Read Batak Angkola 1 RAJA-RAJA 17 Bible Online

1 RAJA-RAJA 17 - Batak Angkola bible

1 RAJA-RAJA 17

¹Sanoli adong ma sada halak panurirang na margoar si Elia na sian Tisbe na di Gilead ro mandapotkon Raja Ahab jana didok ia ma, “Mangasahon TUHAN Debata na mangolu, na nisomba ni halak Israel jana na huoloi, hupaboa ma tu raja i, anggo dua tolu taon on nada adong ombun sanga udan rimbus pe, anggo so hudokkon.”

²Dung i didok TUHAN ma tu si Elia,

³“Tadingkon ma inganan i, kehe ma ho tu Habincaran ni Batang aek Jordan disi ma ho martabuni di lambung ni Batang aek Kerit.

⁴Minum sian anak ni batang aek i ma ho jana pangan ma angka sipanganon na nitaruhon ni angka unggas sigak na Husuru.”

⁵Diihutkon si Elia ma parenta ni TUHAN i, jana kehe ma ia tu anak ni Batang aek Kerit, disi ma ia maringanan.

⁶Minum sian anak ni batang aek i ma ia jana mangan roti dohot juhut na nioban ni unggas sigak ganop manyogot dohot ganop potang.

⁷Nada sadia honok mahiang muse ma anak ni batang aek i, hara ni na so ro udan.

⁸Dung i didok TUHAN ma mandok si Elia,

⁹“Saonnari angkon tu kota Sarfat noma ho kehe, tu lambung ni Sidon jana disi ma ho maringanan. Madung Huparentahon sada ina na mabalu disi anso dilehen ia ho mangan.”

¹⁰Jadi kehe ma si Elia tu Sarfat. Disi lalu ia tu horbangan ni kota i, diida ia ma sahalak na mabalu topet maisoban. Jadi didok si Elia ma tu anak boru i, “O inang, tolong ma jolo mambuat aek di au saotik.”

¹¹Di na mardalan anak boru i laho mangalap aek i, pio-pio ma si Elia, “Laing laoskon muse ma jolo roti saotik di au.”

¹²Dialusi anak boru i ma, “Mangasahon TUHAN na mangolu, Debata na nisomba ni damang husumpahon do, paboa na so adong rotingku. Hum sanjomput topung gandum ma na adong di mangkuk dohot miak zetun saotik di botol. Na mambuat soban do au laho mangalompahon sisaotik i anso hami pangankon i dohot anakki. I noma panganonnami na parpudi, dung i painte-inte mate noma hami.”

¹³“Ulang ganggu rohamu inang,” ning si Elia ma, “Jolo baen ma di au sada roti na menek sian topung dohot miak i, jana oban ma tuson. Dung i baru ma pature di ho dohot di dakdanakmi.

¹⁴Harana pandok ni TUHAN, Debata na nisomba ni halak Israel i do, anggo mangkuk i laing hot do marisi topung, jana botol i pe laing tongtong do marisi miak lopus dapot hatihana tongoson ni TUHAN udan tu tano on.”

¹⁵Jadi kehe ma na mabalu i patuluskon sanga songon dia na nidok ni si Elia i tusia. Jadi gabe tuk ma sipanganon ni halahi piga-piga ari lolotna.

¹⁶Boti songon na nidok ni TUHAN tu si Elia, anggo mangkuk i laing na torus ma i marisi topung jana botol i pe torus marisi miak.

¹⁷Nada sadia honok marnyae ma anak ni na mabalu i. Mur honok mur hancit do nyaena i lopus marujung ngoluna.

¹⁸Jadi didok na mabalu i ma tu si Elia, “O naposo ni Debata, biasi ma he angkon ro ho amang tuson jana i ma mambaen tarsunggul Debata di dosangku umbaen lopus mate anakki?”

¹⁹Dialusi si Elia ma, “Lehen ma jolo anakmi tu au.” Dung didok si Elia songon i, dijagit ia ma dakdanak i sian inangna, dioban ia ma tu ginjang, tu bilik na niinganan ni si Elia i. Dipapodom ia ma di ginjang ni podoman i,

²⁰lalu martangiang ma ia marsora na gogo, “O TUHAN, Debatangku, biasi diparo Ho TUHAN hamamago on tu na mabalu on? Songon i ma dengganna dibaen ia tu au, jana saonnari dibunu Ho ma TUHAN anaknia on!”

²¹Dung salpu i, dipatungkap si Elia ma tolu noli tu pamatang ni dakdanak i, laing martangiang ma ia, “O TUHAN, Debatangku, sugari dipangolu Ho ma dakdanak on!”

²²Ditangihon TUHAN do tangiang ni si Elia i; mulak ma muse humosa jana torkis ma mangulahi.

²³Jadi dioban si Elia ma dakdanak i tu inangna i jana didok ia ma, “Indon ma inang anakmi! Mangolu do ia!”

²⁴Dialusi na mabalu i ma, “Saonnari tangkas ma huboto, naposo ni Debata do ho amang jana tutu do mangkobari TUHAN markite-hite ho amang.”