Read Batak Angkola 1 RAJA-RAJA 12 Bible Online

1 RAJA-RAJA 12 - Batak Angkola bible

1 RAJA-RAJA 12

¹Madung marlagut sude halak Israel na sian bagian Utara di Sikem laho mangojakkon si Rehabeam gabe raja. Jadi ia pe kehe do tusi.

²Di hatiha i anggo si Jerobeam anak ni si Nebat i, laing di Mesir dope hara ni na mangaluahon dirina sian Raja Salomo. Dung dibege ia taringot tu si Rehabeam, mulak ma ia tu Israel.

³Disuru alo-alo angka rayat na di Utara ma haroronia, lalu rap ma halahi sude kehe mangadop tu si Rehabeam. Ning halahi ma,

⁴“Daulat Na Mulia! Pir do pambaen ni si Salomo amang ni raja i tu hami. Dilehen ia do tu hami siporsanon na dokdok. Saonnari muda ra do raja i panayangkon dohot mangurahi tanggungannami, ra do hami tunduk tu raja i.”

⁵Dialusi si Rehabeam ma, “Tolu ari nari ro ma hamu, jana disi ma lehenonku alusna.” Jadi mulak ma halahi.

⁶Jadi martahi ma si Rehabeam dohot hatobangon na dung jungada gabe panuturi ni si Salomo amang ni si Rehabeam. “Bia dehe alus sibaenonku tu angka jolma i?” ning si Rehabeam marsapa, “Aha do sipaingotmunu?”

⁷Dialusi halahi ma, “Anggo na situtu ni raja i do na giot manjalahi hasonangan ni rayat i, dilehen raja i ma da antong, alus na pasonangkon roha ni halahi. Gabe tunduk do halahi baenon ni i tu raja i.”

⁸Tapi nada ditangihon si Rehabeam sipaingot ni angka hatobangon i. Balikna do, tu angka halak na umposo do ia kehe tu dongan torbangnia jana na dung dohot gabe panuturinia.

⁹“Bia dehe alusku tu angka halak na mangido anso huurahi tanggungan ni halahi?” ning si Rehabeam manyapai. “Aha do sipaingot sidohononmunu tu au?”

¹⁰Dialusi halahi ma, “Sugari songon on do didok raja i tu halahi, ‘Haru gale situtu pe au, laing gumogo dope au sian damang!

¹¹Madung diampehon damang tu hamu tanggungan na dokdok; tapi anggo au lehenonku ma tu hamu na umborat dope. Dilibas ia hamu dohot hotang, tapi anggo au sambokkononku do tu hamu loncing-loncing na marduri bosi.’ ”

¹²Dung tolu ari, mangulahi ma ro si Jerobeam dohot na bahat i mangadop tu Raja Rehabeam, laing songon na niparentahon ni raja i.

¹³Hape nada dipardulihon raja i anggo sipaingot ni na tobang-tobang i. Kasar do pambaennia mangalusi rayat na marroan i

¹⁴songon sipaingot na nilehen ni angka halak na umposo i tusia, “Madung dilehen damang tu hamu tanggungan na dokdok, tapi anggo au, tambaanku dope anso umborat tanggungan i. Dilibas ia do hamu dohot hotang, tapi anggo au sambohonku noma hamu dohot loncing-loncing na marduri!” ning ia.

¹⁵Jadi nada diantureskon raja i anggo pangidoan ni rayat i. Tapi i do na nihagiotan ni TUHAN, hasurirangon ni Panurirang Ahia na sian Silo taringot tu si Jerobeam i, angkon laing tulus.

¹⁶Disi diida rayat i na so ra raja i manangihon na nidok ni halahi, marsurak ma halahi, “Pardulinta i si Daud dohot pomparanna i! So na adong dibaen i tu hita sanga na aha. Beta, mulak hita, halak Israel on! Tapadiar ma si Rehabeam mangurus dirina sandiri!” Gabe mangalo ma halak Israel

¹⁷jana dipadiar halahi ma si Rehabeam mamarenta rayat na maringanan di Luat Juda sajo.

¹⁸Disuru Raja Rehabeam ma pangawas ni karejo paksa na margoar si Adoniram laho marsuru rayat i anso tenang. Dohot bayo i mur didangguri halahi lopus mate. Marnida na masa i diompoti si Rehabeam ma manaek tu karetania lalu kehe paluahon dirina tu Jerusalem.

¹⁹Mamungka sian i sai mangalo ma rayat na sian bagian Utara harajaan Israel i maradopkon pomparan ni Raja Daud.

²⁰Di na tarbege tu sude rayat ni Israel bahaso na dung mulak si Jerobeam sian Mesir, diontang halahi ma ia tu sada parpunguan lalu diangkat halahi ma ia disi gabe raja ni Israel. Hum rayat ni Marga Juda sajo noma na tontong mangihut tu pomparan ni si Daud.

²¹Dung lalu si Rehabeam di Jerusalem, dipalagut ia ma 180.000 tentarania na dumenggan sian Marga Juda dohot Benyamin. Na giot marporang do maksudnia dohot laho pasuangkon kuasonia di angka marga na di bagian Utara ni Israel.

²²Tapi disuru Debata ma Panurirang Senaya

²³pabolkaskon barita on tu si Rehabeam dohot tu sude Marga Juda dohot Benyamin,

²⁴“Ulang porangi hamu rayat ni Israel, angka kahanggimunu sandiri do i. Marmulahan ma hamu sudena. GiotKu do na tarjadi sadari on.” Jadi dioloi halahi sudena ma na niparentahon ni TUHAN i, marmulahan be ma halahi tu bagasna be.

²⁵Dung gabe raja ni Israel si Jerobeam, dipatogu ia ma kota Sikem na di luat partoran Efraim, lalu disi ma ia jolo santongkin maringanan. Dung i kehe muse ma ia sian i jana dipatogu ia ma kota Penuel.

²⁶Songon on dipikiri rohania, “Anggo laing na kehe do rayat i tu Jerusalem laho manaruhon haul di Bagas Ni Debata songon na nibaen ni halahi sahonokna on, gabe marpangulahi ma muse roha ni halahi di si Rehabeam raja ni Juda i, jana dibunu halahi au.”

²⁸Dung ditimbangi ia pangalaho i, dibaen ia ma dua patung ni lombu sian sere jana didok ia ma tu rayat i, “Hamu bangso Israel! Tuk ma i na sahonokna on kehe hamu maribadat tu Jerusalem. Saonnari, angka on ma debatamunu na dung maroban hamu ruar sian tano Mesir!”

²⁹Jadi dibaen si Jerobeam ma sada sian lombu sere na dua i di Betel jana na sada nari di Dan.

³⁰Gabe mambaen dosa ma rayat i hara ni na kehe halahi tu Betel dohot tu Dan laho maribadat.

³¹Dipambaeni si Jerobeam muse ma angka inganan paribadatan di angka puncut ni dolok, diangkat ia ma angka malim sian tonga-tonga ni marga na so masuk tu Marga Levi.

³²Dung i dipambaeni si Jerobeam ma angka malim i di Betel anso martugas disi jana ia sandiri pe dohot ma manghaulkon haul tu angka lombu sere na nibaennia i. Jadi ditontuhon ia ma tanggal lima bolas bulan salapan gabe songon ari pesta ni ugamo di Israel, sarupa dohot ari pesta ni ugamo di Jerusalem. Kehe ma si Jerobeam pagodangkon ari pesta ni ugamo na nitontuhonnia i.