so muli halahi.

⁶Jadi kehe ma si Hemor amang ni si Sikem mandapotkon si Jakob laho manghobari dohot ia.

⁷Di na mangkobari i halahi, lalu ma angka dakdanak ni si Jakob sian parmahanan. Disi dibege halahi na masa i, tarsonggot ma halahi jana muruk sajo. Harana gabe marlayas ma sude angka halak Israel hara ni parbuatan na so ture tu boru ni si Jakob i.

⁸Didok si Hemor ma tu si Jakob, “Ma tarsolom mata ni anakku si Sikem borumunu, pangidoanku paloas ma anso dialap anakki borumunu i.

⁹Tole ma da tabaen dos ni roha anso tola marsibuatan bangsomu dohot bangsongku.

¹⁰Jadi tola ma ho maringanan dison, di luatnami on rap dohot hami; sanga na di dia ma giotmu di luat on. Bebas ma ho marjagal sanga maniop sinadonganmu sandiri.”

¹¹Dung i didok si Sikem ma tu amang ni si Dina dohot tu angka ibotona i. “Oloi hamu ma jolo pangidoankon, gabe oloanku ma sanga aha sajo na nipangido ni rohamunu.

¹²Dok hamu ma sanga aha do silehen-lehen por ni rohamunu, jana tontuhon hamu ma sanga sadia bolina. Hulehen pe sanga aha na nipangidomunu, asal ma dipatola hamu hualap borumunu i.”

¹³Hara ni na dung disego-sego ni si Sikem habujingon ni si Dina i, gabe margabus ma angka dakdanak ni si Jakob i tu si Sikem dohot tu si Hemor amangna i.

¹⁴Didok halahi ma tu na dua i, “Maila ma hami muda hami isinkon ibotonami i marbagas dohot halak na so marsunat dope.

¹⁵Muda oloannami pe i angkon jolo gok do sarat na sada on: Angkon dos hamu dohot hami, artina, angkon marsunat do sude halaklahi sian hamu.

¹⁶Angkon songon i do baru pe anso taroloi hami pangidoanmunu taringot tu na marsilehenan boru i. Tongtong ma hami maringanan di tonga-tongamunu jana sabangso ma hita.

¹⁷Tapi anggo so taroloi hamu do pangidoannami on, nada ra hamu marsunat, tarihonnami do ibotonami i jana kehe hami.”

¹⁸Ma tumbuk diida si Hemor dohot si Sikem sarat-sarat na songon i.

¹⁹Jadi manigor dipatulus si Sikem ma sarat-sarat i hara ni por ni rohania di si Dina. Boti sian sude koum sisolkotnia, si Sikem ma na sumangap dihilala halahi.

²⁰Dung i kehe ma si Hemor dohot si Sikem tu inganan parrapotan di horbangan ni kota i, jana mandok hata ma halahi tu halak kota i songon on,

²¹“Denggan do da roha ni halak Israel. Jana tapadiar ma halahi maringanan di luat on rap dohot hita jana bebas halahi sanga na tu dia. Tuk dope bidang ni luat on baen inganan di halahi. Jadi taalapi ma boru ni halahi jana tapadiar muse ma da dialap halahi angka borunta.

²²Tapi adong do sada saratna anso ra halahi tinggal di tonga-tonganta jana gabe sabangso hita. Songon on ma: Sude halaklahi sian hita angkon nisunat songon halahi.

²³Gabe hita puna do muse sude pahan-pahanan ni halahi dohot sinadongan ni halahi i. Jadi taoloi ma da pangidoan ni halahi anso laing tarbaen halahi maringanan di hita on.”

²⁴Satuju do na sahuta i di pangidoan ni si Hemor dohot si Sikem i, gabe marsunat ma sude halaklahi na sakota i.

²⁵Dung tolu ari, di hatiha laing hancitan dope angka halaklahi hara ni na nisunat i, ro ma dua halak anak ni si Jakob mambuat podang, i ma iboto ni si Dina na margoar si Simeon dohot si Levi, disisipi halahi ma masuk tu kota. Dung i dibunu halahi ma disi sude halaklahi na sahuta i,

²⁶dohot si Hemor dohot si Sikem. Masuk ma halahi tu bagas ni si Sikem, dibuat halahi ma si Dina sian i, lalu kehe halahi.

²⁷Dung abis na mamunu jolma i, ro muse ma angka dakdanak ni si Jakob na asing i mangarampas kota i songon na palalu hosom hara ni iboto ni halahi na nisego-sego i habujingonna.

²⁸Dibuat halahi ma sude hambeng biri-biri, lombu, halode dohot sude na adong di kota i dohot na di padang.

²⁹Dibuat halahi ma sude barang-barang na mararga, ditangkup halahi ma angka dadaboru, angka dakdanak, jana dirampas halahi ma sude na adong di bagasan bagas na di kota i.

³⁰Dung i didok si Jakob ma tu si Simeon dohot si Levi, “Dibaen hamu do hasusaan tu au. Saonnari gabe sihagigian ma au di halak Kanaan dohot halak Peris dohot sude pangisi ni luat on. So na sadia halakta; jadi ampot sai saroha halahi sude mangalo au jana manyerang au, harom ma sude hita na sabagas.”

³¹Tapi dialusi halahi ma, “Nada tarpadiar hami ibotonami i dibaen songon siboru jalang na so mararga.”