Read Batak Angkola 1 RAJA-RAJA 16 Bible Online

1 RAJA-RAJA 16 - Batak Angkola bible

1 RAJA-RAJA 16

¹Gabe mangkobari ma TUHAN tu Panurirang Jehu anak ni si Hanani, didok ma, “Palalu ma jolo tonangkon tu si Baesa,

²‘Nada sietongon hian ho na salpu i, tapi madung Huangkat ho gabe pamimpin ni bangsongKu Israel. Saonnari mardosai do ho songon si Jerobeam jana hara ni ho mardosa umatKi, mambaen gilap murukKu.

³Jadi hara ni i agohononKu noma ho dohot isi ni bagasmu laing songon na Hubaen tu si Jerobeam.

⁴Sanga ise na mate di kota sian isi ni bagasmu, angkon panganon ni anjing jana na mate di balian ni kota panganon ni unggas sipangan bangke.’ ”

⁵Dipalalu Panurirang Jehu do Tona Ni TUHAN na tu si Baesa dohot tu isi ni bagasna i hara ni na mardosa si Baesa maradopkon TUHAN. Gabe muruk do TUHAN dibaen si Baesa, nada hum hara ni angka hajahatan na nibaennia, dohot do muse hara ni na nibununia sude pomparan ni si Jerobeam. Barita na asing taringot tu si Baesa, tarmasuk tu hagogoonnia, madung disuratkon di Buku Sejarah Ni Raja-raja Israel. Marujung ma ngolu ni si Baesa lalu dikuburkon di Tirsa. Anaknia si Ela ma manggontihon ia gabe raja.

⁸Di taon padua pulu onomkon dung mamarenta Raja Asa di Juda, gabe raja ma si Ela anak ni si Baesa di Israel. Dua taon honokna mamarenta ia di Tirsa.

⁹Mambaen komplotan ma si Zimri, sahalak perwira na manguluhon satonga sian pasukan na markudo laho mangalo tu si Ela. Sanoli tarjadi ma di Tirsa minum-minum si Ela lopus mabuk di bagas ni si Arsa kapala ni bagas godang ni raja i.

¹⁰Jadi masuk ma si Zimri lalu dibunuhon ia si Ela jana gabe raja ma ia manggontihon si Ela. Di taon padua pulu pituhon ma i tarjadi dung mamarenta Raja Asa di Juda.

¹¹Disi gabe raja si Zimri manigor dibunu ia do sude sabagas ni si Baesa lopus tu koum sisolkotna dohot ale-ale ni si Baesa sude nada adong na malua.

¹²Laing songon na nidok ni TUHAN maradopkon si Baesa markite-hite Panurirang Jehu, hona bunu ma sude sabagas si Baesa.

¹³Marsomba tu angka debata do si Baesa dohot si Ela anakna i, jana patunda ni halahi gabe mardosa Israel. Jadi dipasunggul-sunggul halahi do muruk ni TUHAN, Debata na nisomba ni halak Israel.

¹⁴Barita na asing taringot tu si Ela madung disuratkon di Buku Sejarah Ni Raja-raja Israel.

¹⁵Di taon padua pulu pituhon mamarenta Raja Asa di Juda, gabe raja ma si Zimri di Israel jana pitu ari honokna mamarenta ia di Tirsa. Dompak manghobuk Gibeton do hatiha i tentara ni Israel; i ma sada kota ni halak Pilistin.

¹⁶Disi tarboto tu angka tentara i na dung mambaen komplotan si Zimri mangalo raja i jana mamunusa, laing di inganan i do diangkat halahi sude si Omri panglima ni halahi i gabe raja ni Israel.

¹⁷Dung i ditadingkon si Omri dohot pasukannia i ma Gibeton lalu kehe halahi mamorangi Tirsa.

¹⁸Disi diida si Zimri na dung dirampas kota i, masuk ma ia tu bagas godang, disurbu ia ma bagas godang i dohot ia, gabe mate ma ia.

¹⁹Tarjadi pe songon i, laing songon Raja Jerobeam do si Zimri na mardosa do maradopkon TUHAN jana patundania gabe mambaen dosa halak Israel.

²⁰Barita na asing salaho tu si Zimri dohot komplotan na nitahinia laho manghianat, madung disuratkon di Buku Sejarah Ni Raja-raja Israel.

²¹Masa parbolat-bolatan di bangso Israel, dibaen adong do deba na marpor ni roha anso si Tibni anak ni si Ginat gabe raja, tapi adong muse deba na manghagioti anso si Omri gabe raja.

²²Ujungna monang na mamihak tu si Omri; mate ma si Tibni jana si Omri ma gabe raja.

²³Di taon patolu pulu sadahon dung mamarenta Raja Asa di Juda, disi ma i tarjadi. Dua bolas taon honokna gabe raja si Omri mamarenta Israel. Onom taon na parjolo di Tirsa do ia mamarenta.

²⁴Tapi dung salpu i ditobusi ia ma sada dolok mararga onom ribu hepeng perak sian sada bayo na margoar si Semer. Dipajongjong si Omri ma sada kota di dolok i, dibaen ia ma goarna Samaria mangihutkon goar ni si Semer nampuna dolok i humani.

²⁵Jumorbut dope angka dosa na nibaen ni si Omri sian angka raja na mamarenta di jolonia.

²⁶Songon si Jerobeam, mardosa do si Omri jana patundania halak Israel pe mardosa jana marsomba tu angka debata. Jadi hara ni i disungguli ia do muruk ni TUHAN, Debata na nisomba ni halak Israel.

²⁷Barita na asing salaho tu si Omri dohot sude halobiannia madung disuratkon di Buku Sejarah Ni Raja-raja Israel.

²⁸Dung jumolo si Omri jana dikuburkon, si Ahab anaknia ma gabe raja manggontihon ia.

²⁹Di taon patolu pulu salapankon mamarenta Raja Asa di Juda, gabe raja ma si Ahab anak ni si Omri di Israel jana dua pulu dua taon honokna mamarenta ia di Samaria.

³⁰Dao dope jumorbut angka dosa na nibaennia maradopkon TUHAN martimbangkon angka raja na di jolonia.

³¹Nada tuk dope disia ngolu pardosaon songon Raja Jerobeam i, dibuat ia dope si Isebel boru ni Raja Etbaal na sian Sidon, gabe marsomba tu Baal ia.

³²Dipajongjong ia ma bagas langgatan ni debata i.

³³Laing dibaen ia muse sada patung ni Dewi Asera. Dipambaeni ia do angka dosa na jumorbut sian na nibaen ni sude raja ni Israel na mamarenta di jolonia. Dipasunggul-sunggul ia do muruk ni TUHAN, Debata na nisomba ni halak Israel.

³⁴Di hatiha ni si Ahab mamarenta, disi ma dipajongjong si Hiel halak Betel i mangulahi kota Jeriko. Tapi laing songon na nidok ni TUHAN hian do markite-hite si Josua anak ni si Nun, agoan anak ma si Hiel dua. Tapi anggo si Abiram siangkaan i mate di hatiha mamayakkon ojahan na mamasang angka pintu horbangan ni kota i ma si Hiel.