Read Batak Angkola PAMUNGKAAN 4 Bible Online

PAMUNGKAAN 4 - Batak Angkola bible

PAMUNGKAAN 4

¹Dung i marcampur ma si Adam dohot si Hawa dadaborunia i, jana denggan ma pamatangna. Ditubuhon ia ma sada anak halaklahi jana ning ia ma, “Hara ni panolongi ni TUHAN, maruli do au sada anak halaklahi.” Gabe dibaen ia ma goar ni dakdanak i, si Kain.

²Dung i ditubuhon si Hawa muse ma sada nari laing anak halaklahi, na margoar si Abel. Gabe parmahan biri-biri do si Abel, tapi anggo si Kain gabe partani do.

³Dung adong sadia lolot, dibuat si Kain ma sian suha ni tano na nibaennia i, dipasahat ia ma i tu TUHAN gabe haul.

⁴Dibuat si Abel ma sada anak ni biri-biri siangkaan sian saparinaan; disambol ia ma i, lalu dihaulkon ia ma goar-goaranna na dumenggan sian i tu TUHAN. Jop ma roha ni TUHAN mida si Abel dohot na nihaulkonnia i,

⁵tapi anggo si Kain dohot na nihaulkonnia i ditulak TUHAN do. Marpiar-piar ma muruk ni si Kain, jana murhing ma bohina hara ni murukna.

⁶Jadi didok TUHAN ma tu si Kain, “Biasi muruk ho? Biasi murhing bohimu?

⁷Muda na denggan do na nibaenmu, musti angkon tata bohimu; tapi hara ni na nibaenmu na jat, gabe painte-intehon ma dosa laho masuk tu bagasan ate-atemu. Na giot rajaan ni dosa ma dirimu, tapi angkon taluhononmu do i.”

⁸Jadi didok si Kain ma tu si Abel anggina i, “Beta jolo hita tu ladang.” Jadi di hatiha di ladang halahi dibalbal si Kain ma angginia i lalu dibunu ia.

⁹Disapai TUHAN ma tu si Kain, “Di dia si Abel, anggimi?” Dialusi si Kain ma, “Nada huboto i. Angkon iba ma he lakna pajago-jago angginiba?”

¹⁰Jadi didok TUHAN ma, “Biasi angkon baenonmu pangalaho na jorbut i? Pio-pio do mudar ni anggimi sian tano i, songon sora na mangangguk mangido pamalosan.

¹¹Hona bura ma ho, jana na so tola be ho mangkarejohon tano i. Madung diincop tano i mudar ni anggimi, songon na mungkap pamanganna manjagit mudar ni anggimi di na nibunumi ia.

¹²Muda pe gabe martani ho, na so adong ma bagi aha hasil ni tano i; gabe halak na madoado noma ho na so adong bagasna di tano on.”

¹³Jadi ning si Kain ma tu TUHAN, “Madokdoktu do da uhuman i tu au, nada tarporsan iba.

¹⁴Dipaorot Ho do iba sian tano on, padaohon sian Ho dohot sian pangurupiMu. Mompas-ompas noma iba, nada adong bagas di tano on, jadi sanga ise na marsuo dohot iba bunuonna ma iba.”

¹⁵Tapi didok TUHAN ma, “Nada songon i. Muda adong halak na mamunu ho, gabe pitu hosa ma sintahon balosna.” Dung i dibaen TUHAN ma tanda di si Kain laho pabotohon tu sude halak na marsuo dohot ia, anso ulang dibunu ia.

¹⁶Jadi morot ma si Kain sian jolo ni TUHAN jana maringanan ma ia di tano na margoar “Nod” di Habincaran ni Eden.

¹⁷Adong do sada anak ni si Kain dohot dadaborunia, digoari ma i si Henokh. Dung i dipajongjong si Kain ma sada kota, jana digoari ia ma kota i mangihutkon goar ni anaknia i.

¹⁸Adong ma anak ni si Henokh na margoar si Irad. Si Irad on ma amang ni si Mekhuyael. Anak ni si Mekhuyael ma si Metusael jana si Metusael ma amang ni si Lamekh.

¹⁹Si Lamekh dua halak dadaborunia, si Ada dohot si Zila.

²⁰Ditubuhon si Ada ma si Jabal jana pomparan ni si Jabal ma bangso parmahan bope na maringanan di undung-undung.

²¹Angginia si Jubal goarna, i ma ama ni sude parmusik hasapi dohot parsuling.

²²Ditubuhon si Zila ma si Tubal Kain, i ma mambaen sude ragam ni parkokas na sian tumbaga dohot bosi. Iboto ni si Tubal Kain ma na margoar si Naamah.

²³Mandok hata ma si Lamekh tu angka dadaborunia i, “Ho Ada dohot ho Zila, tangihon tuson! Humatehon do sada doli-doli hara ni na nihantamnia au.

²⁴Muda pitu hosa disintakkon laho mambalos tu si Kain, angkon pitu pulu pitu hosa ma buaton muda adong na mamunu au.”

²⁵Maruli anak dope si Adam dohot dadaborunia sada nari. Ning si Hawa ma, “Dilehen Debata dope baya di au sada nari anak gonti ni si Abel na nibunu ni si Kain i.” I ma umbaen si Set dibaen ia goar ni anaknia i.

²⁶Adong ma anak ni si Set na margoar si Enos. Mamungka di hatiha i ma didok halak goar ni TUHAN Na Badia i muda maribadat tuSia.