Read Batak Angkola 2 SAMUEL 19 Bible Online

2 SAMUEL 19 - Batak Angkola bible

2 SAMUEL 19

¹Adong ma na paboahon tu si Joab na sai tangis jana marsak Raja Daud hara ni si Absalom.

²Jadi muba hamonangan na di ari i gabe hamarsahan di sude tentara ni si Daud dung dibege halahi na ditangisi ni raja i do hape anaknia i.

³Martabuni ma halahi mulak tu kota songon tentara na dapotan hahaila hara ni na marlojong sian parporangan.

⁴Digupgupi raja i ma bohina jana mangangguk mangandungi, “O anakki! Anakku si Absalom! Si Absalom anakki!”

⁵Kehe ma si Joab mangadop tu raja i jana didok ia ma, “Sadari on dipaila raja i do parangan ni raja i — halahi do paluahon hosa ni raja i, hosa ni sude anak, hosa ni boru, ripe dohot rading ni raja i.

⁶Dihaholongi raja i ma antong angka jolma na magigi mida raja i, hape goyak roha ni raja i di angka na manghaholongi raja i! Jadi torang do dipatidahon raja i na so marastuan angka komandan dohot angka tentara ni raja i di raja i sandiri. Mur marmoga-moga muse dope raja i sugari sura laing mangolu muse si Absalom jana hami sude mate!

⁷Jongjong ma nian sugari raja i jana haruar laho pasonangkon roha ni tentara ni raja i. Husumpahon ma mangasahon TUHAN, anggo na so haruar do raja i, laing di bagasan borngin on nada adong be hum sahalak pe na mandongani raja i. I dope parmaraan na jumorbut sialaman ni raja i salolot mangolu.”

⁸Dung i jongjong ma raja i jana haruar, lalu juguk di lambung ni pintu horbangan i. Tarbege ma tu angka parangannia na disi ia, dung i marroan ma halahi sude mangadop. Jadi anggo tentara ni Israel madung maporus jana marmulahan tu bagasna be.

⁹Masa ma parsalisian di tonga-tonga ni sude marga ni Israel. Didok halahi, “Raja Daud do na palua hita sian halak Pilistin dohot na paluahon hita sian angka musu na asing, hape saonnari maporus do ia sian si Absalom jana ditadingkon luat on.

¹⁰Tamiahi si Absalom gabe raja, hape ma mate ia di parporangan. Biasi nada adong hum sahalak pe na marusaho maroban mulak Raja Daud?”

¹¹Lalu muse do pandohan i tu Raja Daud. Jadi gabe disuru ia ma Malim Zadok dohot Malim Abyatar manyapai angka pamimpin ni Juda songon on, “Biasi gabe hamu umpudi mangalo-alo dohot mandongani raja i mulak tu bagas godangnia i?

¹²Hamu do nian kahanggi ni raja i dohot ale-alena. Biasi do gabe hamu parpudi mangido mulak raja i?”

¹³Laing disuru raja i muse dope halahi mulak tu si Amasa songon on, “Nada he donganku ho? Mamungka saonnari rasmi ma ho huangkat gabe panglima ni tentarangku manggontihon si Joab. Sai dimatehon Debata au, muda nada hupatulus i!”

¹⁴Songon i ma dibaen si Daud umbaen na gabe tarbuat ia roha ni sude halak Juda lopus manongos tona halahi tu raja i, anso mulak mangulahi tu bagas godang rap dohot sude pagawenia.

¹⁵Dung i kehe ma raja i jana lalu ma ia di Batang aek Jordan, jana di hatiha i madung lalu angka halak Juda di Gilgal laho mangalap raja i lalu mangawalsa manaripari batang aek i.

¹⁶Di hatiha i ro ma si Simei halak Benyamin, anak ni si Gera sian Bahurim, mandapotkon Raja Daud.

¹⁷Adong do saribu halak dongannia halak Benyamin. Jana si Ziba pe, naposo ni keluarga ni si Saul, dohot anaknia na lima bolas halak dohot naposonia ro do tu Batang aek Jordan mandapotkon raja i.

¹⁸Diurupi halahi ma pangisi ni bagas ni raja i taripar jana dipatulus halahi ma sude hagiotna. Di na laho taripar raja i di batang aek i, manungkap ma si Simei di jolonia mandok,

¹⁹“Sugari ulang ma nian tongtong dietong au na marsala. Sai lomo ma roha ni raja i manghalupahon sanga aha na hubaen di ari i dompak na kehe raja i manadingkon Jerusalem.

²⁰Madung torang di rohangku, na dung mardosa do au hape, jana hara ni i, sian tonga-tonga ni angka marga na maringanan di Utara au dope na parjolo situtu ro mangalo-alo raja i di ari sadari on.”

²¹Umbege i gabe didok si Abisai anak ni si Zeruya i ma, “Anggo si Simei indon patut do nian mate niuhum on, hara ni na mamurai tu raja na nipili ni TUHAN.”

²²Tapi mangkuling ma si Daud tu si Abisai dohot si Joab, mandok, “Ulang manganto-antoi hamu. Biasi arsahanmunu au? Di ari sadari on mulak au gabe raja di Israel, jana nada adong tola halak Israel na mate hona uhum.”

²³Dung i didok raja i ma tu si Simei, “Au ma mandok, na so mate hona uhum ho.”

²⁴Ro muse ma dohot si Mefiboset pahompu ni si Saul mangalo-alo raja i. Nada marbasu pat ia nada dicukur ia janggutnia, jana nada dibasu ia pakeannia mamungka sian na kehe Raja Daud manadingkon Jerusalem lopus mulak ia maroban hamonangan.

²⁵Dung lalu si Mefiboset sian Jerusalem laho mangalo-alo raja i, didok raja i ma tusia, “Mefiboset, biasi nada dohot ho rap dohot au di hatiha i?”

²⁶Dialusi ia ma, “Na marmulia, diboto raja i do na timpang au. Husuru do pangoloingku paradehon halode sitenggetonku laho mangihut tu raja i. Hape dihianati pangoloingki do au.

²⁷Dipatubu-tubu ia muse dope hata na so tutu maradopkon au tu raja i. Tapi songon surusuruan ni Debata do raja i. Antong dibaen raja i ma sanga aha na denggan di roha ni raja i.

²⁸Na patut do nian mate hona uhum baenon ni raja i sude koum sisolkot ni damang, tapi anggo au madung diisinkon raja i dohot mangan di bagas godang. Anggo saonnari nada puluk be au mangido bagi aha sian raja i.”

²⁹Dialusi raja i ma, “Nada porlu be dokkononmu sanga na aha be. Madung huputuskon do mambagi sandok arta ni si Saul di ho dohot si Ziba.”

³⁰Dung i dialusi si Mefiboset ma, “Antong padiar ma dibuat si Ziba i sudena. Madung sonang huhilala dibaen madung mulak raja i di bagasan hahorasan.”

³¹Ro muse do si Barsilai halak Gilead i sian Rogelim laho mangudurkon raja i manaripari Batang aek Jordan.

³²Ma matobang situtu si Barsilai, ma pola marumur ia salapan pulu taon. Na kayo situtu do ia jana salolot maringanan di Mahanaim raja i najolo, si Barsilai ma na paradehon sipanganon di raja i.

³³Didok raja i ma tusia, “Dohot ma ho rap dohot au tu Jerusalem, hupatuk pe sanoli on haporluanmu disi.”

³⁴Tapi dialusi si Barsilai ma, “Nada sadia honok be anggo au mangolu. Jadi aha be gunana dohot au mangihutkon raja i tu Jerusalem?

³⁵Ma marumur au salapan pulu taon jana nada adong be na pasonangkon di au. Nada huboto be daina sanga aha na hupangan sanga na huinum i, jana nada hubege be sora ni angka parende. Hum boban sajo noma au di raja i.

³⁶Nada patut au manjagit upa na songon i godangna. Hum manaruhon raja i nada pala saotik nari tu bariba ni Batang aek Jordan on sajo noma lungun ni rohangku.

³⁷Dung salpu i, paloas ma au rajanami mulak tu bagas dohot marujung di lambung ni kuburan ni simatobangku. Tapi on ma anakku si Kimham. Dipaloas raja i ma ia mangudurkon raja i jana dibaen raja i ma tusia sanga aha na denggan di roha ni raja i.”

³⁸Dialusi raja i ma, “Obanonku ma anggo si Kimham jana baenonku do tusia songon giot ni rohami, jana sude pangidoanmi tu au hupatulus do i.”

³⁹Dung i ditaripari si Daud ma dohot sude parangannia Batang aek Jordan. Dung i diumma si Daud ma si Barsilai jana dipasupasu ia. Dung i mulak ma si Barsilai tu bagasnia.

⁴⁰Sude tentara ni Juda dohot satonga tentara ni Israel rap do mangudurkon raja i manaripari batang aek i. Dung i torus ma raja i tu Gilgal jana rap ma si Kimham dohot ia.

⁴¹Dung i ro ma sude halak Israel mangadop tu raja i jana didok halahi ma tusia, “Ale rajanami, biasi dietong roha ni angka kahangginami halak Juda i hum halahi do na marhak laho mangalo-alo dohot mangudurkon raja i maradu sude dongan sabagas dohot parangan ni raja i manaripari Batang aek Jordan i?”

⁴²Dung i dialusi halak Juda i ma, “Tontu angkon songon i do antong, harana dongannami do raja i. Biasi gabe mangamuk hamu? Adong he na dung manjagit panganon hami sian raja i, sanga na dilehen ia silua di hami lakna?”

⁴³Dialusi halak Israel i ma, “Sampulu lompit haknami gumodang di raja i ulang hamu, haru pe dumonok hamu tu raja i. Biasi palayasonmunu hami? Ulang hamu lupa, hami ma parjolo mangusulkon anso dioban raja i mangulahi!” Tapi kumaras dope halak Juda i sian halak Israel jana nada ra halahi talu.