Read Batak Angkola PAMUNGKAAN 42 Bible Online

PAMUNGKAAN 42 - Batak Angkola bible

PAMUNGKAAN 42

¹Dung dibege si Jakob na adong eme di Mesir, didok ia ma tu angka dakdanaknia, “Biasi sai marsoan he hamu?

²Ma hubege adong eme di Mesir; kehe ma hamu tusi jana tobusi hamu ma eme i anso ulang mate so mangan hita.”

³Jadi kehe ma angkang ni si Josep na sampulu i laho manobusi eme tu Mesir.

⁴Tapi anggo si Benyamin na nitadohon ni si Josep i, nada dipatola si Jakob kehe rap dohot halahi, harana mabiar ia betak sai marmara anaknia i.

⁵Hara ni haleon potir na masa di Kanaan, gabe ro ma angka anak ni si Jakob rap dohot halak na asing manobusi eme di Mesir.

⁶Hara ni jabatan ni si Josep songon gubernur di Mesir, manggadisi eme ma ia tu halak na ro sian na satano on. Jadi di na songon i, ro muse ma angka angkangnia tusia jana marsomba ma halahi di jolonia.

⁷Disi diida si Josep angka angkangnia i, manigor ditanda ia do halahi, tapi dipaula ia ma songon na so nitandania halahi. Jadi disonggak ia ma halahi laho manyapai, “Sian dia do hamu?” “Na sian Kanaan do da hami laho manobusi panganon,” ning halahi mangalusi.

⁸Tapi haru pe ditanda si Josep angka angkangnia i, anggo halahi nada ditanda si Josep.

⁹Jadi taringot ma ia tu nipinia salaho tu halahi. Jana didok ia ma, “Na mamata-matai do da hamu on; na giot mamboto angka hagaleannami di luatnami on do umbaen na ro hamu tuson.”

¹⁰“Nada le tuannami,” ninna halahi. “Songon naposomu do hami ro tuson manobusi panganon.

¹¹Na martinadohon do hami on, tuan. Nanggo na mamata-matai hami, tapi halak na burju do hami.”

¹²Didok si Josep ma tu halahi, “Inda tutu i! Na giot manangkasi hagaleannami do umbaen na ro hamu tu luat on.”

¹³Ning halahi ma mangalusi, “Dua bolas halak do hami martinadohon tuan, na saama do hami, jana di Kanaan do amanta na umpompar hami. Anggo sada madung jumolo sian hami jana sianggian i rap dohot amanta do saonnari.”

¹⁴“Jadi tutu do na hudok i,” ning si Josep mangalusi. “Tutu situtu do na mamata-matai hamu.

¹⁵Songon on ma i, huuji ma jolo hamu: Husumpahon ma mangasahon goar ni raja i, bahaso na so tadingkononmunu luat on anggo so jolo ro tuson anggimunu na sada nari i.

¹⁶Kehe ma sahalak sian hamu mangalapsa. Ditahan ma na asing i lopus tangkas hatamunu i na tutu. Anggo inda, mangasahon goar ni raja i, na mamata-matai do hamu!”

¹⁷Dung i dipamasuk ia ma halahi tu bagasan hurungan tolu ari honokna.

¹⁸Di ari patoluhon didok si Josep ma tu halahi, “Na burju do au mangoloi Debata, jana paluaonku do hosamunu dohot sada sarat.

¹⁹Anso tangkas binoto na burju hamu, angkon tinggal do sahalak sian hamu di hurungan on; na asing i, padiar ma mulak maroban eme na nitobusanmunu i tu dongan sabagasmunu na haleon i.

²⁰Dung i oban hamu ma sianggianmunu i tu au. I ma tandana na tutu na nidokmunu i, jadi nada mate uhumanku be hamu.” Jadi satuju ma halahi di usul i.

²¹Jadi mangkatai ma halahi sama halahi, “Bia do saonnari, mangae ma hita balos ni hasalaanta na tabaen maradopkon angginta na salpu i, taida do sanga na bia dangolna dihilala ia na mangido tolong ia tu hita, hape nada taampirkon. Hara ni i do umbaen na dangol taononta saonnari.”

²²Didok si Ruben ma, “Na so hudokkon dehe lakna na baru on tu hamu, ulang tabaen na jat tu angginta i? Hape nada ditangihon hamu. Jadi manginona tu hita ma saonnari parmatenia i.”

²³Mangarti do si Josep hata ni halahi i, tapi nada diboto halahi na niboto ni si Josep hata ni halahi i, harana mamake juru bahasa do halahi manghobari.

²⁴Ditadingkon si Josep ma halahi, tangis ma ia. Dung tarbaen mangulahi manghobari, diulahi ia ma mandapotkon halahi, jana dipiohon ia ma si Simeon, disuru ia ma na manambat si Simeon di jolo ni halahi sude.

²⁵Diparentahon si Josep ma anso diisi angka harung ni angkangnia dohot eme, jana hepeng ni halahi i pe dipaulak mangulahi tu bagasan ni angka harung i. Dohot muse anso dilehen panganon di halahi balanjo di dalan. Dipatulus do sude parentania i.

²⁶Dung i dibobani angka angkang ni si Josep i ma eme na nitobusan ni halahi tu halode ni halahi, lalu kehe ma halahi sian i.

²⁷Jadi diparbornginan ni halahi, adong ma sahalak sian halahi na mambuka harung ni eme laho mangalehen mangan halodenia. Diida ia ma hepengnia i di ginjang ni eme i.

²⁸“Ligi da, adong indon di harungkon,” ning ia tu dongan saamania i. “Dipaulak do hepengki.” Gabe heput ma roha ni halahi jana marsisapa-sapaan ma halahi sama halahi hara ni biarna, “Aha ma ulaning na nibaen ni Debata tu hita?” ning halahi.

²⁹Jadi dung lalu halahi tu Kanaan, dicaritohon halahi ma sasude pangalaman ni halahi i tu amang ni halahi, ninna halahi ma,

³⁰“Kasar do pangkuling ni gubernur ni halak Mesir i tu hami jana didok ia do hami na mamata-matai tu luat i.

³¹Jadi hami alusi ma, ‘Halak na jujur do hami, jana nada mata-mata hami.

³²Jana dua bolas halak do hami saama tapi ma jumolo sada, tapi anggo sianggian i rap dohot amanta do di Kanaan.’

³³Dialusi gubernur i ma, ‘Songon on ma i anso huboto sanga na tutu hamu halak na burju: Angkon tading do sahalak sian hamu rap dohot au; na asing i tola do mulak laho maroban eme i tu dongan sabagasna na male-malean i.

³⁴Oban hamu ma sianggianmunu i tu au. Baru pe dung i anso huboto na so tutu hamu ma mamata-matai tapi halak na burju do. Hupaulak pe anggimunu i tu hamu jana tola ma hamu maringanan dison laho marjagal.’ ”

³⁵Jadi dung i, diparumar halahi ma angka harung ni halahi, dapot halahi ma disi dompet ni halahi be, marisi hepeng; jadi disi diida halahi hepeng i, gabe mabiar ma halahi dohot amang ni halahi i.

³⁶Jadi didok amang ni halahi i ma, “Na por dehe rohamu agoan au di anakki sude? So adong be si Josep; si Simeon pe so adong be, saonnari si Benyamin muse noma na giot buatonmunu. Di au do da na dangolna!”

³⁷Jadi didok si Ruben ma tu amangnia i, “Muda nada huoban mangulahi si Benyamin, matehon ma anakki na dua i. Pasahat ma da ia tu au, huoban do ia mangulahi.”

³⁸Tapi didok si Jakob ma, “Nada! Na so tola si Benyamin kehe rap dohot hamu; ma mate angkangnia i, hape saonnari hum ia sajo noma na tading. Ulang-ulang betak na marmara do ia lalu di tonga dalan i. Au ma matobang, jana hamarsahan na nialapanmunu on ma patibu mate au.”