Read Batak Angkola PAMUNGKAAN 37 Bible Online

PAMUNGKAAN 37 - Batak Angkola bible

PAMUNGKAAN 37

¹Torus di Luat Kanaan noma si Jakob maringanan i ma inganan ni amangnia hian.

²Jana on ma barita ni keluarga ni si Jakob: Doli-doli na marumur pitu bolas taon ma si Josep anak ni si Jakob. Dohot ma si Josep marmahani angka pahan-pahanan rap dohot angka angkangnia, tubu ni si Bilha dohot si Zilpa, rading ni amangnia. Sandok pangalaho ni angka angkangnia na so ture, dipaboa-boa ia do tu amang ni halahi i.

³Humolong do roha ni si Jakob mida si Josep ulang mida anaknia na asing i, harana ma matobang si Jakob di parsorang ni si Josep. Di sada hatiha dipabaenkon si Jakob ma sada baju juba na lobi jeges di si Josep.

⁴Jadi dung diida angka angkangnia i na humolongan roha ni amang ni halahi i mida si Josep ulang mida halahi, gabe goyak ma da roha ni halahi mida si Josep jabat nada ra be halahi burju manghobari dohot ia.

⁵Sanoli borngin-borngin, marnipi ma si Josep. Jadi hatiha mancaritohon nipinia i ia tu angka angkangnia i, mur goyak ma da roha ni halahi mida ia.

⁶Songon on ma didok si Josep tu halahi, “Tangihon hamu ma jolo!

⁷Marnipi au, hatiha di ladang hita sude manambati angka sagean ni gandum, jadi gabe jongjong ma da sagean ni gandum na hutambati i tigor. Anggo angka na nitambatanmunu i markaliang ma tu na hutambat i marsomba.”

⁸“Ning rohamu ma lakna gabe ho na giot mangarajai hami?” ninna angka angkangnia i manyapai ia. Jadi mur tamba ma goyak ni roha ni halahi mida ia hara ni angka na nidoknia i.

⁹Dung i marnipi ma si Josep mangulahi, jana didok ia ma tu angka angkangnia i, “Marnipi muse do au mangulahi, songon na huida mataniari, bulan dohot sabolas bintang marsomba tu au.”

¹⁰Dicaritohon ia muse do nipinia i tu amangnia jana dipaingot amangnia ma ia, ninna, “Nipi aha i? Ning rohamu ro ma au, inangmu dohot angka angkangmu marsomba tu ho?”

¹¹Goyak ma roha ni angka angkangna i mida si Josep, tapi anggo amangna i laing marpikir-pikir do taringot tu nipi i.

¹²Sanoli hatiha kehe angka angkang ni si Josep i tu Sikem marmahani angka hambeng biri-biri ni amang ni halahi i,

¹³didok si Jakob ma tu si Josep, “Na giot suruonku do ho tu Sikem, tu inganan ni angka angkangmi marmahani angka hambeng biri-birinta i.” “Denggan amang,” ning si Josep mangalusi.

¹⁴Ning amangnia i ma, “Kehe ma jolo ho mangaligi angkangmi sanga na horas do halahi dohot hambeng biri-birinta i betak na denggan do; jadi mulak ma ho tuson, paboa tu au sanga na bia do.” Jadi dipakehe ia ma si Josep manadingkon Rura Hebron. Nada sadia honok, lalu ma si Josep tu Sikem.

¹⁵Kehe ma ia mardalan di padang-padang i. Adong ma sada bayo marnida ia, disapai ma tusia, “Aha dehe na nijalahanmu?” ning bayo i.

¹⁶“Na manjalahi angka angkangku do au, marmahan hambeng biri-biri do halahi,” ning si Josep mangalusi. “Diboto ho dehe ulaning sanga na di dia halahi? Paboa ma jolo tu au,” ning ia.

¹⁷Didok bayo i ma, “Ma kehe halahi sian on! Hubege didok halahi na giot tu Dotan do halahi.” Jadi kehe ma si Josep mandapoti angka angkangnia i jana didapot ia ma halahi di Dotan.

¹⁸Sian na dao dope ma diida halahi si Josep, jadi dompak so lalu si Josep tu halahi, ma jolo martahi halahi jana ma putus, bunuon ni halahi ma ia.

¹⁹Ninna halahi ma sama halahi, “Ligi ma, ma ro indu parnipi-nipi i.

²⁰Tole ma ba, tabunu ma i, tadabuhon pamatangna i tu bagasan sumur na mahiang i. Tadok ma, na nisoro ni binatang riar ia. Jadi, taligi ma sanga aha do na nidok ni angka nipinia i.”

²¹Dibege si Ruben ma sangkap ni halahi i, dijalahi ia ma akal laho paluahon si Josep, “Ulang ma da tabunu ia,” ning ia.

²²“Tadabuhon sajo pe tu bagasan sumur na di padang parhorsihan on, tapi ulang taparkanciti ia.” Didok ia pe songon i, na giot paluahon si Josep do rohania jana disuru ia mulak tu amangnia.

²³Jadi da, dung lalu si Josep tu angka angkangnia i, direkrek halahi ma baju juba ni si Josep na jeges i anso marbuka.

²⁴Jadi dioban halahi ma ia jana didabuhon ma tu bagasan sumur na mahiang.

²⁵Jadi hatiha mangan halahi, ompot ma diida halahi sarombongan halak Ismael na di pardalanan sian Gilead laho tu Mesir. Maroban angka parmasak dohot hamonyan.

²⁶Jadi ninna si Juda ma tu kahanggina i, “Aha ma he untungna muda tabunu angginta i jana tarahasiahon na tabunu ia?

²⁷Tagadis ma tu halak Ismael i. Jadi nada porlu parkancitanta ia; sanga na bia pe laing na angginta do da ia, dongan samudarta.” Gabe satuju ma angka kahangginia i di usul i,

²⁸jana hatiha mamolus deba saudagar halak Midian[29] diparuar angka angkangna i ma si Josep sian bagasan sumur i, digadiskon halahi ma ia tu halak Ismael i arga dua pulu hepeng perak. Dung i dioban angka parjagal i ma ia tu Mesir.

²⁹Di na mangulahi si Ruben tu sumur i, nada diida ia be disi angginia i, gabe disibakkon ia ma pakeannia hara ni marsak ni rohania.

³⁰Didapotkon ia ma mangulahi angka angginia i jana didok ia ma, “Nada disi be dakdanak i! Bia noma baenonku saonnari?”

³¹Jadi disambol halahi ma sada hambeng jana disornopkon halahi ma baju juba ni si Josep i tu mudar i.

³²Dung i dioban halahi ma baju i tu amang ni halahi. Ninna halahi ma, “Na dapot hami do juba on. Anak ni amang i do nampuna on?”

³³Ditanda si Jakob do juba i, jadi didok ia ma, “Tutu ma da on juba ni anakki! Na hona soro ni binatang panyoro ma da on. Ma mate disibak-sibak binatang i anakki!”

³⁴Disibakkon si Jakob ma pakeannia hara ni marsakna jana dipake ia ma pakean siluluton. Sanga na piga ari sai diandungi ia anaknia i.

³⁵Sude dakdanaknia i dadaboru dohot halaklahi, marroan do laho mangapoi ia, tapi nada ra ia niapoan. Didok ia do, “Anggo au lopus manuat au tu portibi ni halak na mate, sai andunganku do anakki.” Songon i ma sai torus markutondo ia hara ni si Josep anaknia i.

³⁶Jadi dung lalu di Mesir, manigor digadis halak Midian i ma si Josep tu si Potifar, i ma sada halak parpangkat na gabe kapala ni pangawal ni bagas godang.