Read Batak Angkola PAMUNGKAAN 44 Bible Online

PAMUNGKAAN 44 - Batak Angkola bible

PAMUNGKAAN 44

¹Jadi laing diparentahon si Josep muse ma tu kapala ni pangisi ni bagas i, “Isi hamu ma angka harung ni halahi dohot eme i sanga na sadia na tarboan halahi, jana pamasuk mangulahi hepeng ni halahi tu bagasan harungna be, di ginjang ni eme i.

²Pamasuk muse panginumanku perak i tu bagasan harung ni anggi ni halahi siampulan i dohot hepeng panggarar ni emena i.” Dibaen parkobas i ma songon na niparentahon tusia.

³Ancogotna i sogot dope, dipabuat si Josep ma angka kahangginia i rap dohot angka halodena i.

⁴Dompak so sadia dao dope halahi sian kota i, didok si Josep ma tu kapala ni pangisi ni bagasnia i, “Ompoti jolo kojar halahi. Muda dung dapot, dok ma tu halahi, ‘Biasi dibaen hamu na jat balos ni na denggan?

⁵Biasi ditangko hamu piala perak ni tuanku? Panginumannia do piala i dibaen ia dohot panjamaan laho martondung do i. Na mambaen hajahatan godang do hamu!’ ”

⁶Dung lalu parkobas i mandapoti angka kahanggi ni si Josep i, didok ia ma songon na nidok ni si Josep i tu halahi.

⁷Dialusi halahi ma tusia, “Na mandok bia dehe tuan i ulaning? Hami sumpahon ma, na so adong hami baen songon i!

⁸Diboto tuan i do, salangkan hepeng na dapotnami di harungnami di ginjang ni eme i, madung hami paulak tu tuan i sian Luat Kanaan. Jadi dia ma patut hami tangko muse perak sanga sere ni tuanmunu i!

⁹Betak sai tardapot tuan i barang i di sada halak sian hami, padiar ma mate niuhum, jana hami on pe padiar ma gabe hatobanmu.”

¹⁰Didok parkobas i ma, “Satuju! Tapi hum na mambuat piala i sajo pe da gabe hatobanku, anggo na asing i tola ma kehe.”

¹¹Jadi diompoti halahi ma marsipaijur harungna be tu tano jana marsibuka ma.

¹²Tangkas ma dipareso parkobas ni si Josep i, dipungka ia ma sian harung ni siangkaan lalu tu harung ni sianggian i, jana dapot ma piala i di bagasan harung ni si Benyamin.

¹³Jadi marsisibak bajuna be ma angka angkangna i hara ni marsakna. Marsimuat halodena be ma halahi laho mulak tu kota i mangulahi.

¹⁴Disi lalu si Juda dohot kahangginia i tu bagas ni si Josep i, laing di bagas i dope ia, gabe marsomba-somba ma halahi di jolonia.

¹⁵Jadi didok si Josep ma, “Na mambaen bia dehe hamu? Adong he na so diboto hamu do, anggo songon au on halakna, tarbaen au do da padapotkon hamu sian na martondung.”

¹⁶“Aha be na tardok hami tu hamu, tuannami?” ning si Juda mangalusi. “Bia ma baenonnami mandok i na so tutu? Bia ma baenonnami mandok na tigor hami? Madung diungkap Debata hasalaannami i! Saonnari anggo hami, naposomu noma, jadi nanggo hum ia na tardapot maroban piala ni tuan i.”

¹⁷Ning si Josep ma, “Ah, nada le! Nada ra au mambaen songon i! Hum na maroban piala i sajo do na gabe hatobanku. Anggo hamu na asing i, bolas do mulak tu amanta hamu. Horas ma!”

¹⁸Jadi ro ma si Juda tu jolo ni si Josep jana didok ia ma, “Ampun tuannami, paloas au jolo mandok hata tu tuan i. Ulang muruk tuan i tu au; sarupa do huetong tuan i dohot raja i sandiri.

¹⁹Madung disapai tuan i tu hami sanga na adong dope amangnami sanga kahangginami na asing.

²⁰Jadi hami alusi, ‘Adong dope amangnami madung matobang situtu; jana angginami pe adong dope sada nari na sorang dung matobang amanami i. Anggo na manadohon angginami i, madung jumolo, jadi anggo saonnari hum ia sajo noma na mangolu sian halahi na saina; jana na holongan do roha ni amangnami i mida ia.’

²¹Na nisuru ni tuan i do anso hami oban ia tuson, anso marsuo ia dohot tuan i.

²²Jadi hami alusi do, ‘Nada tartadingkon dakdanak i amanta; muda ditadingkon ia amanta, mate noma amanta i.’

²³Dung i laing didok tuan i na so tola be hami ro mangadop tu tuan i anggo so hami oban angginami i.

²⁴Jadi di na mulak hami tu amangnami, hami paboa do sude na nidok ni tuan i.

²⁵Dung i disuru amangnami i do hami mangulahi manobusi panganon tuson.

²⁶Hami alusi tusia, nada tarbaen hami kehe tusi; na so tola mangadop tu gubernur i anggo nada rap dohot hami sianggiannami i.

²⁷Hape didok amanta hami i do, ‘Diboto hamu do, hum on do anak na nitubuhon ni ripengku si Rahel.

²⁸Madung ditadingkon na parjolo i au. Na niparsurage ni binatang panyoro do i, angke nada huida be ia mamungka sian parkehenia i.

²⁹Jadi muda laing buatonmunu dope anakku na paduahon on sian au, jana masa ma parmaraan tusia, tontu hamarsahan na nibaenmunu on tu au, i noma na maroban au tu hamatean; au ma matobang.’ ”

³⁰“Jadi hara ni sudena i, tuannami,” ning si Juda tu si Josep, “Muda mulak hami tu amanta hami so dohot dakdanak i, anggo amangnami i, mate noma i. Tarihot tu dakdanak i noma hosa ni na tobang-tobang i; boti hara ni tobangnia, patibu mate noma ia baenon ni hamarsahan na hami baen on tusia.

³²Sada muse, na dung hupasahat do ngolungku tu amanta hami songon jaminan ni dakdanak on. Ma hudok tusia; muda nada huoban mulak dakdanak on tusia, au ma mananggung sala lopus mate au.

³³Jadi na mangelek-elek ma au tu tuan i, au ma tading dison gabe naposo ni tuan i gonti ni anggingki, anggo ia padiar ma mulak rap dohot angka angkangna i.

³⁴Bia ma he pambaenku mulak tu amanta hami anggo so dohot do anak i rap mulak dohot au? Nanggo tahan au paligi-ligi sitaonon i songgop tu damang i.”