Read Batak Angkola PAMUNGKAAN 5 Bible Online

PAMUNGKAAN 5 - Batak Angkola bible

PAMUNGKAAN 5

¹On ma goar ni pomparan ni si Adam. (Di na manompa jolma i Debata, songon Debata sandiri do dijadihon Debata halahi.

²Halaklahi dohot dadaboru do halahi ditompa Ia. Dipasupasu Ia do halahi jana digoari Ia ma halahi “Jolma”.)

³Dung marumur si Adam 130 taon, maruli anak halaklahi ma ia na suman tusia, gabe digoari ia ma i si Set.

⁴Dung i martamba dope umur ni si Adam 800 taon nari. Adong dope angka dakdanaknia na asing.

⁵Jana marumur ma ia 930 taon di parmondingnia.

⁶Di na marumur si Set 105 taon, adong ma anaknia na margoar si Enos.

⁷Dung i tamba dope umurnia 807 taon nari. Adong dope angka dakdanaknia na asing.

⁸Jana di na marujung ngolunia marumur ma ia 912 taon.

⁹Di na marumur si Enos 90 taon, adong ma anaknia si Kenan goarna.

¹⁰Dung i tamba dope umur ni si Enos 815 taon nari. Adong dope angka dakdanaknia na asing,

¹¹jana marujung ma ngolunia di na marumur 905 taon.

¹²Di na marumur si Kenan 70 taon, adong ma anaknia na margoar si Mahalalel.

¹³Tamba dope umur ni si Kenan 840 taon nari. Adong dope angka dakdanaknia na asing,

¹⁴jana jumolo ma ia di na marumur 910 taon.

¹⁵Di na marumur si Mahalalel 65 taon, adong ma anaknia na margoar si Jared.

¹⁶Dung i tamba dope umur ni si Mahalalel 830 taon nari. Adong dope angka dakdanaknia na asing,

¹⁷jana jumolo ma ia di na marumur 895 taon.

¹⁸Di na marumur si Jared 162 taon, adong ma anaknia na margoar si Henokh.

¹⁹Dung i tamba dope umur ni si Jared 800 taon nari. Adong dope angka dakdanaknia na asing,

²⁰jana marujung ma ngolunia di na marumur 962 taon.

²¹Di na marumur si Henokh 65 taon, adong ma anaknia na margoar si Metusalah.

²²Dung i mangolu di bagasan pardonganon dohot Debata ma si Henokh 300 taon honokna jana adong dope angka dakdanaknia na asing.

²³Marumur ma ia 365 taon.

²⁴Jana sai marpardonganon dohot Debata do ngolunia, dung i nada haidaan be ia, angke madung dibuat Debata ia.

²⁵Di na marumur si Metusalah 187 taon adong ma anaknia na margoar si Lamekh.

²⁶Dung i martamba dope umur ni si Metusalah 782 taon nari. Adong muse dope angka dakdanaknia na asing,

²⁷jana marujung ma ngolunia di na marumur 969 taon.

²⁸Di na marumur si Lamekh 182 taon adong ma anaknia.

²⁹Didok si Lamekh ma, “Dakdanak on ma na paluahon hita sian karejonta na dokdok on, i ma na manjama tano na dung niburaan ni TUHAN.” Hara ni i, digoari si Lamekh ma goar ni dakdanak i si Noak.

³⁰Dung i martamba dope umur ni si Lamekh 595 taon nari. Adong muse dope dakdanaknia na asing,

³¹jana jumolo ma ia di na marumur 777 taon.

³²Dung marumur si Noak 500 taon adong ma tolu anaknia, i ma si Sem, si Ham dohot si Jafet.