Read Batak Angkola PAMUNGKAAN 40 Bible Online

PAMUNGKAAN 40 - Batak Angkola bible

PAMUNGKAAN 40

¹Dung adong sadia honok, mambaen hasalaan ma da tu raja dua halak parhobas ni raja Mesir, i ma pangurus ni siinumon dohot pangurus ni roti ni raja i.

²Gabe muruk ma raja i tu sidua halak parhobas i.

³Jadi dipahurungkon raja i ma halahi tu hurungan na di bagas ni kapala ni pangawal ni raja i, i ma inganan ni si Josep na tarhurung i.

⁴Honok do halahi na tarhurung i, jana dibaen kapala ni pangawal ni raja i ma si Josep gabe parkobas ni halahi.

⁵Sanoli, borngin-borngin rap marnipi ma pangurus ni siinumon dohot pangurus ni roti i. Jana adong be do arti ni nipi ni halahi i.

⁶Jadi di na ro si Josep mandapotkon halahi manyogotna i, songon na marsak ma idaon halahi.

⁷Jadi disapai ia ma, “Biasi songon i marsakmunu sadari on?”

⁸Alus ni halahi, “Na marnipi do hami, tapi nada adong halak dison na bisa patorangkon artina.” Ning si Josep ma, “Hum Debata do na mambaen tarpatorang jolma nipi. Patorang hamu ma jolo nipimunu i.”

⁹Didok pangurus ni siinumon i ma, “Adong ma di bagasan nipingki bona ni anggur.

¹⁰Mardangka tolu ma bonana i. Jadi dung martunas angka rantingna i, kombang ma bungana jana malamun ma batuna i.

¹¹Jadi di hatiha i, topet maniop mangkuk panginuman ni raja i au, jadi hubuat ma da batu ni anggur i jana huporo ma i tu panginuman ni raja i lalu hupasahat ma tusia.”

¹²Didok si Josep ma, “On ma astuanna: Dangka na tolu i, astuanna tolu ari.

¹³Di bagasan tolu ari on, paluaon ni raja i ma ho; ampunannia ma ho jana paulahonnia mangulahi tu jabatanmu na salpu i. Pasahatonmu ma mangkuk panginuman tu raja i songon na salpu i.

¹⁴Tapi pangidoanku, ingot au muda dung denggan ngolumu sanoli on. Ibo rohamu mida au, jana palalu ma antong pardangolankon tu raja i, jana laing pangidohon ma da anso dipalua ia au sian hurungan on.

¹⁵Harana anggo satutuna, na nitangko do da au sian luat ni halak Ibrani, dohot dison pe tehe di Mesir on, na so unjung do hubaen hajahatan sanga aha pe na mambaen au patut masuk hurungan.”

¹⁶Jadi dung diida pangurus ni roti i, songon na maroban paruntungan do astuan ni nipi ni siurus inumon i, didok ia muse ma tu si Josep, “Au pe marnipi muse do; songon na manjujung ampang ni roti do au tolu di ginjang ni ulungku.

¹⁷Di ampang i adong na marragam-ragam panganon di raja i, hape marroan ma angka unggas mangankon panganon i.”

¹⁸Dialusi si Josep ma, “On ma astuan ni nipimi: Na tolu ampang i, tolu ari do astuanna.

¹⁹Di bagasan tolu ari on, suruon ni raja i ma halak mamonggol ulumi jana gantungkononna ma pamatangmu di sada tiang, anso dipapangani angka unggas.”

²⁰Jadi di na marulang tahun raja i, i ma tolu ari dung i, mambaen pesta godang ma raja i di sude pagawenia; diparuar ia ma pangurus ni siinumon dohot pangurus ni rotinia i sian hurungan jana dioban ia halahi tu jolo ni sude pagawenia i.

²¹Dipaulak ia ma pangurus ni siinumon i tu karejonia humani.

²²Tapi anggo pangurus ni roti i, diuhum mate ma. Tarjadi ma sude songon na nidok ni si Josep i.

²³Tapi anggo pangurus ni siinumon i nanggo diingot ia be na masa tu si Josep — sandok, lupa ma ia tu si Josep.