Read Batak Angkola 1 RAJA-RAJA 13 Bible Online

1 RAJA-RAJA 13 - Batak Angkola bible

1 RAJA-RAJA 13

¹Laing di hatiha i disuru TUHAN ma sahalak panurirang sian Juda tu Betel. Lalu ma panurirang i disi jana hatiha jongjong si Jerobeam di jolo ni langgatan parhaulan ni haul i.

²Diparentahon TUHAN ma anso marsurak panurirang i tu langgatan i, “O langgatan, o langgatan! Songon on ma didok TUHAN, ‘Sorang ma sada anak na margoar si Josia di tonga-tonga ni horong ni si Daud. Bunuonnia ma di ginjangmon angka malim na pature langgatan ni angka debata na asing dohot na manghaulkon haul di ginjangmu. Jana laing di ginjangmon ma tutungonnia angka holi-holi ni halahi.’ ”

³Didok panurirang i muse ma, “Magargar ma langgatan on, jana use ma abuan na di ginjangna i. I ma tandana paboa na tutu disuru TUHAN au.”

⁴Di na nibege ni si Jerobeam hata i, ditudu ia ma tu panurirang i jana marsurak ma ia mandok, “Tangkup i!” Tapi manigor toltol ma tangan ni si Jerobeam gabe nada tartarik ia be mangulahi.

⁵Ompot muse ma magargar langgatan i jana abuan na di ginjangna i pe use ma tu tano, songon tanda hahomangan na dipaboa ni panurirang hombar tu na diparentahon ni TUHAN.

⁶Dung i didok Raja Jerobeam ma tu panurirang i: “Tolong ma jolo jana martangiang ho tu TUHAN Debatamu hara ni au. Pangidohon ma anso dipamalum Ia tangankon!” Jadi martangiang ma panurirang i tu TUHAN, gabe malum ma tangan ni raja i.

⁷Dung i didok raja i ma tu panurirang i, “Beta ma mangan tu bagasku hita. Giot lehenonku di ho silua upa ni haburjuonmu.”

⁸Dialusi panurirang i ma, “Haru dilehen raja i pe di au satonga sian sinadongan ni raja i, nada ra au dohot mangan sanga minum rap dohot raja i.

⁹Na hujagit do parenta sian TUHAN anso ulang mangan sanga minum jana mulak pe au nada mamolus sian dalan na hubolus laho ro au tuson.”

¹⁰Dibolus panurirang i ma dalan na asing.

¹¹Di hatiha i adong ma sahalak panurirang na matobang maringanan di Betel. Dipaboa angka dakdanakna ma tusia taringot tu panurirang na ro sian Juda i, sanga aha na nibaennia i di Betel di ari i dohot na nidoknia tu Raja Jerobeam.

¹²Jadi marsapa ma panurirang na matobang i, “Sian dia dibolus panurirang na sian Juda i laho mulak ia?” Dipatuduhon halahi ma dalan na nibolusnia i tusia,

¹³lalu disuru pasang ia ma palano tu halodenia. Dung i ditengget ia ma halodenia i jana kehe ma ia

¹⁴mangkojar panurirang na sian Juda i, didapot ia ma hatiha juguk di toru ni hayu na godang. “Ho dehe panurirang na sian Juda i?” ning ia manyapai. “Tutu,” ning bayo i.

¹⁵“Beta ma mangan hita tu bagas,” ning panurirang na matobang i.

¹⁶Tapi dialusi panurirang na sian Juda i ma, “Nada. Nada tarjagit au ontang-ontangmunu i dohot tu bagas. Au pe nada mangan au sanga minum dison dohot hamu i,

¹⁷angke madung hujagit parenta sian TUHAN, nada mangan sanga minum jana nada mulak mamolus dalanku hian laho ro au.”

¹⁸Gabe margabus ma panurirang na matobang na sian Betel i didok ma tusia, “Au pe laing panurirang do songon ho. Na dung diparentahon TUHAN do sahalak surusuruan marsuru au mangalap dohot manjagit ho di bagasku.”

¹⁹Gabe diihutkon panurirang na sian Juda i ma dohot tu bagas ni panurirang na matobang i jana dohot ma ia mangan.

²⁰Dompak na juguk i halahi mangan, didok TUHAN ma tu panurirang na matobang i,

²¹lopus didok ia hata manggorahon panurirang na sian Juda i, ning ia, “Pandok ni TUHAN nada burju ho mangoloi Ia; nada dipatulus ho sanga aha na niparentahonNia tu ho.

²²Balikna do dibaen ho, mangulahi ho tu pudi jana mangan di na Huparentahon tu ho na so tola mangan. Hara ni i angkon hona bunu noma ho, jana bangkemi nada tola kuburon ni sisolkotmu.”

²³Dung sidung halahi mangan, dipasang panurirang na matobang i ma palano ni halode ni panurirang na sian Juda i,

²⁴lalu kehe ma ia. Di tonga dalan ro ma sada singa manyoro ia, lalu mate ma ia. Payak di tonga dalan i ma songon i bangkena i, jana jongjong ma halode i di lambung ni bangke i. Singa i pe laing disi do jongjong.

²⁵Sanga ise halak na mamolus, diida do bangke i dohot singa i disi. Jadi kehe ma halahi tu Betel jana dipaboa halahi ma sanga na aha na niida ni halahi i.

²⁶Dung tarbege tu panurirang na matobang i taringot tu pangalaho i, didok ia ma, “Panurirang na so mangoloi parenta ni TUHAN i do bayo i! Hara ni i do umbaen na nisuru ni TUHAN singa i manyoro ia songon na nidok ni TUHAN dompak so tarjadi songon i.”

²⁷Dung i didok panurirang na matobang i ma tu angka dakdanaknia i, “Baen ma jolo palano ni halodengki.” Dung i ditengget ia ma halodenia i,

²⁸kehe ma ia jana di dapot ia ma bangke ni panurirang na sian Juda i laing payak di dalan i jana di lambungna i halode dohot singa i. Umpe dihahua singa i bangke i dohot halode i.

²⁹Diangkat ia ma bangke i tu halodenia i lalu dioban ia mulak tu Betel laho mambaen upacara siluluton dohot na manguburkonsa.

³⁰Di kuburan ni sahorong panurirang na matobang i sandiri noma dikubur bangke i, lalu marsiluluton ma ia dohot angka dakdanaknia. “Ibo ni roha i mida kahanggingkon, ibo ni roha i,” ning halahi.

³¹Dung i didok panurirang na matobang i ma tu angka dakdanaknia, “Ampot sai jumolo au, di bagasan kuburan on di lambungnia ma kuburkon hamu au.”

³²Sanga aha na nidoknia na niparentahon ni TUHAN salaho tu langgatan na di Betel dohot salaho tu sude inganan paribadatan na di angka kota ni Samaria, pasti do tarjadi sudena i.

³³Laing na so ra do si Jerobeam manadingkon hasomalan ni ngolunia na jahat i. Laho mangurus langgatan na nipajongjongnia i, sai torus do diangkati ia malim sian tonga-tonga ni halak na somal. Sanga ise ma na ra, diangkat ia gabe malim.

³⁴Pambaenannia na jat i ma mambaen mago tu angka pomparannia lopus abis halahi sude.