Read Batak Angkola PAMUNGKAAN 41 Bible Online

PAMUNGKAAN 41 - Batak Angkola bible

PAMUNGKAAN 41

¹Dung salpu dua taon, marnipi ma raja Mesir, songon na jongjong ia di topi ni Batang aek Nil.

²Jadi tompu ma ruar sian batang aek i pitu lombu na mokmok marlinang idaon kulitna i, manigor manjampal ma di topi ni batang aek i.

³Dung i ruar muse ma da pitu nari lombu na asing; anggo on hum na marniang do jana hum holi-holi noma idaon. Jongjong ma angka lombu i di lambung ni angka lombu na mokmok-mokmok sinangkin di topi ni batang aek i.

⁴Dung i dipangan angka lombu na marniang i ma angka lombu na mokmok i. Dung i tarsunggul ma raja i na modom i.

⁵Dung tarpodom mangulahi, marnipi muse ma raja i. Songon na adong ma pitukamburir eme na porngis jana na matobang tubu sangkambona.

⁶Dung i tubu muse ma pitukamburir eme na asing na lambang jana ma markerut, mahiang dibaen haba-haba sian parhorsihan.

⁷Jadi dibondut burir ni eme na lambang i ma burir na porngis na pitu sinangkin. Dung i tarsunggul ma raja i jana diboto ia ma, hape na marnipi do ia.

⁸Jadi dung torang ari, marsak ma da roha ni raja i, gabe disuru ia ma anso dipio sude datu parelmu dohot halak na pistar na adong di Mesir. Jadi dipaboa ia ma nipinia i tu halahi; tapi sahalak pe nada adong na tarbaen patorangkon astuanna.

⁹Dung i didok pangurus ni siinumon i ma tu raja i, “Sadari on angkon mangoku ma au, jungada do hubaen hasalaan.

¹⁰Muruk do raja i di hatiha na salpu i tu pangurus ni roti dohot tu iba sandiri, jabat dipamasuk raja i hami tu hurungan na di bagas ni kapala ni pangawal ni raja i.

¹¹Di na saborngin rap marnipi do hami na dua, jana adong be do astuan ni nipinami i.

¹²Adong muse do disi sada doli-doli halak Ibrani rap dohot hami. Parhobas ni kapala ni pangawal i do bayo i. Hami caritohon ma nipinami i tusia, jadi dipatorang ia ma tu hami arti ni nipi i.

¹³Torang do antong tarjadi sude songon na nipajojornia i; i ma na nipasuang ni raja i iba mangulahi tu jabatanniba humani, dohot na niuhum mate ni raja i sipangurus ni roti i.”

¹⁴Jadi disuru alap raja i ma si Josep, jana manigor diparuar ma ia sian hurungan i. Dung sidung ia marpangkas dohot manggonti pakean, mangadop ma ia tu raja i.

¹⁵Ning raja i ma tusia, “Na marnipi do au, tapi nada adong umpe sahalak na malo patorangkon astuanna. Na nipaboa ni halak do tu au na malo ho patorangkon nipi.”

¹⁶Ninna si Josep ma mangalusi, “Nanggo au da rajanami, tapi Debata do na giot mangalehen hatorangan na tumbuk.”

¹⁷Jadi didok raja i ma, “Marnipi do au, songon na jongjong di topi ni Batang aek Nil.

¹⁸Jadi ruar ma da sian aek i pitu lombu na mokmok-mokmok jana na marlinang idaon kulitna i, jana manigor manjampali ma halahi di topi ni batang aek i.

¹⁹Dung i ruar muse ma pitu nari lombu na asing angka na marniang boti na songon holi-holi na nibalut ni huling-kuling sajo idaon. Inda jungada dope huida di tano Mesir on lombu na songon i niangna.

²⁰Dipangan lombu na marniang i ma sude lombu na mokmok sinangkin.

²¹Tapi laing songon i do niang ni angka lombu i. Jadi tarsunggul ma au.

²²Jadi marnipi ma au mangulahi, songon na huida pitukamburir eme na porngis boti na matobang, na tubu sangkambona.

²³Jadi tubu muse ma pitukamburir eme na lambang boti markerut hiang dibaen haba-haba na sian parhorsihan i.

²⁴Dibondut burir ni eme na lambang i ma burir ni eme na porngis sinangkin i. Ma hupaboa nipingki tu angka datu parelmu hape sahalak pe nada adong na malo patorangkonsa sanga aha astuanna.”

²⁵Jadi didok si Josep ma tu raja i, “Sarupa do astuan ni nipi na dua i. Ma dipaboa Debata tu raja i sanga aha na giot masa baenon ni Debata.

²⁶Anggo na nidok ni lombu na mokmok na pitu i, i ma pitu taon, jana pitukamburir eme na porngis i pe, laing pitu taon do na nidokna, sarupa do astuan ni i.

²⁷Lombu na pitu na marniang na ruar umpudi dohot burir ni eme na lambang i jana na markerut hiang dibaen haba-haba na sian parhorsihan i, i ma hamamasa ni haleon pitu taon honokna.

²⁸Songon na nidok i tu raja i — madung dipatidahon Debata tu raja i sanga aha na giot baenonNia.

²⁹Na giot ro ma tu joloan on pitu taon hamakmuran di tano Mesir on sude.

³⁰Salpu i ro muse ma pitu taon haleon, jana lupa ma sude tu sipitu taon na makmur i, hara ni santakna haleon potir i jabat gariang sude tano i.

³¹

³²Diulahi do nipi ni raja i jabat dua noli, artina na dung ditontuhon Debata do i jana manigor patuluson ni Debata ma i.

³³Jadi domu tusi, gumonan ma dipili raja i hian sahalak na pistar jana na bisuk anso dibaen raja i gabe kapala ni luat on.

³⁴Angkon laing angkaton ni raja i muse ma angka pagawe na asing jana dipasahat raja i ma tu halahi kuaso laho palagutkon saparlima sian sude suha ni eme salolot na pitu taon parnaek ni suha i.

³⁵Parentahon ma halahi laho palagutkon sude sipanganon salolot sipitu taon na denggan i jana paloas ma halahi palagutkon i di angka kota lalu manjagoisa.

³⁶Eme na nipalagut i ma muse gabe balanjo di haleon sipitu taon na giot masa i di tano Mesir on. Jadi muda songon i nibaen, nada mate tangkuraparon be rayat i.”

³⁷Satuju ma raja i dohot angka pagawenia i di sangkap ni si Josep i;

³⁸jadi didok raja i ma tu halahi, “Aropku nanggo dapot hita be da na dumenggan halakna sian si Josep on, harana ia do na nigohan ni Tondi Ni Debata.”

³⁹Jadi didok raja i ma tu si Josep, “Na nipaboa ni Debata do i sude tu ho, jadi tangkas ma di hami, ho do na umpistar dohot na umbisuk ulang sanga ise.

⁴⁰Huangkat ma ho gabe kapala di bagas godangku, dung i muse oloan ni rayatkon ma parentamu. Hum au noma di ginjang ni kuasomu.”

⁴¹“Jadi huangkat ma ho gabe gubernur di sude tano Mesir on,” ning raja i jana

⁴²dibuka raja i ma tintin na maruhir, sitempel ni harajaan, jana dipamasuk ia ma i tu jari-jari ni si Josep. Dipapakehon raja i muse ma tusia sada baju juba na sian linen na halus jana dipamasuk ia muse ma tu rungkungna i sada borgok sere.

⁴³Laing dipasahat raja i ma tu si Josep kareta harajaan nomor dua pakeonnia dohot pangawal hasangapan ni raja i pe mardalan ma di jolo ni kareta i, marsurak ma halahi, “Loas hamu dalan i! Paloas hamu dalan i!” Songon i ma si Josep diangkat gabe gubernur di tano Mesir sude.

⁴⁴Didok raja i ma tusia, “Au do raja — jana au ma mandok, bahaso na so tola sanga ise di tano Mesir on sude mambaen sanga aha anggo na so adong isin sian ho.”

⁴⁵Jadi dipanggoarkon raja i ma sada goar Mesir tu si Josep, i ma si Zafnat-Paaneah. Dilehen ia muse ma sada boru di si Josep na margoar si Asnat, boru ni si Potifera malim na di kota Heliopolis. Marumur tolu pulu taon ma si Josep di na mamungka ia karejo di raja ni halak Mesir i. Jadi kehe ma si Josep sian bagas godang ni raja i jana dibolus ia ma sude luat i.

⁴⁶

⁴⁷Di bagasan sipitu taon na makmur i, manaek ma sude suha ni tano marlobi-lobi.

⁴⁸Dipalagut si Josep ma sude eme i, disimpan ia ma i di kota-kota. Di ganop kota, dipalagut ia ma suha ni ladang na humaliang kota i.

⁴⁹Hara ni bahatna eme na nipalagutnia i, nada disuhat ia be, angke jabat songon bahat ni horsik na di laut.

⁵⁰Dompak so lalu tu haleon potir i, sorang ma dua anak ni si Asnat ripe ni si Josep i.

⁵¹Didok si Josep ma, “Madung lupa au dibaen Debata di sude pardangolanku dohot tu kahanggingku.” Jadi dibaen si Josep ma goar ni anaknia siangkaan i, “Si Manase.”[31]

⁵²Didok ia muse ma, “Dilehen Debata do angka dakdanak di au di hatiha marsak au,” jadi dibaen ia ma goar ni anaknia na paduahon i si Efraim.[32]

⁵³Jadi marujung ma sipitu taon na makmur na nidai ni Luat Mesir i.

⁵⁴Jadi ro ma haleon potir pitu taon, tumbuk tu na nidok ni si Josep i. Masa ma haleon di na satano on, tapi anggo di tano Mesir sude adong do panganon.

⁵⁵Jadi di na mamungka malean rayat ni Mesir i, ro ma halahi mangido panganon tu raja i. Jadi disuru raja i ma halahi tu si Josep jana disuru ma halahi mangoloi sanga aha na niparentahon ni si Josep tu halahi.

⁵⁶Mur rarat ma haleon tu sude luat. Jadi dibuka si Josep ma sude sopo jana digadis ia ma eme i tu halak Mesir.

⁵⁷Marroan ma halak sian na satano on tu Mesir laho manobusi eme sian si Josep, i ma hara ni santakna haleon potir i di sude inganan.