Read Batak Angkola 1 RAJA-RAJA 1 Bible Online

1 RAJA-RAJA 1 - Batak Angkola bible

1 RAJA-RAJA 1

¹Madung tobang situtu Raja Daud. Haru pe dilehen disia ulos sian abit na hapal, sai tongtong do ia ngalian.

²Hara ni i didokkon pagawenia i ma, “Rajanami, dumenggan ma hami lului sada bujing-bujing anso adong pauli-uli raja i dison. Modom ma ia donok tu raja i anso las dihilala raja i.”

³Dung i dijalahi halahi ma di sude Israel sada bujing-bujing na jeges tompana. Dapot halahi ma di Sunem sada bujing-bujing na margoar si Abisag. Na jeges situtu rupania. Dioban halahi ma ia tu raja i, gabe dijago bujing-bujing i ma raja i jana dipauli-uli ia. Tapi nada jungada rap modom raja i dohot ia.

⁴

⁵Hara ni na dung mate si Absalom, sian sude anak ni si Daud si Adonia noma na tumobang. Inangnia margoar si Hagit. Tongam do idaon rupana. Nada jungada digorahon amangnia i ia haru tarsung pe ia sala. Hara ni por ni rohania gabe raja, dipasingkop si Adonia ma disia kareta porang dohot tentara na markudo dung i muse lima pulu halak pangawal.

⁶

⁷Kehe ma ia martahi dohot si Joab dohot Malim Abyatar. (Inang ni si Joab, margoar si Zeruya.) Satahi ma si Joab dohot Malim Abyatar patulus pangidoan ni si Adonia i.

⁸Tapi anggo Malim Zadok, si Benaya anak ni si Joyada, Panurirang Natan, si Simei, si Rei bope pangawal ni Raja Daud nada ra manyabola tu si Adonia.

⁹Di na sadari di inganan na margoar Batu Ulok di lambung ni mual ni Batang aek En-Rogel, dihaulkon si Adonia ma haul biri-biri, lombu jantan dohot angka lombu jara-jara na mokmok. Angka anak ni Raja Daud na asing i dohot angka pagawe na di bagas ni raja i sian Juda, madung diontang si Adonia tu pesta haul i,

¹⁰tapi anggo si Salomo, anggi ni si Adonia, dohot Panurirang Natan dohot si Benaya dohot pangawal ni Raja Daud i nada diontang ia.

¹¹Kehe ma si Natan manopot si Batseba, inang ni si Salomo, mandok tusia, “Nada he dibege na mora i, na dung diangkat si Adonia anak ni si Hagit i dirinia gabe raja, salang Raja Daud nada diboto ia bagi aha taringot tuson?

¹²Muda giot mangolu na mora i dohot anakmu si Salomo, jana anso sonang na mora i, hupaingot:

¹³Sigop ma kehe tu jolo ni Raja Daud, jana dokkon ma tu raja i: ‘Nada he na dung disumpahon raja i sandiri do tu au, bahaso anakku si Salomo do na gabe raja manggonti raja i? Biasi gabe si Adonia saonnari gabe raja?’ ”

¹⁴Didok si Natan muse, “Annon dompak mangkatai na mora i dohot Raja Daud, masuk pe au laho manggogohon sanga aha na dung didok na mora i.”

¹⁵Kehe ma si Batseba manopot raja i tu biliknia i. Hatiha i madung tobang situtu raja i, jana si Abisag bujing-bujing na sian Sunem i dompak mangoloi disi.

¹⁶Dung dipaunduk si Batseba tu jolo ni raja i, disapai raja i ma, “Adong he giot pangidoonmu?”

¹⁷Dialusi si Batseba ma, “Raja na niparsangapan, madung disumpahon raja i do hara ni TUHAN Debata ni raja i, bahaso anakku si Salomo do gabe raja manggonti raja i.

¹⁸Hape saonnari si Adonia do na gabe raja jana nada diboto raja i taringot tusi.

¹⁹Madung dihaulkon si Adonia bahat lombu, pahan-pahanan na nipamokmok bope angka biri-biri. Madung diontang ia muse tu pesta i, angka anak ni raja i dohot Malim Abyatar bope si Joab panglima ni tentara ni raja i. Hape anggo si Salomo, nada dipio ia.

²⁰Raja na niparsangapan, sude halak Israel saonnari sai inte do manangihon boa-boa sanga ise do na angkon manggonti raja i gabe raja.

²¹Anggo nada dipaboa raja i, tontu dung mate raja i, au ma dohot anakki baenonna songon halak parjahat.”

²²Dompak mangkobari dope si Batseba, lalu ma si Natan tusi.

²³Dipaboa ma tu raja i haroronia i, dung i masuk ma si Natan lalu dipaunduk ia di jolo ni raja i.

²⁴Didokkon si Natan ma, “Raja i na niparsangapan, na dung diumumkon raja i dehe na dung si Adonia gonti ni raja i gabe raja?

²⁵Laing sadari on do dihaulkon ia bahat biri-biri, lombu jantan dohot anak ni lombu angka na mokmok. Sude anak ni raja i madung diontang ia, dohot do si Joab, panglima ni tentara ni raja i dohot Malim Abyatar. Baru dope halahi marpesta dohot ia, lalu marsurak-surak mandok: ‘Horas ma di Raja Adonia!’

²⁶Hape anggo au nada diontang si Adonia. Malim Zadok dohot si Benaya bope si Salomo nada diontang ia.

²⁷Adong he na nisuru ni raja i mambaen songon i sude so jolo dipaboa tu pagawe ni raja i sanga ise na gabe gonti ni raja i?”

²⁸Didokkon Raja Daud ma, “Piohon jolo si Batseba.” Dung i ro ma si Batseba tu jolo ni raja i.

²⁹Dung i didokkon raja i ma tusia, “Tutu do na dung hujanjihon tu ho hara ni TUHAN Debata ni Israel, angkon si Salomo anakmi do gontingku gabe raja. Jadi saonnari pe hujanjihon ma tu ho hara ni TUHAN na mangolu i, na palua au sian ragam ni hasusaanku, sadari on ma hupatulus janjingki tu ho.”

³⁰

³¹Dung i unduk ma si Batseba lalu didokkon ia, “Horas ma raja i ro di salolot-lolotna.”

³²Jadi disuru Raja Daud ma mamio si Zadok, si Natan dohot si Benaya. Dung ro halahi

³³didokkon raja i ma tu halahi, “Pio ma sude angka naposo ni tuanmunu on, kehe ma hamu rap dohot halahi pajuguk si Salomo anakki tu ginjang ni halodengku sandiri, dung i oban ma ia tu mual ni Batang aek Gihon.

³⁴Disi ma diojakkon si Zadok dohot si Natan ia gabe raja ni Israel. Dung i palu hamu ma sarune lalu marsurak, ‘Horas ma di Raja Salomo!’

³⁵Dung i oban hamu ma mangulahi ia mulak tuson anso juguk ia di habangsangki, angke ia do na dung hupili manggonti au mangarajai Israel dohot Juda.”

³⁶“Denggan ma i Rajanami,” ninna si Benaya mangalusi, “Sai diparsahalai TUHAN Debata ni raja i ma angka parenta ni raja i.

³⁷Sai TUHAN i ma mandongani raja i, sai didongani Ia muse ma si Salomo. Sai dipartuai TUHAN ma pamarentaonnia sumurung sian pamarentaon ni raja i.”

³⁸Dung i dipajuguk si Zadok, si Natan, si Benaya dohot sude pangawal ni raja i ma si Salomo tu halode ni raja i lalu ditogu halahi tu mual ni Batang aek Gihon.

³⁹Dibuat si Zadok ma inganan ni miak zetun, na niobannia hian sian Bandar Parmianan Ni TUHAN, dung i dimiahi ia ma si Salomo gabe raja. Sarune pe mangkuling ma jana sude halak na di inganan i marsurak mandok, “Horas ma di Raja Salomo.”

⁴⁰Dung i diudurkon halahi ma ia mulak mardongan surak-surak jana mamalu suling pola songon na humutur tano i hara ni riburna.

⁴¹Baru sidung dope si Adonia dohot undangannia marpesta hatiha dibege halahi na ribur i. Di na nibege ni si Joab sora ni sarune i, disapai ia ma, “Aha do na masa di kota dibaen songon i riburna?”

⁴²Nada sidung dope si Joab na mangkatai i, tompu ma ro si Jonatan anak ni Malim Abyatar. “Ro ho masuk tuson,” ning si Adonia. “Halak na burju do ho, tontu barita na denggan do na giot paboaonmu.”

⁴³“Santabi, nada songon i,” ning si Jonatan mangalusi. “Madung diangkat Raja Daud si Salomo gabe raja.

⁴⁴Si Zadok, si Natan dohot si Benaya maradu pangawal ni raja i disuru mangudurkon si Salomo. Madung dipajuguk halahi ia tu halode ni raja i.

⁴⁵Madung diojakkon si Zadok dohot si Natan ia di mual ni Batang aek Gihon. Dung songon i masuk ma halahi tu kota, lalu marsurak-surak ribur situtu. Sude do kota i gaor. I ma da hariburon na nibegemunu nangkin.

⁴⁶Si Salomo madung gabe raja saonnari.

⁴⁷Salang angka pagawe ni negara madung kehe mandok hata horas-horas tu Raja Daud. Ninna halahi do, ‘Sai sumurung ma dibaen Debata harajaan ni si Salomo, jana sai gumodang ma harajaan ni si Salomo ulang harajaan ni raja i.’ Dung i manungkap ma Raja Daud di podomanna manyomba Debata

⁴⁸lalu martangiang, ‘Puji-pujian ma di TUHAN Debata na nisomba ni halak Israel. Sadari on madung huangkat sahalak sian pomparanku gabe raja manggontihon au. Jana dipaloas Ho dope au mangolu anso tarsaksihon au i!’ ”

⁴⁹Gabe mabiar ma angka tamu ni si Adonia, lalu jongjong ma halahi sude kehe marsitopot dalanna be.

⁵⁰Gabe mabiar situtu ma si Adonia mida si Salomo, pola kehe ia maniop angka tanduk ni langgatan[1] di Bandar Parmianan Ni TUHAN.

⁵¹Adong ma na kehe paboahon tu Raja Salomo, paboa na mabiar situtu do si Adonia mida ia, gabe kehe ia maniop angka tanduk ni langgatan jana mandokkon, “Hupangido anso disumpahon si Salomo, na so bunuonnia au.”

⁵²Dialusi si Salomo ma, “Muda denggan parangenia, nada pola hahuaon ia, tapi muda dibaen ia na jahat angkon mate do ia.”

⁵³Dung i disuru Raja Salomo ma mangalap ia sian langgatan i. Kehe ma si Adonia tu jolo ni raja i marsomba-somba di jolona. Dung i didok raja i ma, “Mulak ma ho!”