Read Batak Angkola 1 RAJA-RAJA 10 Bible Online

1 RAJA-RAJA 10 - Batak Angkola bible

1 RAJA-RAJA 10

¹Madung tarbege tu ratu na sian Seba taringot tu hagodangan ni si Salomo. Jadi ro ma ia tu Jerusalem laho manguji si Salomo markite-hite sapa-sapa na maol-maol.

²Bahat do na mangudurkon ia di na ro i, songon i unto nasorat marboban, maroban angka parmasak, angka batu intan dohot sere bahat sajo. Dung marsuo ia dohot si Salomo, dipardokkoni ia ma sandok sapa-sapa na dapot dipikiri ia tu si Salomo.

³Taralusi si Salomo do sude sapa-sapa i, umpe sada na tar maol dihilala ia.

⁴Disaksihon ratu na sian Seba i sandiri ma sandok hamaloan ni Raja Salomo i. Diida ia ma sude sanga aha na adong di bagas godang ni si Salomo,

⁵sude pardalan ni karejo ni angka pagawe di bagas godang i, sude pangoloion ni angka parkobas, pakean saragamna, sipanganon na dipasingkop dohot angka kamar inganan ni halahi. Laing diida ia muse do angka haul na nihaulkon ni si Salomo di Bagas Ni Debata. Gabe homang-komang jana tartarik ma roha ni ratu na sian Seba i paida-ida sudena i.

⁶Jadi didok ia ma tu Raja Salomo, “Tutu do hape sude na hubege di luatnami, taringot tu tuan i dohot hamaloan ni tuan i!

⁷Tapi dung ro au tuson jana huida sandiri sude dohot matangku, baru ma anso porsaya au. Satutuna, nada marsatonga dope na hubege i sian na huida saonnari. Satutuna anggo hamaloan dohot sinadongan ni tuan i dao do umbahat sian na dicaritohon tu au.

⁸Mogana i antong sudena angka dadaboru ni tuan i! Jana maruntung ma angka pagawe na tongtong di lambung ni tuan i, gabe tarbaen halahi dohot umbege angka poda habisuhon sian tuan i sandiri!

⁹Sipujion do TUHAN, Debatamu! Diangkat Ia antong tuan i gabe raja ni Israel, i ma tandana na jop roha ni TUHAN maradopkon tuan i. Nada marnamantak Ia mangkaholongi Israel, hara ni i ma umbaen na diangkat Ia tuan i gabe raja ni halahi, anso laing tarpatulus tuan i manjongjongkon tona dohot hatigoran.”

¹⁰Dung i dipasahat ratu na sian Seba i ma angka silua na niobanna i tu si Salomo, lobi opat ribu kilogram sere dohot batu intan bahat songon i dohot angka parmasak. Dung i nada jungada be dijagit si Salomo parmasak songon bahat ni na nilehen ni ratu na sian Seba i tusia. (

¹¹Angka kapal ni si Hiram na maroban sere sian Ofir di si Salomo, laing maroban batu intan do dohot hayu cendana.

¹²Dibaen si Salomo ma angka hayu i gabe handang ni loteng di Bagas Ni Debata dohot di bagas godang ni raja i, deba gabe hasapi dohot gambus sipakeon ni angka parmusik. Angka i ma hayu cendana na jumeges na jungada dipamasuk tu Israel, nada jungada be diida halak hayu na songon i jegesna.)

¹³Dilehen si Salomo ma tu ratu na sian Seba i sude sanga aha na nipangidonia, tamba ni sude silehen-lehen na nilehennia songon na somal. Dung i mulak ma ratu i rap dohot sude na mangudurkon ia tu tano Seba.

¹⁴Ganop taon manjagit sere do Raja Salomo mardonok tu dua pulu tolu ribu kilogram,

¹⁵nada nietong dope disi angka na sian kahanggi dohot angka untung sian na marjagal dohot sian angka raja ni halak Arab songon i sian gubernur ni Israel.

¹⁶Dibaen si Salomo ma dua ratus parince na godang-godang na nilampis dohot sere adong marborat-borat pitu kilogram.

¹⁷Laing dibaen ia muse do tolu ratus angka parince[6] na ummenek na nilampisan dohot sere marborat-borat dua kilogram. Sude parince i dibaen ia ma di bale na margoar Bale Tombak Libanon.

¹⁸Dibaen ia muse ma sada karosi harajaan na godang na nilampis dohot gading dohot sere na dumenggan.

¹⁹Adong do onom anak ni tangga ni karosi harajaan i. Ganop ujung ni anak ni tangga i, adong ma di siamun siambirangna patung ni singa — dua bolas sudena. Sian pudi ni karosi i, adong ma patung ni ulu ni lombu jana sian lambung ni tangan-tangan ni karosi i adong muse dope patung ni singa. Nada jungada adong karosi harajaan na songon i, sanga na di harajaan dia pe jadi.

²¹Sude panjamaan panginuman ni si Salomo, na nibaen sian sere do sude. Jana sandok parkokas na di Bale Tombak Libanon pe, na nibaen sian sere na polin do sude. Nada adong barang na sian perak, harana di hatiha ni si Salomo nada mararga anggo perak.

²²Bahat do kapal ni si Salomo na godang-godang na marlayar di laut bidang rap dohot kapal ni si Hiram. Sanoli tolu taon mulak do kapal i maroban sere, perak, gading dohot angka bodat dohot unggas merak.

²³Sian sasudena raja, si Salomo ma na kumayo jana na umbisuk.

²⁴Sai por do roha ni halak sian sandok bangso laho ro manangihon angka poda habisuhon na nilehen ni Debata tusia,

²⁵jana sanga ise na marroan i sai mangalehen silua do disia. Diparobani halahi do perak, sere, pakean, sinjata, parmasak, kudo dohot bagal; songon i ma sian taon tu taon.

²⁶Dibaen si Salomo ma tentarania, kareta porangna adong saribu opat ratus jana kudo porang dua bolas ribu. Dibaen ia ma i deba di Jerusalem jana na deba nari i di angka kota na asing.

²⁷Jadi hatiha si Salomo mamarenta, anggo perak di Jerusalem barang na somal do i tudos tu batu jana sampinur Libanon marlobi-lobi do i, songon gala-gala.

²⁸Dipamasuk angka suruan ni raja i ma angka kudo sian Misraim dohot Kewe,[7]

²⁹jana dipamasuk angka kareta porang sian Mesir, dung i muse diparuar ma i tu angka raja ni halak Het, dohot tu angka raja ni halak Siria mararga saratus lima pulu hepeng perak sada kudo jana onom ratus hepeng perak sada kareta porang.