Read Batak Angkola PAMUNGKAAN 45 Bible Online

PAMUNGKAAN 45 - Batak Angkola bible

PAMUNGKAAN 45

¹Nada tartahan si Josep be pangkilalaannia di jolo ni angka naposonia i. Jadi disuru ia ma halahi morot sian inganan i anso tarbaen ia paboahon tu angka kahangginia i, sanga ise do ia satutuna.

²Dung ruar sude naposonia i, tangis ma si Josep mangandung sagogonia, pajojorkon pardangolannia jabat dibege halak Mesir ia na tangis i jana dipaboa halahi ma pangalaho i tu raja.

³Didok si Josep ma tu kahangginia i, “Si Josep do da au. Laing mangolu dope he amanta?” ning ia. Tapi dung dibege angka kahangginia i songon i, gabe sun ma biar ni halahi gabe nada taralusi halahi be bagi aha.

⁴Jadi didok si Josep ma tu halahi, “Ro ma hamu tuson.” Diihutkon halahi ma, jana didok ia ma muse, “Si Josep na nigadismunu i do da au tu Mesir on.

⁵Ulang pola mabiar hamunu sanga manyolsoli hamu hara ni na nigadismunu i au. Satutuna, Debata do da na manongos au tuson parjolo sian hamu laho mangoloi dohot paluahon bahat halak.

⁶Taon paduahon dope haleon on, jana adong dope lima taon nari na so tarbaen halak mamangkur sanga manyabi.

⁷Ma ditongos Debata au tuson manjoloi hamu laho paluahon hamu dohot dalan hahomangan na songon on, boti anso adong na manjamin hatorkisanmunu dohot ginjang ni umurmunu.

⁸Jadi anggo satutuna, nanggo hamu da na manongos au tuson, tapi Debata do. Madung dibaen Debata au gabe pagawe na pargincat di raja i. Dipasahat do tu au sude kuaso na di luat on; au do na markuaso di tano Mesir on sude.

⁹Saonnari, tibu ma hamu kehe tu damang jana dokkon hamu ma tusia, on ma na nidok ni si Josep anakmi, ‘Madung dibaen Debata au gabe parkuaso di sude tano Mesir; ro ma ho, ulang be palambat-lambat.

¹⁰Di Luat Gosen ma damang maringanan anso donok tu au — disi ma damang, anak dohot pahompumunu sude, biri-biri, hambeng, lombu dohot sandok sinadongan ni amang.

¹¹Muda di Gosen amang maringanan, tarbaen au ma pature-turehon ho amang. Adong dope lima taon nari haleon potir on, jana jagohononku ma anso ulang mate so mangan damang, dohot keluargamu bope sude pahan-pahanan ni amang.’ ”

¹²Didok si Josep dope muse, “Saonnari ligi hamu ma, dohot ho Benyamin, tutu situtu do au si Josep.

¹³Paboa ma tu amanta sanga songon dia godang ni kuasongku di Mesir on jana caritohon ma tusia sandok na niidamunu. Jadi manigor oban hamu ma amanta tuson.”

¹⁴Dihaol ia ma si Benyamin angginia i tangis ma ia; si Benyamin pe antong tangis ma ia di na nihaolnia si Josep.

¹⁵Dung i tangis dope ia, dihaol ia ma sude angkangnia i jana diummai ia. Dung i baru ma manghata-hatai halahi dohot ia.

¹⁶Di na tarboto tu bagas godang ni raja bahaso na ro angka kahanggi ni si Josep, jop do roha ni raja i dohot angka pagawenia i.

¹⁷Jadi didok raja i ma tu si Josep, “Dokkon ma tu angka kahanggimi anso dimuat halahi angka halode ni halahi i anso mulak halahi tu Kanaan.

¹⁸Tonahon ma tu halahi anso dialap halahi amanta dohot dongan sabagas ni halahi, anso mangulahi ro halahi tuson. Hulehen pe di halahi tano na dumenggan di Mesir on, jana dapot halahi ma tuk ngolu ni halahi sian suha ni tano i.

¹⁹Laing tonahon ma tu halahi anso maroban angka kareta sitenggeton ni ripe dohot angka dakdanak ni halahi na menek-menek, boti laho mangalap amanta.

²⁰Indangkon pola sayang roha ni halahi mida angka barang-barang sitadingkonon, angke gabe halahi do nampunasa sandok barang-barang na dumenggan di Mesir on.”

²¹Dipatulus angka anak ni si Jakob ma sude tona i. Jadi dipasahat si Josep ma tu halahi angka kareta songon na nitonahon ni raja i songon i dohot bohal, balanjo di dalan.

²²Diganopi ia muse ma halahi sude sapasang be pakean na imbaru, tapi anggo tu si Benyamin dilehen ia do tolu ratus hepeng perak dohot pakean na imbaru lima pasang.

²³Ditongoskon ia ma tu amangnia i sampulu halode na maroban angka barang-barang na dumenggan sian Mesir, dohot sampulu nari halode na maroban eme, roti dohot panganon na asing panganonnia di dalan laho ro tu Mesir.

²⁴Jadi dipabuat ia ma angka kahangginia i mangulahi jana di na kehe i halahi didok ia ma tu halahi, “Ulang hamu marbadai di dalan i da!”

²⁵Ditadingkon halahi ma Mesir jana mulak ma halahi tu Kanaan mandapotkon si Jakob amang ni halahi i.

²⁶“Mangolu dope si Josep!” ning halahi ma tusia. “Ia do parkuaso ni sude Mesir!” Umbege barita i, songon na tarsonggot ma si Jakob, jana nada porsaya ia di halahi.

²⁷Tapi dung dicaritohon halahi sude na nidok ni si Josep tu halahi, jana dung diida ia angka kareta na nitongoskon ni si Josep i laho mangalap dohot maroban ia tu Mesir, torang ma rohania sian na tarsonggot i.

²⁸“Hape na mangolu dope si Josep anakki baya!” ning ia. “Hum on noma giotku! Angkon kehe do au anso huida ia painte so mate au.”