Read Batak Angkola 2 SAMUEL 21 Bible Online

2 SAMUEL 21 - Batak Angkola bible

2 SAMUEL 21

¹Dompak si Daud mamarenta, masa ma haleon potir tolu taon honokna. Dung i adong ma dijagit si Daud panogu-noguon ni TUHAN taringot tusi, jana didok TUHAN ma, “Anggo haleon i, i ma hara ni hasalaan ni si Saul dohot donganna sabagas, mate diuhumi halahi antong angka halak Gibeon.” (

²Nada halak Israel anggo halak Gibeon; masuk tu halak Amori siotik-otik do halahi. Na dung marjanji do halak Israel laho mangondihon halahi, hape digogo si Saul do laho mamusa halahi hara ni na manyarihon haporluan ni halak Israel dohot Juda.) Dung i dipio si Daud ma halak Gibeon i,

³jana disapai ia ma tu halahi, “Aha do na tarbaen au di hamu? Sai giot tobusonku do nian hasalaan na dibaen maradopkon hamu, anso mamasumasu hamu tu pusako ni TUHAN.”

⁴Dialusi halahi ma, “Anggo parsalisiannami tu si Saul dohot halahi sabagas nada tarsalosehon i dohot perak sanga sere, tapi hami pe nada giot bunuonnami sahalak pe sian bangso Israel.” Didok si Daud ma, “Antong anggo songon i, aha do giotmunu baenonku?”

⁵Alus ni halahi, “Anggo giot ni si Saul laho mamusa hami do nian lopus mago hami sian sude Israel.

⁶Antong pasahat ma tu hami pitu halaklahi sian pomparannia anso hami gantung di adopan ni TUHAN di Gibea, kota ni Raja Saul i sandiri.” “Antong denggan,” ning raja i, “hupasahat pe halahi.”

⁷Tapi hara ni na dung marsumpa be si Daud dohot si Jonatan, nada dipasahat si Daud be anggo si Mefiboset anak ni si Jonatan i.

⁸Si Armoni dohot si Mefiboset, i ma anak ni si Saul na nitubuhon ni si Rispa boru ni si Aya, halahi dua noma na nipasahat ni si Daud; songon i muse anak ni si Merab na lima i. Si Merab boru ni si Saul do i. Anak ni si Merab na lima i, i ma sian ripena si Adriel anak ni si Barsilai halak Mehola i.

⁹Dipasahat ma halahi tu halak Gibeon, jana rap mate di gantungan ma sipitu halak i di ginjang dolok di adopan ni TUHAN. Di ujung ni musim bunga ma dipadalan uhuman mate i, di na mamungka manggotil jabaure.

¹⁰Dung i dipahembang si Rispa rading ni si Saul i ma abit goni disia di ginjang batu inganan ni angka bangke i mambustang. Nada morot si Rispa sian i sian na mamungka sabion lopus tu haroro ni udan di musim nonat. Nada diloas ia angka unggas manghahua bangke i muda arian sanga diganggu binatang muda di borngin ni ari.

¹¹Di na adong paboahon tu si Daud na nibaen ni si Rispa i,

¹²kehe ma ia mambuat holi-holi ni si Saul dohot si Jonatan sian halak Jabes na di Gilead. (Na ditangko ni halahi do holi-holi i sian alaman godang ni kota na di Bet-San, disi do inganan panggantungan ni angka bangke i hian dibaen halak Pilistin dung talu si Saul dibaen halahi di Dolok Gilboa.)

¹³Dioban ma holi-holi ni si Saul i dohot si Jonatan sian i, lalu dipalagut ia muse dohot holi-holi ni sipitu halak na digantung i.

¹⁴Dung i ditanom ma holi-holi ni si Saul dohot si Jonatan dohot sipitu halak i di kuburan ni si Kis amang ni si Saul, di Zela na di Luat Benyamin. Dung sidung dipadalan sudena i hombar tu parenta ni raja i, dipatulus Debata ma tangiang ni halahi salaho tu luat i.

¹⁵Masa ma porang mangulahi antara ni halak Pilistin dohot halak Israel. Kehe ma si Daud rap dohot parangannia marporang mangalo halak Pilistin. Gabe loja ma si Daud di tonga-tonga ni parporangan i.

¹⁶Ro ma sada halak raksasa na margoar si Jisbibenob. Tombaknia sian loyang adong do marborat tolu satonga kilo. Laing sandang muse podangnia na imbaru jana pos do rohania tarbunu ia si Daud.

¹⁷Hape ro ma si Abisai anak ni si Zeruya i mangurupi si Daud. Diroro ia ma raksasa i lalu dibunu ia. Dung intap ni i, dipangidohon parangan ni si Daud i ma anso marjanji ia na so dohot be tu parporangan. “Raja i do arop ni roha ni Israel, ulang jabat magoan hami di raja i,” ning halahi.

¹⁸Masa muse ma porang mangalo halak Pilistin di Gob. Di parporangan i, dibunu si Sibkai halak Husa i ma sada halak raksasa na margoar si Sap.

¹⁹Di porang na mangihut mangalo halak Pilistin di Gob, dibunu si Elhanan anak ni si Jair na sian Betlehem ma si Goliat na sian Gat. Tiang ni tombak ni si Goliat i, sagodang ni balok ni partonunan.

²⁰Masa muse ma porang mangalo halak Pilistin di Gat. Adong ma disi sada halak raksasa na sai tagi-tagi marporang. Onom be jari-jari ni tanganna jana onom be jari-jari ni patna.

²¹Mangalayasi ma ia tu halak Israel. Jadi hara ni i, dibunu si Jonatan anak ni si Simea angkang ni si Daud i ma ia.

²²Raksasa na opat halak na nibunu ni si Daud dohot parangannia i, i ma pomparan ni raksasa na di Gat.