Read Batak Angkola PAMUNGKAAN 43 Bible Online

PAMUNGKAAN 43 - Batak Angkola bible

PAMUNGKAAN 43

¹Mur jebu ma haleon i di Kanaan,

²jana dung abis dipangan pangisi ni bagas ni si Jakob eme na nioban sian Mesir i, didok si Jakob ma tu angka dakdanaknia i, “Ulahi hamu ma da kehe tu Mesir, jana tobusi hamu ma eme i di hita.”

³Jadi didok si Juda ma tusia, “Pir do da amang pandok ni gubernur i tu hami; na so tola do hami mangadop tusia anggo na so hami oban do angginami i.

⁴Anggo diloas amang do angginami i dohot hami, ra do hami kehe manobusi panganonta tusi.

⁵Tapi anggo na so niloas ni amang do dohot si Benyamin, nanggo ra hami kehe; harana madung didok gubernur i hian, na so tola hami mangadop tusia anggo na so dohot do angginami i.”

⁶Didok si Jakob ma, “Biasi pasusa-susaonmunu au. Aha pola paboa-boaonmunu lakna na adong dope sada nari anggimunu?”

⁷Dialusi halahi ma, “Na torus do disapa-sapai halahi taringot tu hami dohot taringot tu isi ni bagasta, ‘Mangolu dope amanta hamu? Adong dope anggimunu halaklahi na asing?’ ninna halahi. Tontu angkon alusannami do sude sapa-sapania i. Na hami pikir hian ma he lakna angkon suruonnia hami maroban angginami i?”

⁸Jadi didok si Juda ma tu amangna i, “Padiar ma da kehe dakdanak i rap dohot au, anso manigor kehe hami. Jadi angkon songon i noma anso ulang adong sian hita na jabat mate tangkuraparon.

⁹Ngolungkon ma hupasahat jaminanna jana tu au ma dituntut amang tanggung jawab salaho tu hahorasan ni dakdanak i. Muda nada horas ia huoban mulak, au ma mananggung hasalaan lopus mate au.

¹⁰Sugari nada songon i lolotna tapainte-inte, ma pola dua noli mulak tarbaen.”

¹¹Jadi didok amang ni halahi i ma, “Muda na angkon songon i ma jadina, antong oban hamu ma suha na dumenggan sian luat on di bagasan harungmunu i baen silua di gubernur i; baen hamu ma miak na huskus saotik, aer ni loba saotik, parmasak, lajo dohot batu ni barangan.

¹²Oban hamu muse ma hepeng dua noli lompit sian na parjolo i, harana angkon paulahonmunu do hepeng na di bagasan harungmunu i. Betak na pasambar do i na salpu i.

¹³Oban hamu ma anggimi jana tibu ma hamu mulak.

¹⁴Sai ibo ma roha ni gubernur i mida hamu dibaen Debata Na Gumogo i anso ra ia paulakkon si Benyamin dohot si Simeon tu hamu. Anggo salaho tu au, muda na angkon sai na magoan ma di angka dakdanakki, padiar ma agoan au di halahi.”

¹⁵Dung i dioban angka angkang ni si Josep i ma angka silua i dohot hepeng sidua lompit i bahatna, jadi kehe ma halahi tu Mesir rap dohot si Benyamin. Dung lalu halahi disi, mangadop ma halahi tu si Josep.

¹⁶Disi diida si Josep si Benyamin rap dohot angka angkangnia i, didok ia ma tu parkobas na mangapalai sude na di bagasnia i, “Oban ma halahi masuk tu bagasku. Mangan arian di bagas do halahi rap dohot au; jadi sambol ma sada pahan-pahanan, lompa ma i.”

¹⁷Dipatulus parkobas i ma songon dia na niparentahon tusia jana dioban ia ma angka kahanggi ni si Josep i tu bagas ni gubernur i.

¹⁸Disi dioban halahi masuk tu bagas ni gubernur i, mabiar be ma halahi jana marpikir, “Hara ni hepengta na nipaulakna i di bagasan angka harungta i di na ro parjolo hita tuson, hara ni i do umbaen na dioban hita tu bagas on. Hantamon ni halahi ma hita tompu, buaton ni halahi ma angka halodenta i jana baenon ni halahi ma hita gabe naposona.”

¹⁹Jadi hara ni i, didok halahi ma tu kapala ni pangisi ni bagas i di lambung pintu ni bagas ni si Josep i,

²⁰“Mangido maap ma hami tuan, ma jungada hami ro tuson manobusi panganon.

²¹Di na mamasang bandar hami di pardalanannami laho mulak, hami buka harungnami i, jana dapot hami ma di bagasan harung i hepengnami be — sude hepengnami i disi. Saonnari hami oban do sude mulak tu hamu.

²²Tamba ni i hami oban muse do hepeng panobusi panganon mangulahi. Na so hami boto do sanga ise na pamasukkon hepengnami i mangulahi tu bagasan harungnami i.”

²³Didok parhobas i ma, “Ulang pola sak rohamunu disi. Ulang hamu mabiar, tontu na nipamasuk ni Debata do i mangulahi, tu bagasan harungmunu i, i ma Debata na nisomba ni amangmunu i. Na dung hujagit do garar ni ememunu i.”

²⁴Dung i dioban ma si Simeon tu halahi, jana ditaruhon ia ma halahi tu bagas. Dilehen ia ma aek pamasu ni pat ni halahi, dohot ruput di halode ni halahi.

²⁵Dung i diparade halahi ma silua ni halahi i na giot pasahaton tu si Josep muda ro ia arian i, harana madung dipaboa hian tu halahi, na giot rap halahi mangan arian dohot ia.

²⁶Dung lalu si Josep tu bagas, dioban halahi ma angka silua i tu bagasan jana marsomba ma halahi tu si Josep laho pasahatkonsa.

²⁷Disapai si Josep ma sanga na horas-horas do halahi, jana didok ia ma, “Madung dibaritahon hamu tu au taringot tu amanta hamu na dung matobang i — bia do baritania? Mangolu dope he ia, jana horas dope?”

²⁸Dialusi halahi ma, “Anggo amanta hami naposomi, laing mangolu dope jana horas do ia.” Jadi marsomba ma halahi tusia.

²⁹Disi diida si Josep si Benyamin angginia i, didok ia ma, “On ma he anggimunu sianggian na nidokmunu i tu au? Sai dipasupasu Debata ma da ho anakku,” ning ia.

³⁰Gurgur ma holong ni roha ni si Josep mida angginia i. Jabat giot so tartahan ia be mangarajai dirinia, jadi manigor kehe ma ia masuk tu kamarnia, tangis ma ia disi.

³¹Dung i marsuap ma ia, ruar ma sian kamarnia i, dipapir ia ma rohania jana disuru ia ma paradehon panganon.

³²Asing ma si Josep dioloi di sada meja na inding, jana di meja na asing ma angka kahangginia i. Angka halak Mesir na dohot mangan disi pe dioloi di meja na asing muse do, angke layas do dihilala halahi muda rap mangan dohot halak Ibrani.

³³Angka kahanggi ni si Josep i di meja na paadop-adop dohot meja ni si Josep ma dibaen, marjojor sian na tumobang lalu tu sianggian. Di na niida ni halahi pangatur ni parjuguk ni halahi i, homang-komang ma halahi marsiligian.

³⁴Sian meja ni si Josep ma dibaen panganon ni halahi, jana tu si Benyamin lima noli umbahat dibaen pangoloi i sian angka angkangna i. Jadi mangan minum ma halahi rap dohot si Josep lopus butong be.