Read Batak Angkola PAMUNGKAAN 38 Bible Online

PAMUNGKAAN 38 - Batak Angkola bible

PAMUNGKAAN 38

¹Laing tar di hatiha i, ditadingkon si Juda ma angka kahangginia i jana sainganan ma ia dohot si Hira sada bayo na marasal sian kota Adulam.

²Marsitandaan ma disi si Juda dohot sahalak boru Kanaan, boru ni si Batsua.

³Dialap si Juda ma boru Kanaan i, i ma na manubuhon sada anak halaklahi muse na nigoar ni amangna, si Er.

⁴Ditubuhon ripe ni si Juda i dope sada anak halaklahi, na nigoaran ni si Juda si Onan.

⁵Dung i ditubuhon ripe ni si Juda i dope sada anak halaklahi na margoar si Sela. Hatiha di Kesib do si Juda di parsorang ni dakdanak i.

⁶Dijalahi si Juda ma boru giot di si Er, anaknia siangkaan i. Si Tamar do goar ni daborunia i.

⁷Santak do jahat ni si Er, gabe muruk ma Debata tusia, gabe dibunu TUHAN do ia.

⁸Dung i didok si Juda ma tu si Onan, anggi ni si Er, “Patuginjang ma da angkangmu na nitadingkon ni si Er jana rap ma hamu modom. Gohi ma na patut baenonmu tusia, dibaen anggi ni halaklahinia do ho; jadi muda songon i gabe adong ma pomparan ni angkangmi.”

⁹Tapi diboto si Onan do, na so ia puna angka dakdanakna i muse. Jadi, ganop marcampur ia dohot tinggal-tinggalan ni angkangnia i, sai dipadiar ia do sampak tu tano samenia i anso ulang adong pomparan di angkangnia i.

¹⁰Mangalapi muruk ni TUHAN do pambaenannia, gabe dibunu TUHAN muse ma ia.

¹¹Dung i didok si Juda ma tu si Tamar parumaenna i, “Mulak ma hamu jolo parumaen tu bagas ni moranta, disi ma jolo hamu songon na marando lopus magodang anakku si Sela.” Na mabiar do ia betak sai dohot muse si Sela lalu dibunu TUHAN songon angkangna na dua i. Jadi mulak ma si Tamar tu bagas ni amangna.

¹²Nada sadia honok, jumolo muse ma ripe ni si Juda i. Dung salpu hatiha siluluton, dipio si Juda ma si Hira dongannia na sian Adulam i anso kehe halahi tu Timna, tu inganan panggustingan ni imbulu ni angka biri-birinia.

¹³Dipaboa sada halak ma tu si Tamar na giot ro si Juda amangborunia i tu Timna laho pagustingkon imbulu ni biri-birinia.

¹⁴Jadi digonti si Tamar ma pakean na marando gabe pakean na asing. Ditutupi ia ma bohinia, jana juguk ma ia di horbangan ni kota Enaim, i ma huta siboluson laho tu Timna. Diboto si Tamar do na dung magodang si Sela anak siampulan ni si Juda i, hape laing nada dipabagas dope ia dohot doli-doli i.

¹⁵Di na niida ni si Juda si Tamar, ning rohania do boru jalang anak boru i hara ni na nitutupan i bohina.

¹⁶Jadi didapotkon si Juda ma ia di topi dalan i jana didok ia ma, “Sadia dipangido ho?” (Nanggo diboto ia na parumaenna i sandiri do anak boru i.) Disapai si Tamar ma, “Aha dehe na giot lehenonmu di au?” ning ia.

¹⁷Dialusi si Juda ma, “Hutongos ma di ho sada hambeng jara-jara sian punguan ni hambeng biri-biringki.” Ning si Tamar ma mangalusi, “Denggan, asalkon ma dilehen ho tu au sanga aha na gabe jaminan sitiopanku, lopus ditongos ho hambeng i.”

¹⁸“Jaminan aha dehe ningmu?” ning si Juda manyapai. Dialusi si Tamar, “Lehen ma tintin sitempelmi dohot borgok dohot tungkot na niobanmi.” Dilehen si Juda ma barang-barang i tusia, jadi marmainan ma halahi jana gabe denggan ma pamatang ni si Tamar.

¹⁹Mulak ma si Tamar tu bagas jana dibuka ia ma panutup ni bohinia i, dipake ia ma mangulahi pakean na marando i.

²⁰Dung adong sadia honok, disuru si Juda ma si Hira dongannia i laho manaruhon hambeng i boti laho mangido angka barang-barang na nilehennia songon jaminan na salpu i, hape nada diida si Hira be anak boru i.

²¹Disapa-sapai si Hira ma angka halak Enaim, “Ma di dia ulaning boru jalang na di topi-topi dalan on hian?” “Nada unjung adong dison da boru jalang,” ning halahi.

²²Jadi mulak ma si Hira tu si Juda jana didok ia ma, “Nada marsuo au dohot anak boru i. Pandok ni halak kota i, na so unjung do adong boru jalang disi.”

²³Ning si Juda ma, “Padiar ma disia angka barang-barang i. Ulang jabat sipartataan ni halak hita. Ma niusahahon manggararsa, na so marsuo do ho dohot ia.”

²⁴Dung adong hira-hira tolu bulan, dipaboa halak ma barita on tu si Juda, “Ma gabe boru jalang parumaenmu, jana ma denggan pamatangna.” Jadi diparentahon si Juda ma, “Oban ma ibana tuson jana tutung lopus mate!”

²⁵Jadi hatiha na maroban si Tamar i, ditonahon ia ma tu amangborunia i songon on, “Nampuna barang-barang indon do na mambaen denggan pamatangku. Pareso hamu ma sanga na ise puna tintin sitempel dohot borgok dohot tungkot on.”

²⁶Ditanda si Juda do barang-barang i, gabe didok ia ma, “Tigor do anak boru i. Au do na so manggohi na patut baenonku tusia — aturanna angkon pabagasonku do ia antong tu anakku si Sela.” Jadi nada be jungada si Juda marmainan dohot si Tamar.

²⁷Jadi dung dapot hatihana giot hipas si Tamar, hape silinduat do na giot sorang i.

²⁸Jadi hatiha parsorang ni anaknia, sada sian dakdanak i diparuar ia ma tanganna, jadi ditiop bidanna i ma tanganna i lalu ditambat ia dohot bonang na rara. Ning ia ma, “Dakdanak on do parjolo sorang.”

²⁹Tapi ditarik dakdanak i ma mangulahi tanganna i jana parjolo ma sorang donganna i. Dung i didok bidan i ma, “Jadi songon i ma dibaen ho manompas laho ruar!” Jadi dibaen ia ma goar ni na parjolo sorang i, si Peres.[30]

³⁰Jadi dung i sorang ma donganna i, i ma na nitambat tanganna dohot bonang na rara. Dibaen ma goarna si Zera.