Read Batak Angkola 2 SAMUEL 2 Bible Online

2 SAMUEL 2 - Batak Angkola bible

2 SAMUEL 2

¹Dung i marsapa ma si Daud tu TUHAN, “Diparhagiot rohaMu do Tuhan kehe au tu Juda mangarajai sada kota na adong disi?” “Olo,” ninna TUHAN mangalusi. “Kota dia ma i?” ning si Daud manyapai. “Hebron,” ninna TUHAN.

²Jadi kehe ma si Daud tu Hebron rap dohot dadaborunia na dua i: Si Ahinoam na sian Jisreel, dohot si Abigail tading-tadingan ni si Nabal na sian Karmel i.

³Songon i dohot parangannia maradu dongan sabagasna be, laing rap kehe dohot si Daud. Lalu maringanan ma halahi di angka huta na humaliang Hebron.

⁴Dung i marroan ma halak Juda tu Hebron, jana dimiahi halahi ma si Daud gabe raja ni Juda. Dung dibege si Daud na dung ditanom halak Jabes na di Gilead bangke ni si Saul,

⁵disuru ia ma tusi maroban tona na mandok, “Sai dipasupasu TUHAN ma hamu, dibaen dipatuduhon hamu do na burju hamu tu rajamunu i marhite na mananom bangkena.

⁶Antong, sai dipatuduhon TUHAN ma holong ni rohaNa na manongtong i tu hamu. Au pe sai na denggan do baenonku tu hamu hara ni pambaenanmunu i.

⁷Sai gabe angka jolma na gogo-gogo ma hamu jana na togap mangalo. Madung marujung ngolu ni si Saul rajamunu i, jana madung dimiahi halak Juda au gabe raja ni halahi.”

⁸Anggo si Abner anak ni si Ner, i ma panglima ni tentara ni si Saul i madung maporus dohot si Isboset anak ni si Saul tu Mahanaim.

⁹Diparaja si Abner ma si Isboset di angka luat ni Gilead, Asuri,[1] Jisreel, Efraim dohot Benyamin, maradu sude Israel.

¹⁰Marumur opat pulu taon ma si Isboset di na dibaen ia gabe raja di Israel, jana dua taon ia mamarenta. Tapi anggo Marga Juda tongtong do mangihut tu si Daud,

¹¹jana di Hebron do si Daud mamarenta di Juda, pitu satonga taon honokna.

¹²Kehe ma si Abner sian Mahanaim tu kota Gibeon, didongani parangan ni si Isboset.

¹³Si Joab (si Seruya goar ni inangna) rap dohot parangan ni si Daud na deba nari, laing kehe tusi muse. Gabe marsiadopan ma halahi di ambar Gibeon. Si Abner dohot donganna juguk sabola on, si Joab dohot donganna di ipar na sada nari.

¹⁴Dung i didok si Abner ma tu si Joab, “Tole, tasuru ma angka parangan i marporang!” “Denggan,” ning si Joab mangalusi.

¹⁵Jadi ro ma dua bolas halak sian Marga Benyamin, sian si Isboset anak ni si Saul, jana dua bolas halak parangan ni si Daud.

¹⁶Marsitarik obuk ni alona be, lalu marsitiham butuha ni alona be, gabe rap mate ma halahi. Jadi gabe digoari ma inganan na di Gibeon i “Ladang Podang”.

¹⁷Dung i tarjadi ma parporangan, jana talu ma si Abner dohot tentara ni Israel i dibaen parangan ni si Daud.

¹⁸Disi do anak ni si Zeruya na tolu i, i ma si Joab, si Abisai dohot si Asael. Parlojong ni si Asael songon hipas ni hije.

¹⁹Jadi gabe dikojar ia ma si Abner, nada manyimbil tu siamun sanga tu siambirang.

²⁰Manaili ma si Abner tu pudi jana disapai ia ma, “Ho do si Asael i?” “Au ma da i,” ning ia mangalusi.

²¹“Ulang kojar au!” ninna si Abner. “Parajurit i ma da kojar sada jana buatkon sinjatana i!” Tapi torus ma si Asael mangkojar ia.

²²Didok si Abner sanoli nari tusia, “Ulang kojar au! Tarpaksa naron hubunu ho. Jadi bia dope baenonku annon manatap bohi ni angkangmu si Joab i?”

²³Jadi dibaen nada ra si Asael maradian, dihuatkon si Abner ma tu pudi tombaknia jana hona susuk ma butuha ni si Asael lopus taripar tombak i tu tangguruna i. Tinggang ma si Asael jana mate laing di inganan i. Maradian ma disi sude halak na marroan tu inganan hapayahannia i.

²⁴Tapi dipatorus si Joab dohot si Abisai ma mangkojar si Abner. Di na lusut mataniari lalu ma halahi tu tor Ama, na di Habincaran ni Giah tu sabola Halongonan Gibeon.

²⁵Mardomu muse ma disi dohot si Abner angka halak na sian Marga Benyamin, jana diatur halahi muse ma parangan ni halahi di sada tor.

²⁶Sian i pio-pio ma si Abner tu si Joab, “Angkon torus noma lakna hita marporang sapanjangna? Na so diboto ho dehe hum na paet do na nioban ni porang on? Kahanggimu, sabangso do hita. Sadia honok nari painteonmu anso ra ho mamarentahon parangan i anso mantak mangkojar hami?”

²⁷Dialusi si Joab ma, “Mangasahon Debata na mangolu i, sugari ma tibu ho mangkuling nangkin, tontu mulai sian na sogot madung tarik diri angka rayat i mangkojar angka kahanggina i.”

²⁸Dung i diombus si Joab ma sarune na gabe tanda di parangan i anso mantak mangkojar halak Israel. Jadi mantak ma porang i.

²⁹Saborngin maningting ma si Abner dohot parangannia i mardalan mamolus Rura Jordan lalu taripar di Batang aek Jordan i. Jana dung mardalan torus di ari na mangihut i, lalu ma halahi tu Mahanaim.

³⁰Dung i diantak si Joab ma mangkojar si Abner, dipalagut ia ma parangannia. Hapengani adong do sambilan bolas halak na mago sian halahi asing ni si Asael.

³¹Dibunu parangan ni si Daud do 360 halak tentara ni si Abner na sian Marga Benyamin.

³²Dung i dioban si Joab dohot parangannia i ma bangke ni si Asael i jana dikuburkon halahi ma i di kuburan ni horongnia di Betlehem. Mardalan ma halahi saborngin maningting, dung i lalu ma halahi di Hebron andostorangna i.