Read Batak Angkola 1 RAJA-RAJA 15 Bible Online

1 RAJA-RAJA 15 - Batak Angkola bible

1 RAJA-RAJA 15

¹Di taon pasalapan bolaskon mamarenta Raja Jerobeam di Israel, gabe raja ma si Abia di Juda

²jana tolu taon honokna mamarenta ia di Jerusalem. Si Maaka boru ni si Absalom do inangnia.

³Dipambaeni si Abia do angka dosa songon na nibaen ni amangnia; nada sian rohania haburjuonnia mangoloi TUHAN Debatania, asing do sian ompuna si Daud.

⁴Tapi hara ni na marningot si Daud, dilehen TUHAN Debata na nisomba ni si Daud do di si Abia sada anak laho manggonti ia mamarenta di Jerusalem boti laho mampartahankon kota i.

⁵Hara ni na nibaen ni si Daud do pangalaho na pasonangkon roha ni TUHAN umbaen dipatupa TUHAN songon i; nada jungada nayang rohania di angka na niparentahon ni TUHAN, asing sian parkaro na tu si Uria halak Het i.

⁶Di hatiha ni si Abia mamarenta, sai marpupu do masa porang antara ni si Abia dohot si Jerobeam.

⁷Barita na asing salaho tu si Abia madung disuratkon di Buku Sejarah Ni Raja-raja Juda.

⁸Marujung ma ngolu ni si Abia jana dikuburkon ma di Kota Ni si Daud. Si Asa anaknia i ma gabe raja manggonti ia.

⁹Di taon padua puluhon mamarenta Raja Jerobeam di Israel, gabe raja ma si Asa di Juda.

¹⁰Opat pulu sada taon honokna mamarenta ia di Jerusalem. Si Maaka do ompungnia boru ni si Absalom.

¹¹Laing songon si Daud ompuna i do si Asa pasonangkon roha ni TUHAN.

¹²Sandok dadaboru jalang na martugas di angka inganan panyombaan ni angka debata dipaorot ia, jana sude gana-ganaan na nipajongjong ni angka raja na mamarenta di jolonia, diambungkon ia sian sude luat i.

¹³Ompungnia si Maaka diparadiankon ia sian jabatanna songon Ina Na Mora i, hara ni na nibaennia patung gana-ganaan na jorbut idaon laho manyomba Asera, dewi ni hagabean. Di rumpakkon si Asa ma gana-ganaan i jana ditutung ia di Rura Kidron.

¹⁴Haru pe nada sude dirumpakkon si Asa angka inganan parsombaan tu debata i, salolot di ngolunia burju do ia tu TUHAN.

¹⁵Sandok barang-barang na dung nihaulkon ni amangnia gabe hapunjungan ni TUHAN, dioban ia do i tu Bagas Ni Debata, songon i dohot angka barang-barang na nihaulkonnia sandiri, angka sere dohot perak.

¹⁶Salolot Raja Asa mamarenta di Juda dohot Raja Baesa di Israel, sai na marpupu do masa porang antara ni raja na dua i.

¹⁷Diserang si Baesa do Juda jana dipatogu ia kota Rama laho manutup dalan haruar dohot masuk tu Juda.

¹⁸Jadi hara ni i dibuat Raja Asa ma sude perak dohot sere na laing adong di Bagas Ni Debata dohot di bagasan bagas godang ni raja i, jana dipasahat ia tu naposona. Ditongoskon ia ma i tu Damaskus di si Benhadad raja ni Siria, anak ni si Tabrimon, i ma pahompu ni si Hesion. Angka parpangkat di bagas godang i do dibaen panongosan ni angka barang-barang i mardongan tona songon on,

¹⁹“Tabaen ma parale-aleonta songon na nibaen ni damang dohot natorasmu. Rap dohot on hutongos do sere dohot perak baen silua, jana husosohon tu tuan i anso gotapkon hubunganmu sian si Baesa raja ni Israel i anso ditarik ia tentarania sian luatku.”

²⁰Tumbuk do tu roha ni si Benhadad hatana i lalu disuruhon ia ma angka perwirania rap dohot pasukan ni halahi mamorangi angka kota ni Israel. Ditaluhon halahi ma Ijon, Dan, Abel Bet-Maaka dohot sude tano donokkon ni Dano Galilea maradu sude Luat Naftali.

²¹Di na nibege ni si Baesa barita taringot tu pangalaho i, diantak ia ma na patoguhon Rama lalu mulak ma ia tu Tirsa.

²²Dung salpu i diparentahon Raja Asa ma sude halak na di Juda nada adong imbarna mangangkat batu dohot hayu na di Rama na nipake ni si Baesa laho patoguhon kota i. I ma dipake si Asa laho patoguhon Mispa dohot Geba kota na di Luat Benyamin.

²³Barita na asing taringot tu Raja Asa, i ma salaho tu hagogoonnia dohot angka kota na nipatogunia, madung disuratkon i di Buku Sejarah Ni Raja-raja Juda. Tapi dung matobang si Asa, marnyae do dua-dua patnia i.

²⁴Marujung ma ngolunia jana dikuburkon di kuburan ni raja-raja di Kota Ni si Daud. Anaknia si Josafat ma gabe raja manggontihon ia.

²⁵Di taon paduahon mamarenta Raja Asa di Juda, gabe raja ma si Nadab anak ni si Jerobeam di Israel jana mamarenta ia dua taon honokna.

²⁶Laing songon amangna i na mamarenta di jolonia, si Nadab pe mardosa do maradopkon TUHAN jana hara ni patundania gabe mardosa muse halak Israel.

²⁷Mambaen komplotan ma si Baesa anak ni si Ahia sian Marga Isakar mangalo si Nadab, lalu dibunu ma si Nadab. Hatiha manghobuk kota Gibeton na di Luat Pilistin do topet si Nadab rap dohot pasukannia.

²⁸Di taon patoluhon ma i dung mamarenta Raja Asa di Juda tarjadi na masa i. Songon i ma dalanna gabe raja si Baesa di Israel manggontihon si Nadab.

²⁹Disi gabe raja si Baesa manigor dibunu ia do sude pomparan ni si Jerobeam. Hombar do i tu na nidok ni TUHAN marhite naposoNa, Panurirang Ahia na sian Silo, sandok isi ni bagas ni si Jerobeam angkon hona bunu, umpe sahalak na malua.

³⁰Mardosa si Jerobeam jana patundania gabe mardosai halak Israel. Songon i ma dipagilap si Jerobeam muruk ni TUHAN, Debata na nisomba ni halak Israel i.

³¹Barita na asing salaho tu si Nadab madung disuratkon di Buku Sejarah Ni Raja-raja Israel.

³²Dompak si Baesa mamarenta di Israel, marpupu do masa porang antara ni si Baesa dohot Raja Asa na sian Juda.

³³Di taon patoluhon mamarenta Raja Asa di Juda, gabe raja ma si Baesa anak ni si Ahia di sude Israel. Dua pulu opat taon honokna ia mamarenta di Tirsa.

³⁴Laing songon Raja Jerobeam na mamarenta di jolonia, si Baesa pe mardosa do maradopkon TUHAN jana patundania gabe mambaen dosa muse halak Israel.