Read Batak Angkola PAMUNGKAAN 7 Bible Online

PAMUNGKAAN 7 - Batak Angkola bible

PAMUNGKAAN 7

¹Jadi didok TUHAN ma tu si Noak, “Masuk ma ho tu kapal i rap dohot sude isi ni bagasmu; hum sasada ho ma Huida jolma na satano on na patuluskon hagiotKu.

²Boan muse ma pitu pasang sian ragam ni binatang na so haram, tapi anggo na haram tuk ma hum sapasang boanonmu sian ganop ragamna.

³Boan muse ma pitu pasang ganop ragam ni unggas. Baen ma songon i anso laing malua ganop ragam ni binatang dohot unggas sian hamamago i jana laing tarbaen mangulahi martamba halahi di tano on.

⁴Pitu ari nari paroonKu ma udan na so ra sumirsir opat pulu ari opat pulu borngin lolotna anso abis sude sandok na mangolu na Hutompa i.”

⁵Jadi dipatulus si Noak ma sanga songon dia na diparentahon ni TUHAN i tusia.

⁶Marumur 600 taon ma si Noak, di na ro aek na oto tu tano on.

⁷Masuk ma ia dohot dadaborunia i bope angka dakdanaknia dohot angka dadaboruna be tu kapal i paluahon diri ni halahi sian aek na oto.

⁸Sada jantan dohot sada boru-boru sian ganop binatang dohot unggas sanga na haram pe i sanga na so haram,

⁹marmasuhan ma tu kapal i rap dohot si Noak hombar tu parenta ni Debata.

¹⁰Dung pitu ari ro ma aek na oto i.

¹¹Di na marumur 600 taon si Noak, di ari pitu bolas bulan paduahon, mapultak ma sandok mata mual ni laut na bidang di toru ni tano jana sude pintu ni aek di langit mungkap ma,

¹²jana por ma udan di tano on opat pulu ari opat pulu borngin honokna.

¹³Laing di na sadari i ma si Noak dohot dadaborunia masuk tu kapal i rap dohot anaknia na tolu i, i ma si Sem, si Ham dohot si Jafet rap dohot dadaboru ni halahi be.

¹⁴Laing masuk muse ma rap dohot halahi sude ragam ni binatang na jinak sanga na riar pe, na menek dohot na godang bope sude ragam ni unggas.

¹⁵Sada ma i jantan dohot sada boru-boru sian ganop horong ni mahluk na mangolu na masuk tu kapal i rap dohot si Noak,

¹⁶hombar tu parenta ni Debata tusia. Dung i ditutup Tuhan ma pintu ni kapal i di pudi ni si Noak.

¹⁷Laing songon i ma aek na oto i manutupi tano on opat pulu ari honokna, jana manaek ma aek i lopus mumbang kapal i.

¹⁸Mur bagas ma aek i jana mumbang-umbang ma kapal i di ginjang ni aek i.

¹⁹Mur-mur bagas ma aek i jana dibonom ia ma lopus tu angka dolok na humincat pe.

²⁰Mur manaek dope aek i lopus disalpui 7 meter di ginjang ni puncu ni dolok.

²¹Marmatean ma sude na mangolu di tano i — angka unggas, binatang dohot angka jolma.

²²Sandok na humosa di tano, mate.

²³Dipatimpas Tuhan sandok na mangolu di tano on — jolma, binatang dohot unggas. Hum si Noak ma i na so mate dohot sude na rap dohot ia di kapal i.

²⁴Nada mar na sumurut aek i 150 ari honokna.