Read Batak Angkola 1 RAJA-RAJA 18 Bible Online

1 RAJA-RAJA 18 - Batak Angkola bible

1 RAJA-RAJA 18

¹Dung adong sadia honok, di taon patoluhon ari logo i, didok TUHAN ma tu si Elia, “Kehe ma ho mangadop tu Raja Ahab, paroonKu ma naron udan.”

²Jadi kehe ma si Elia. Santak ma hatiha i haleon potir di Samaria.

³Jadi gabe dipiohon si Ahab ma anso ro si Obaja mangadop. (Sirajai arta di bagas ni raja do anggo si Obaja. Halak na burju do ia jana na ringgas marsomba tu TUHAN.

⁴Dompak na nibunu ni si Isebel angka panurirang ni TUHAN, ditolong si Obaja do saratus halak panurirang ni TUHAN, ditabunihon ia halahi di angka liang — lima pulu halak di sada liang — jana dilehen ia panganon dohot inumon ni halahi.)

⁵Didok si Ahab ma tu si Obaja, “Beta ma tabolusi sude luat on jana tajalahi ma mual dohot batang aek; betak na adong do dapot hita ruput di kudo dohot bagalta anso ulang pola adong na jabat tamatehon sian pahan-pahananta i.”

⁶Dung dibagi halahi luat na giot paresoon ni halahi i, kehe ma halahi. Si Ahab ma tu dalan na sada jana si Obaja ma tu na asing.

⁷Di tonga dalan marsuo ma da si Obaja dohot si Elia. Dung ditandai ia si Elia, marsomba ma ia manghormat tu si Elia jana didok ia ma, “Tutu do ulaning si Elia amang?”

⁸“Tutu, si Elia do au,” ning si Elia mangalusi. “Saonnari kehe ma ho paboahon tu raja, tuannami, na dison au.”

⁹Dialusi si Obaja ma, “Aha ma he salangku umbaen na nipasorohon ni amang au tu parmaraan anso hum bunuon ni si Ahab?

¹⁰Mangasahon Debatamu TUHAN na mangolu i, husumpahon ma, na dung disuru raja i do manjalahi ho amang di ganop luat di na satano on. Muda didok parkuaso di sada luat na so adong ho di luat i, digogohon si Ahab do anso marsumpa parkuaso i paboa na tutu situtu na so adong tarida ho amang di luat i.

¹¹Hape saonnari giot ni amang, giot kehe ma au tusia mandok na dison amang?

¹²Muda kehe au sian on, mungkin do obanon ni Tondi Ni TUHAN amang tu inganan na so huboto! Jana muda hupaboa tu si Ahab na dison amang, hape nada marsuo ia tu amang, tontu bunuonnia ma au, haru pe na marsitutu au na maribadat i tu TUHAN sian na menek.

¹³Adong he na so unjung dope dibege amang na hutabunihon saratus halak panurirang ni TUHAN di angka liang dompak na nibunu ni si Isebel sian halahi — lima pulu halak di sada liang — jana hulehen halahi mangan dohot minum?

¹⁴Jadi tarbia ma baenonmu marsuru au kehe paboahon tu raja mandok na dison amang? Pasti bunuonnia ma au!”

¹⁵Dialusi si Elia ma, “Mangasahon TUHAN Na Markuaso i na sai huoloi, marjanji ma au ro sandiri mangadop tu raja i sadari on.”

¹⁶Jadi kehe ma si Obaja paboahon tu raja i jana si Ahab pe kehe ma mandapotkon si Elia.

¹⁷Dung diligi si Ahab si Elia, didok ma tu ibana: “Ho dehe na manggaori Israel?”

¹⁸“Nada au sibaen gaor,” ning si Elia, “Tapi raja i sandiri do, raja i dohot dongan sabagas ni raja i. Di na marsomba raja i tu angka gana-ganaan ni Baal dilaosi raja i ma angka na niparentahon ni TUHAN.

¹⁹Saonnari, parentahon ma sude rayat ni Israel anso marsuo dohot au di Dolok Karmel. Oban muse ma panurirang ni Baal siopat ratus lima pulu halak i dohot siopat ratus halak panurirang ni debata boru-boru Asera i na nibalanjoan ni Ratu Isebel i!”

²⁰Jadi diarahon si Ahab ma sude rayat dohot angka panurirang ni Baal i tu Dolok Karmel,

²¹jadi didonohi si Elia ma rayat i jana didok ia ma, “Intap ni andigan ma sai torus hamu mardua roha? Muda TUHAN do Debata, somba hamu ma TUHAN; muda Baal i do Debata, Baal ma somba!” Mangkohom ma rayat na disi i.

²²Dung i didok si Elia ma, “Sian sude panurirang ni TUHAN, hum sasada au noma na tading, hape dison adong do opat ratus lima pulu panurirang ni Baal.

²³Saonnari oban hamu ma dua lombu jantan tuson; sude panurirang ni Baal i mambuat sada jana disambol halahi ma i lalu diponggol-ponggol, dung i dipayakkon ma di ginjang ni soban, tapi nada tola pagaraon api disi. Anggo lombu na sada nari i, au ma paturehonsa laing songon i.

²⁴Padiar ma ditangianghon angka panurirang ni Baal i tu debata ni halahi, jana au pe martangiang ma tu TUHAN. Na mangalusi dohot na marsuru api — i ma ibana Debata.” Marsurak ma sude rayat i mangalusi, “Satuju!”

²⁵Dung i didok si Elia ma tu angka panurirang ni Baal i, “Dibaen umbahat do hamu, hamu ma mamili lombu i jana parade hamu ma. Tangianghon hamu ma tu debatamunu, tapi ulang pagara hamu api di soban i.”

²⁶Jadi dipili halahi ma sada lombu jana dihobasi halahi. Dung sidung, martangiang ma halahi tu Baal lopus tonga ari laing marsurahi ma halahi, “Alusi hami, o Baal!” Di na mambaen songon i, laing torus-torus do halahi manortori humaliang langgatan na nibaen ni halahi i. Hape nada adong maralus bagi aha.

²⁷Dung potang ari, mamungka ma si Elia mangalayas-layasi halahi. “Pagogo hamu ma sora ni tangiangmunu i! Inda he debata do ia? Aropku na topet kehe do ia mardalanan! Sanga betak na hatiha modom dope ia, jadi angkon sunggulanmunu do ia!”

²⁸Jadi mur manggogo muse ma sora ni halahi na martangiang i. Jana songon na somal dibaen halahi, dibugangi halahi ma pamatang ni halahi dohot piso songon i dohot hujur lopus marmudari.

²⁹Songon i sajo ma halahi lopus potang ari songon dia ma jolma na susur-susuran; hape nada adong na mangalusi, nada adong na mampardulihon.

³⁰Jadi didok si Elia ma tu sude rayat i, “Padonok hamu ma.” Gabe marlagut ma halahi sude humaliang ia. Dung i dipungka si Elia ma padenggankon langgatan ni TUHAN na dung masursur i.

³¹Dibuat ia ma dua bolas batu, ganop batu ma songon wakil ni sada sian sidua bolas marga pomparan ni angka anak ni si Jakob, halak na nigoaran ni TUHAN, si Israel.

³²Batu i ma dibaen si Elia paturehon mangulahi langgatan inganan parsombaan tu TUHAN. Dihuar ia ma bondar humaliang langgatan i, jabat do tarbaen inganan ni aek tu opat bolas liter.

³³Disusun ia ma soban di ginjang ni langgatan i. Disambol ia muse ma lombu na sada nari i, diponggol-ponggol ia ma i jana dibaen ia di ginjang ni soban i. Dung i didok ia ma, “Gohi hamu ma jolo aek opat sambong, lalu duruskon hamu ma aek i tu ginjang ni parkaulan ni haul dohot tu hayu i.” Dung dibaen halahi songon i,

³⁴didok ia ma, “Sanoli nari,” dung i dibaen halahi muse. “Sanoli nari,” ning si Elia, jana dibaen halahi mangulahi.

³⁵Jadi gabe ro ma aek i humaliang langgatan i jabat gok bondarna i.

³⁶Dung dapot hatihana laho manghaulkon haul andospotang, dipadonok si Elia ma tu langgatan i, martangiang ma ia. Didok ia ma, “TUHAN Debata na nisomba ni si Abraham, si Ishak dohot si Jakob! Patandahon ma saonnari bahaso Ho do na tutu Debata ni Israel, jana au ma naposoMu; dohot sasude na hubaen on na niparentahonMu do.

³⁷Alusi ma au TUHAN! Alusi ma au anso diboto rayat on bahaso Ho do TUHAN, jana Ho do na paubahon halahi mangulahi tu Ho.”

³⁸Jadi ditongos TUHAN ma api sian langit manutung haul i lopus puntung rap dohot sobanna i, angka batuna i dohot tanona i songon i dohot aek na di bondar i abis didilat api i.

³⁹Disi diida rayat i pangalaho i, tungkap ma halahi tu tano lalu didok halahi ma, “TUHAN do Debata; TUHAN i do na tutu Debata!”

⁴⁰Jadi didok si Elia ma, “Tangkup hamu ma angka panurirang ni Baal i; sahalak pe ulang paloas hamu malua!” Manigor ditangkupi halak na bahat i ma angka panurirang ni Baal i sude, dung i dioban si Elia ma halahi tu Batang aek Kison jana disi ma halahi sudena dibunu.

⁴¹Dung i didok si Elia ma tu Raja Ahab, “Saonnari kehe ma jolo raja i mangan, harana santongkin nari ro ma udan; madung tarbege sorana.”

⁴²Jadi kehe ma si Ahab mangan jana si Elia kehe ma manangkok tu Dolok Karmel. Manungkap ma ia tu tano, diantara ni dugulnia i ma ulunia.

⁴³Didok ia ma tu naposonia i, “Manangkok ma ho tu puncut ni dolok i jana tatap ma sabola tu laut.” Manangkok ma naposona i, lalu mulak manuat jana didok ia ma, “Nada adong huida bagi aha.” Disuru si Elia ma naposonia i pitunoli manangkok laho mangaligi.

⁴⁴Papitu nolihon manuat ma naposonia i mandok, “Huida ombun tarsabidang ni tangan ro sian sabola laut.” Jadi didok si Elia ma tu naposonia i, “Kehe ma ho mandapotkon Raja Ahab, suru ma ia manengget karetania, jana suru ma ia mulak anso ulang jabat hona udan ia ditonga dalan.”

⁴⁵Di na santongkin i manigor dokdok ma langit jana mangombus ma alogo na gogo, udan potir pe mamungka ma durus. Ditengget si Ahab ma karetania laho mulak tu Jesreel.

⁴⁶Mandapot gogo ma si Elia di ombas i sian TUHAN. Dilompit ia ma baju jubania i tu ginjang jana ditambat ia ma tu gontingnia, jadi dilojong ia ma manjoloi si Ahab sapanjang dalan i lopus lalu tu horbangan ni Jesreel.