Read Batak Angkola PAMUNGKAAN 6 Bible Online

PAMUNGKAAN 6 - Batak Angkola bible

PAMUNGKAAN 6

¹Dung mur mamarpar jolma i di tano on jana sorang angka anak boru di halahi,

²diligi angka “anak ni Debata” ma bahaso na jeges do angka anak boru i. Gabe dibuat halahi ma anak boru por ni roha ni halahi be.

³Gabe didok TUHAN ma, “Nada Hupatola jolma i mangolu salolot-lolotna; angkon laing mate do halahi. Mamungka sian on, nada salpuan ni halahi be 120 taon.”

⁴Di hatiha i ma, dohot dung salpu ni i adong angka jolma raksasa di tano on; i ma pomparan ni angka dadaboru sian jolma dohot angka “anak ni Debata” i. Angka ulubalang na godang-godang do jolma raksasa i boti jolma na tarbarita di hatiha narobi.

⁵Di na nipamanat ni TUHAN, hape na sun do jahat ni jolma i sude di tano on, boti santak ni busuk ni angka pikiran ni halahi,

⁶manyosal ma TUHAN hara ni na dung nitompaNia halahi jana dibaen Ia maringanan di tano on. I noma hancit ni roha ni TUHAN,

⁷jabat didok Ia, “Huabiskon noma jolma na Hutompa on, dohot sude binatang bope angka unggas i, harana manyosal do Au manompa halahi.”

⁸Tapi anggo mida si Noak sonang do roha ni TUHAN.

⁹On ma barita ni si Noak. Adong do tolu anaknia, i ma si Sem, si Ham dohot si Jafet. Nada adong sala ni si Noak, jana hum sasada ia ma jolma na burju di hatihania i. Marpardonganan dohot Debata do ia di ngolunia.

¹¹Hape anggo angka na asing i sude do jungkat di parnidaan ni Debata jana sanga di dia pe hakejamon noma na masa.

¹²Ditatap Debata ma sude tano on jana diida Ia do hajahatanna dibaen madung sude ngolu ni jolma i jahat.

¹³Jadi didok Debata ma tu si Noak, “Madung putus di rohangKu, paujungonKu ma sude ngolu ni jolma. MatehononKu noma halahi, angke madung gok na satano on hajahaton ni halahi.

¹⁴Baen ma sada kapal di ho sian hayu na pir; baen ma angka bilikna di bagasan jana lampis ma dohot ter sian bagasan dohot sian ruar.

¹⁵Angkon adong ma ginjangna 133 meter baenonmu, bidangna 22 meter jana gincatna 13 meter.

¹⁶Martarup ma baen kapal i jana holang-holang ni tarup i tu dindingna i baen ma 44 sentimeter. Tolu tirket ma baen kapal i jana baen ma sada pintu di tonga-tonga ni bujurna i.

¹⁷ParoonKu ma aek na oto di tano on laho mamatehon sanga aha na mangolu, sude na di tano on angkon mate,

¹⁸tapi baenonKu ma padan dohot ho. Masuk ma ho tu kapal i dohot dadaborumi bope angka dakdanakmu rap dohot dadaboru ni halahi be.

¹⁹Pamasuk ma tu kapal i sada jantan dohot boru-boru sian sude ragam ni binatang dohot sian ragam ni unggas anso ulang dohot halahi mate.

²¹Boan muse ma sude ragam ni panganon di ho dohot di angka binatang i.”

²²Jadi dipatulus si Noak ma sandok na niparentahon ni Debata tusia.