Read Batak Angkola PAMUNGKAAN 39 Bible Online

PAMUNGKAAN 39 - Batak Angkola bible

PAMUNGKAAN 39

¹Anggo si Josep madung dioban angka halak Ismael i tu Mesir jana digadis tu si Potifar, i ma sahalak parpangkat na gabe kapala ni pangawal ni bagas godang.

²Didongani TUHAN do si Josep, gabe sai manjadi do sude karejonia. Di bagas ni tuannia i do ia tinggal, i ma halak Mesir i.

³Diida tuannia, na nidonganan ni TUHAN do si Josep jana sai manjadi do sude na nikarejohon ni si Josep dibaen TUHAN.

⁴Jop do roha ni si Potifar mida ia, jana diangkat ia ma si Josep gabe pangoloinia sandiri; jadi dipasahat ia ma tu si Josep laho mangurus bagas dohot sude sinadongannia.

⁵Mamungka sian hatiha i, hara ni si Josep, dipasupasu TUHAN ma halak Mesir na sabagas i dohot sude sinadongannia na di bagas sanga pe na di ladang.

⁶Sandok sinadongannia, dipasahat ia ma tu si Josep mangatursa. Jana nada dipaboto-boto si Potifar be urusan ni bagasnia i, asing sian panganon na nipangannia i sandiri. Na ginjang na godang jana na tongam do anggo si Josep.

⁷Dung adong sadia honok, mamungka ma ro roha ni ripe ni si Potifar tu si Josep, jadi dipiohon ia ma doli-doli i rap modom.

⁸Nada ra si Josep jana didok ia ma, “Santabi nyonya, madung dipasahat tuanku si Potifar sandok sinadongannia anso huurus. Nada pola adong be sipikirannia di bagasan bagas on, hara ni na dison au.

⁹Sarupa do nian kuasongku di bagas on dohot kuasonia. Nanggo adong be na asing na so nipasahatnia tu au asing sian nyonya i sandiri. Bia ma baenonku mambaen parbuatan na songon i jorngangna boti mardosa iba tu Debata?”

¹⁰Haru pe sai dielek-elek ripe ni si Potifar i si Josep sian ari tu ari, laing nada ra si Josep i rap sapodoman dohot ia.

¹¹Sanoli da, hatiha masuk si Josep tu bagas laho mangkarejohon karejonia nada adong sahalak pe angka parhobas ni bagas i di bagasan.

¹²Jadi ditarik daboru ni si Potifar i ma juba ni si Josep jana didok ma tusia, “Tole ma da rap modom hita,” ning ia. Tapi mangarunta ma si Josep, marlojong ma ia tu ruar, hape deret ma baju jubania i di tangan ni anak boru i.

¹³Jadi dung diida ia si Josep manadingkon jubania i jana dilojong ia tu ruar,

¹⁴dipiohon ripe ni si Potifar i ma angka parhobas ni bagas i jana didok ia ma, “Ligi hamu ma indon! Mambaen layas do tu hita halak Ibrani na nioban ni halaklahingki tu bagas on. Masuk ma ia antong tu kamarku jana dicubo ia ma mambaen na so ture tu au, tapi marsurak au sagogongku.

¹⁵Dung dibege ia au marsurak dilojong ia ma tu ruar jana deret ma baju jubania on di lambungku.”

¹⁶Di lambungnia ma dipayakkon ia juba i lopus mulak halaklahinia i.

¹⁷Jadi laing dicaritohon ia ma carito i tu halaklahinia i, ning ia, “Halak Ibrani na niobanmi tu bagas on, masuk tu kamarku jana dipalayas ia au.

¹⁸Tapi dung marsurak au, dilojong ia tu ruar jana deret dibaen ia jubania on di lambungku.”

¹⁹Gabe sun ma muruk ni si Potifar.

²⁰Jana disuru ia ma anso manigor ditangkup si Josep jana dipamasuk tu hurungan, inganan panghurungan ni angka tahanan ni raja. Jadi gabe disi ma si Josep tinggal.

²¹Tapi didongani jana dipasupasu TUHAN do si Josep, jabat gabe jop roha ni kapala ni hurungan i mida ia.

²²Dibaen ia ma si Josep gabe kapala ni angka tahanan na asing i, jana si Josep ma hasahatan ni tanggung jawab di sude karejo na adong di bagasan hurungan i.

²³Nada pola porlu be anto-antoan ni kapala ni hurungan i sandok karejo na nipasahat tu si Josep, dibaen TUHAN do mandongani ia gabe manjadi ma sude karejonia i.