Read Batak Angkola 1 RAJA-RAJA 14 Bible Online

1 RAJA-RAJA 14 - Batak Angkola bible

1 RAJA-RAJA 14

¹Jadi marnyae ma hatiha i anak ni si Jerobeam, na margoar si Abia.

²Didok si Jerobeam ma tu dadaborunia i, “Markobas ma ho anso kehe ho tu Silo. Dapotkon jolo Panurirang Ahia na mandok na salpu i, na giot gabe raja ni Israel au. Tapi pauba ma pamakemu anso ulang ditanda halak ho.

³Oban ma disia sampulu kamata roti, kue saotik dohot aer ni loba sabotol. Sapai ma jolo tusia sanga aha do na giot masa tu si Abia anakta i, jana paboaonnia do i tu ho.”

⁴Jadi kehe ma dadaboru ni si Jerobeam i tu bagas ni si Ahia di Silo. Nada diida si Ahia be sanga na aha hara ni tobangnia.

⁵Tapi didok TUHAN ma tusia na ro dadaboru ni si Jerobeam laho manyapai taringot tu anakna na marnyae i. Jana dipaboa TUHAN ma sanga aha na giot sidokkonon ni si Ahia. Dung lalu dadaboru ni si Jerobeam i tusi, dibaen-baen ia ma songon halak na asing ia.

⁶Tapi disi dibege si Ahia sora ni pangalangkania di pintu i, didok ia ma, “Masuk ma hamu, huboto do na nibuat ni si Jerobeam do ho. Ulang pola baen sipaula-ula. Adong do barita na jat di ho.

⁷Kehe ma ho paboahon tu si Jerobeam, bahaso songon on didok TUHAN, Debata ni Israel tusia, ‘Madung Hutodo ho sian tonga-tonga ni rayat jana Hubaen gabe parkuaso ni Israel bangsongKi.

⁸Madung Hulehen di ho harajaan na Hurampas i sian pomparan ni si Daud. Hape nada songon si Daud naposongKi ho. Anggo si Daud burju do tu Au jana burju mangihutkon parentangKu. Hum na tola baenon do dibaen ia.

⁹Hape anggo ho, angka dosa na gumodang sian na nibaen ni na mamarenta di jolomu di dipambaeni ho. Ditadingkon ho do Au jana disungguli ho murukKu di na nibaenmu gana-ganaan dohot angka patung sian logam baen sisombaon.

¹⁰Hara ni i ma umbaen na giot paroonKu hamamago tu pomparanmu. BunuonKu noma sandok halaklahi sian pomparanmu na poso sanga na matobang. AgohononKu noma sude pomparanmu songon panyapu ni halak di na kotor.

¹¹Panganon ni anjing ma pomparanmu na mate di kota jana na mate di balian ni kota angka unggas sipangan bangke ma mangankonsa. Ingot ma i, Au ma TUHAN na mandoksa!’ ”

¹²Dipaudut si Ahia ma muse mandok tu dadaboru ni si Jerobeam i, “Mulak ma ho saonnari. Disi masuk ho tu kota i, marujung ma ngolu ni si Ahia anakmi.

¹³Marsiluluton ma sude rayat ni Israel jana kuburkonon ni halahi ma ia. Hum sasada ia sajo ma sian pomparan ni si Jerobeam na marsangap dikuburkon, angke hum sasada ia ma i na tumbuk di roha ni TUHAN, Debata ni halak Israel i.

¹⁴Lehenon ma sada raja di Israel na laho paujungkon parjuguk ni pomparan ni si Jerobeam songon raja.

¹⁵Uhumon ni TUHAN ma Israel lopus marlapat-lapat songon arung na di batang aek. Buaton ni TUHAN ma halak Israel sian luat na denggan on na nilehenNa tu ompu ni halahi. Sarsarkonon ni TUHAN ma halahi di ipar ni Batang aek Efrat, hara ni na nipagilap-gilap ni halahi muruk ni rohaNia di na nibaen ni halahi angka patung ni debata boru-boru Asera.

¹⁶Tadingkonon ni TUHAN noma Israel hara ni na dung mardosa si Jerobeam jana patundania gabe mardosai muse halak Israel.”

¹⁷Dung i kehe ma na nibuat ni si Jerobeam i tu Tirsa. Disi masuk ia tu bagasan bagasnia i, marujung ma ngolu ni anaknia i.

¹⁸Marsiluluton ma rayat ni Israel lalu dikuburkon halahi ma bangkena i songon na nidok ni TUHAN marhite sian Panurirang Ahia, naposoNia.

¹⁹Barita na asing taringot tu Raja Jerobeam, i ma salaho tu pangarajainia dohot parporangan na niuluhonnia, madung disuratkon di Buku Sejarah Ni Raja-raja Israel.

²⁰Dua pulu dua taon honokna gabe raja si Jerobeam mamarenta, dung i jumolo ma ia jana dikuburkon. Anaknia na margoar si Nadab ma gabe raja manggonti ia.

²¹Marumur opat pulu sada taon ma si Rehabeam anak ni si Salomo di na mamungka ia gabe raja. Pitu bolas taon honokna mamarenta ia di Jerusalem, kota na nihapunjungkon ni TUHAN sian sude Israel gabe inganan maribadat tuSia. Si Naama boru na sian bangso Amon do inang ni si Rehabeam.

²²Mardosa do bangso Juda tu TUHAN. Tamba gurgur do muruk ni TUHAN dibaen pangalaho ni halahi martimbangkon sandok pangalaho ni ompu ni halahi.

²³Di ginjang ni angka dolok dohot di toru ni angka hayu na godang, dipajongjong halahi do angka inganan parsombaan tu gana-ganaan jana dipajongjong halahi angka tugu dohot angka gambaran ni debata boru-boru Asera baen sombaon.

²⁴Asing ni angka dadaboru, adong muse do angka halaklahi na martugas di angka inganan parsombaan ni debata i. Dipambaeni halak Juda do angka pangalaho na so ture na nibaen ni angka bangso na dung diusir ni TUHAN di na masuk halak Israel tu luat i.

²⁵Di taon palimahon mamarenta si Rehabeam, ro ma Raja Sisak sian Mesir mamorangi Jerusalem.

²⁶Dirampas ia ma sude barang sigodang arga na adong di Bagas Ni Debata dohot na di bagas godang ni raja i, songon i dohot angka parince sere na nibaen ni si Salomo.

²⁷Jadi laho manggontisa dibaen Raja Rehabeam ma angka parince sian tumbaga jana dipasahat ia ma tu angka perwira na martugas mangawal horbangan ni bagas godang ni raja i.

²⁸Ganop kehe raja i tu Bagas Ni Debata, dioban angka pangawal i ma parince i, dung salpu i dipaulak ma tu ingananna.

²⁹Barita na asing taringot tu Raja Rehabeam madung disuratkon di Buku Sejarah Ni Raja-raja Juda.

³⁰Salolot si Rehabeam mamarenta, sai adong do porang antara ni si Rehabeam dohot si Jerobeam.

³¹Dung i marujung ma ngolu ni si Rehabeam jana dikuburkon ma ia di kuburan ni angka raja di Kota Ni si Daud. Si Abia anaknia i ma manggontihon ia gabe raja.