Read Batak Angkola PAMUNGKAAN 35 Bible Online

PAMUNGKAAN 35 - Batak Angkola bible

PAMUNGKAAN 35

¹Sanoli didok Debata ma tu si Jakob, “Au ma da Debata na pataridahon diringKu tu ho di na lari i ho sian angkangmu si Esau. Ompoti ma kehe tu Betel. Disi ma ho maringanan jana pajongjong ma sada langgatan di Au.”

²Jadi didok si Jakob ma tu halahi na sabagas dohot tu sude halaknia, “Ambungkon hamu ma sandok dewa na asing na adong ditiop hamu; paias hamu ma dirimunu jana pake hamu ma pakean na ias.

³Morot ma hita sian inganan on jana kehe ma hita tu Betel. Pajongjongonku ma disi sada langgatan di Debata na mangurupi au di hatiha hasusaanku jana na mandongani au sanga na tu dia pe au kehe.”

⁴Jadi dipasahat halahi ma sude dewa na asing na nitiop ni halahi dohot angka anting-anting na di pinggol ni halahi. Di tanom si Jakob ma angka barang-barang i di toru ni hayu na godang na di lambung ni kota Sikem i.

⁵Di na mardalan si Jakob dohot angka dakdanaknia i, digohi biar ma sude halak kota na humaliang i, gabe nada puluk halahi mangkojar si Jakob.

⁶Jadi lalu ma si Jakob dohot rombongannia i tu Tano Kanaan, di kota Betel na margoar Lus najolo.

⁷Dipajongjong si Jakob ma disi sada langgatan jana dibaen ia ma goar ni inganan i “El-Betel”, angke disi ma dipataridahon Debata diriNa tu si Jakob di na lari ia sian angkangnia.

⁸Disi muse do si Debora, inang parorot ni si Ribka jumolo jana dikubur di toru ni hayu na godang sabola Selatan ni kota i. Hara ni i ma umbaen na margoar hayu i “Hayu Partangisan”.

⁹Dung mulak si Jakob sian Mesopotamia, dipataridahon Debata muse dope diriNa tusia jana dipasupasu ia.

¹⁰Didok Debata tusia, “Nada dohonon be si Jakob goarmu, tapi si Israel noma, songon i ma dibaen Debata goarnia si Israel.”

¹¹Jadi didok Debata ma tusia, “Au do Debata Na Gumogo. Sai gabe ma ho, marpomparan na bahat! Ruar ma sian ho angka bangso jana gabe ompung ni angka raja-raja ma ho.

¹²Luat na dung hulehen tu si Abraham, tu si Ishak, hulehen ma i di ho dohot di pomparanmu.”

¹³Dung i ditadingkon Debata ma si Jakob.

¹⁴Di inganan ni Debata na mandok hata i tu si Jakob, dipajongjong si Jakob ma sada batu parningotan. Jana dibaen ia ma i gabe hapunjungan ni Debata, di na niusehonnia anggur dohot miak zetun di ginjangna i. Songon i ma dibaen ia laho mambaen batu gabe hapunjungan ni Debata.

¹⁵Digoari si Jakob ma inganan i “Betel”.

¹⁶Dung i ditadingkon si Jakob dohot rombongannia i ma Betel. Dompak nada sadia dao dope halahi sian Efrata dapot ma hatihana giot hipas si Rahel. Tapi maol do anso sorang dakdanak i.

¹⁷Dompak di hahancitanna dihilala ia, didok bidan i ma tusia, “Ulang ho mabiar da Rahel, laing halaklahi do anakmon.”

¹⁸Tapi donok ma anso marujung ngolu ni si Rahel, jana di na laho tos hosania, dibaen ia ma goar ni anaknia i si Ben-Oni,[27] tapi dibaen amangnia i ma goarna si Benyamin.[28]

¹⁹Dung marujung ngolu ni si Rahel, dikuburkon ma ia di lambung dalan laho tu Efrata, i ma na margoar Betlehem saonnari.

²⁰Dipajongjong si Jakob ma sada batu parningotan disi, jana lalu tu saonnari laing tanda dope kuburan ni si Rahel hara ni batu i.

²¹Dung i ditoruskon si Jakob ma pardalanannia, jana dipajongjong ia ma bandarnia di tongtang ni palas-palas Eder.

²²Di inganan i ma dipodomi si Ruben rading ni amangnia na margoar si Bilha. Tarbege ma i tu si Jakob, gabe muruk situtu ma ia. Dua bolas anak ni si Jakob.

²³Angka on ma anak ni si Lea: Si Ruben (i ma anak siangkaan ni si Jakob), si Simeon, si Levi, si Juda, si Isakar dohot si Zebulon.

²⁴Angka dakdanak ni si Rahel, i ma si Josep dohot si Benyamin.

²⁵Angka anak ni si Bilha naposo dadaboru ni si Rahel i, i ma si Dan dohot si Naftali.

²⁶Angka anak ni si Zilpa naposo dadaboru ni si Lea i, i ma si Gad dohot si Aser. Di Mesopotamia do sorang angka dakdanak i.

²⁷Jadi kehe ma si Jakob mandapotkon si Ishak amangnia i di Mamre di lambung ni Hebron. I ma inganan ni si Ishak amangnia dohot ompungnia si Abraham.

²⁸Marumur ma si Ishak saratus salapan pulu taon,

²⁹jana mate matobang ma ia. Jadi dikuburkon anakna ma ia, i ma si Esau dohot si Jakob.