Read Batak Angkola 2 SAMUEL 24 Bible Online

2 SAMUEL 24 - Batak Angkola bible

2 SAMUEL 24

¹Muruk muse ma TUHAN tu Israel, jana disosoi ia ma si Daud laho parohon hasusaan tu bangso i. Didok TUHAN ma tusia, “Pamasa ma jolo pamilangion di Israel dohot Juda.”

²Dung i didok si Daud ma tu si Joab, panglima ni tentarania i, “Kehe ma ho rap dohot angka perwirami manopot sude marga ni Israel di sandok luatna laho mambaen pamilangion. Giot botoonku bahat ni halahi.”

³Tapi didok si Joab ma tu raja i, “Sai marlompit ganda ma nian rayat ni Israel on dibaen TUHAN Debata ni raja i lopus saratus lompit sian bahat ni halahi na saonnari, jana sai laing mangolu nian raja i marnida i. Tapi na giot tu aha ni raja i dehe pamilangion on?”

⁴Haru songon i pe laing hot do raja i di parentania i. Jadi kehe ma si Joab dohot angka perwirania manadingkon raja i laho mangetong bangso Israel.

⁵Dung ditaripari si Joab dohot angka parangannia i Batang aek Jordan, marbandar di sabola Selatan ni Aroer ma halahi, i ma kota na di parsitongaan ni rura i, na di Luat Gad. Sian i kehe ma halahi tu Utara, tu Jaeser,

⁶lalu torus tu Gilead dohot tu Kades na di luat ni halak Het. Dung i tu Dan ma halahi, jana sian Dan manekong ma tu sabola Hasundutan tu Sidon.

⁷Dung i kehe ma halahi tu Selatan, tu Tirus kota na marbenteng i. Torus ma halahi kehe tu sude kota ni halak Hewi dohot halak Kanaan, jana ujungna tu Berseba, na di bagian Selatan ni Juda.

⁸Sambilan bulan dua pulu ari honokna halahi mangaliati sude luat i. Dung i mulak ma halahi tu Jerusalem,

⁹dipaboa halahi ma tu raja i suha ni pamilangion i. Bahat ni halaklahi na tarbaen gabe tentara adong do 800.000 di Israel dohot 500.000 di Juda.

¹⁰Tapi dung sidung si Daud na mangetong bangso i, dihilala ia ma na marsala ia, gabe didok ia ma tu TUHAN, “Madung mambaen dosa au! Ale TUHAN, ampuni ma au, angke karejo na oto do na hubaen on.”

¹¹Ancogotna i, dung ngot si Daud sian podomanna, didok TUHAN ma tu Panurirang Gad na gabe parsambungan ni si Daud tu TUHAN,

¹²“Kehe ma ho jana paboa ma tu si Daud na Hulehen tusia tolu sipilion. PatulusonKu do sanga na dia dipili ia.”

¹³Ro ma si Gad mangadop dohot paboahon parenta ni TUHAN i tusia, ning ia ma, “Dia do pilion ni raja i: Masa haleon di luat on tolu taon honokna, sanga na maporus raja i kojar-kojaron ni musu tolu bulan honokna, sanga ro bala tu luat on tolu ari lolotna? Putuskon ma saonnari, na dia do sipalaluonku tu TUHAN.”

¹⁴Dialusi si Daud ma, “Dut sajo do rohangku: Tapi nada giot au hona uhuman ni jolma. Padiar ma songon i hona uhuman ni TUHAN hita sudena, angke laing parholong ni roha godang do Ia.”

¹⁵Dung salpu i, diparo TUHAN ma bala tu Israel, sian manyogot i lopus tu hatiha na dung ditontuhonna i. Di sude Israel, mate do pitu pulu ribu halak halaklahi.

¹⁶Ma lalu surusuruan na pasarsar hamatean i di lambung ni pardegean ni gandum nampuna ni si Arauna halak Jebus i. Jadi dung diida TUHAN na dung hobas surusuruan i laho mangabisi Jerusalem, dipauba TUHAN ma haputusannia i laho manguhum bangso i. Didok TUHAN ma tu surusuruan i, “Tuk ma i! Antak ma!”

¹⁷Diida si Daud ma surusuruan i, lalu didok ia ma tu TUHAN, “Au do na mardosa jana au muse do na mambaen hasalaan on. Hapengani aha ma he hasalaan ni bangso na marhancit on? Au ma uhumi dohot hami sabagas!”

¹⁸Laing di na sadari i muse, ro ma si Gad mangadop tu si Daud jana didok ia ma, “Manaek ma jolo sugari nian raja i tu pardegean ni gandum ni si Arauna i, laho pajongjong langgatan di TUHAN.”

¹⁹Diihutkon si Daud ma hata na nidok ni si Gad i jana kehe ma ia songon na niparentahon ni TUHAN i tusia.

²⁰Topet ma manaili si Arauna tu toru jana diida ia ma raja i dohot angka na mangudurkonsa ro mandapotkon ia. Manungkap ma si Arauna di jolo ni si Daud,

²¹laho marsapa, “Aha do ulaning na diharohon ni raja i?” ning ia ma. Dialusi raja i ma, “Na laho manobusi pardegean ni anggur do au dohot laho pajongjongkon langgatan di TUHAN, anso mantak na masa on.”

²²Didok si Arauna ma, “Dibuat jana dihaulkon raja i ma tu TUHAN sanga aha na tumbuk diida raja i. Angka on ma lombu baen pakeon haul situtungon. Anggo sobanna tarpake raja i ma tiang ni pangkur dohot angka papan-papan ni pardegean on.”

²³Dilehen si Arauna ma sudena i tu raja i, lalu didok ia dope, “Sai dijagit TUHAN Debata ni raja i ma nian haul na nipasahat ni raja i.”

²⁴Tapi dialusi raja i ma, “Na so ra do au manghaulkon haul tu TUHAN Debatangku anggo na so margarar do sanga na aha. Angkon tobusanku do i sude sian ho.” Dung i ditobusi si Daud ma inganan pardegean ni gandum i dohot angka lombu i mararga lima pulu hepeng perak.

²⁵Dung i dipajongjong ia ma langgatan disi baen di TUHAN jana dihaulkon ia muse ma haul situtungon dohot haul pardonganan. Maralus do tangiang ni si Daud i dibaen TUHAN, lalu dipadao TUHAN ma bala i sian Israel.