Read Batak Angkola 2 SAMUEL 5 Bible Online

2 SAMUEL 5 - Batak Angkola bible

2 SAMUEL 5

¹Dung i marroan ma sude hatobangon ni marga ni Israel mandapotkon si Daud di Hebron mandok tusia, “Ale-ale ni raja i do hami on.

²Sian najolo, taran si Saul dope mamarenta hami, laing na raja i do mamimpin rayat ni Israel di parporangan. Boti muse na dung dijanjihon TUHAN do tu raja i, laing na raja i noma na mamimpin bangsona dohot na gabe raja ni halahi.”

³Mambaen janji ma si Daud dohot sude hatobangon ni Israel i na ro mandapotkon ia, jana dimiahi halahi ma ia gabe raja ni Israel.

⁴Marumur tolu pulu taon ma si Daud di na gabe raja ia, jana opat pulu taon honokna ia mamarenta.

⁵Di Hebron pitu satonga taon honokna ia mamarenta Juda, jana di Jerusalem diparenta ia sudena Israel dohot Juda tolu pulu tolu taon honokna.

⁶Di sada ari kehe ma si Daud dohot parangannia laho mamorangi Jerusalem. Diambang halak Jebus na mangingani kota i na so tartaluhon si Daud Jerusalem. Jadi gabe didok halahi ma tusia, “Nada tarbaen ho masuk anggo tuson da; salangkan halak na mapitung dohot halak na matimpang pe sanggup do mangambat ho.”

⁷Tapi ditaluhon si Daud do benteng Sion, jadi digoari ma i muse “Kota Ni si Daud”.

⁸Didok si Daud ma tu parangannia i, “Adong dehe dison halak na margoyak ni roha mida halak Jebus songon goyak ni rohangkon? Tuk do goyak ni rohana laho mamunu halahi? Anggo songon i, masuk ma sian bubusan ni aek jana niporangan ma angka jolma na mapitung dohot na matimpang na huhagigihon i.” (I ma dalanna umbaen didok halak, “Nada tola halak na mapitung dohot na matimpang masuk tu Bagas Ni TUHAN.”)

⁹Tulus do tarrampas si Daud benteng Sion i lalu diingani ia. Dibaen ia ma goarna, “Kota Ni si Daud.” Dipature ia ma kota i humaliang benteng i, mamungka sian Habincaran ni tor na nitimbun dohot tano.

¹⁰Mur lolot, mur gogo do si Daud, angke diurupi TUHAN Debata Na Markuaso i do ia.

¹¹Ditongos Raja Hiram na sian Tirus do utusan parboniagaon tu si Daud. Dipasingkop si Hiram do di si Daud hayu sampinur Libanon rap dohot angka tukang hayu dohot angka tukang batu laho pajongjong bagas godang.

¹²Dung i torang ma diboto si Daud na dung ditotopkon TUHAN do ia hape gabe raja ni Israel jana makmur harajaannia i dibaen laho manyarihon bangsoNa i.

¹³Dung bungkas si Daud sian Hebron tu Jerusalem dibuat ia dope sanga na piga halak nari boru dohot rading jana sorang dope angka anak dohot borunia.

¹⁴Angka anaknia na sorang di Jerusalem, i ma: si Samua, si Sobab, si Natan, si Salomo,

¹⁵si Jibhar, si Elisua, si Nefeg, si Jafia,

¹⁶si Elisama, si Elyada dohot si Elifelet.

¹⁷Dung dibege halak Pilistin na dung dibaen si Daud gabe raja ni Israel, mangaroro ma halahi giot manangkup ia. Tapi tarbege ma i tu si Daud, gabe kehe ia tu benteng.

¹⁸Lalu ma halak Pilistin di Rura Refaim lalu diingani halahi ma i.

¹⁹Marsapa ma si Daud tu TUHAN, “Angkon poranganku dehe ulaning halak Pilistin i? LehenonMu do hamonangan di au?” Alus ni TUHAN, “Alo ma! Hulehen pe hamonangan di ho!”

²⁰Dung i kehe ma si Daud tu Baal-Perasim jana disi ma ditaluhon ia pasukan ni Pilistin i. Jana didok ia ma, “Dionjarkon TUHAN do partahanan ni musungku, songon aek magodang na mamburgat sasudena di sada ombas.” Jadi gabe digoari ma inganan i, Baal-Perasim.[2]

²¹Marlojongi ma tentara ni Pilistin i nada sanga be taroban halahi angka patung si sombaon ni halahi. Dipamuai si Daud dohot parangannia i ma patung i.

²²Nada sadia honok, ro ma mangulahi halak Pilistin mangingani Rura Refaim i.

²³Dipangido si Daud ma muse panogu-noguon sian TUHAN. Dialusi Tuhan ma, “Ulang alo halahi sian on, tapi dalani ma mamutar jana sian pudi ma alo halahi, di lambung ni harangan ni gaboro i.

²⁴Muda adong dibege ho sora songon pardorom ni halak na marbaris di puncut ni angka hayu i, maju ma ho, angke Au do mardalan di jolomu laho manaluhon tentara ni Pilistin i.”

²⁵Dipadalan si Daud ma songon na niparentahon ni TUHAN i jana ditaluhon ia halak Pilistin sian Geba lalu tu Geser.