Read Batak Angkola 1 RAJA-RAJA 21 Bible Online

1 RAJA-RAJA 21 - Batak Angkola bible

1 RAJA-RAJA 21

¹Di lambung bagas godang ni Raja Ahab na di Jisreel adong ma sada kobun ni sada bayo na margoar si Nabot.

²Sanoli didok si Ahab ma tu si Nabot, “Sai por do rohangku anso au nian nampuna kobun anggurmi, hara ni donokna kobun i tu bagas godangku jana giot manyuan angka suan-suanan au nian disi. Hulehen ma di ho kobun anggur na jumeges baen gontina, sanga muda dia na giot rohamu, hutobusi ma i dohot arga na patut.”

³Dialusi si Nabot ma, “Pusako do kobun anggur i sian angka daompung. Mangasahon TUHAN, nada lehenonku i di tuan i!”

⁴Mardongan arsak, dohot muruk hara ni hata na nidok ni si Nabot i tusia, mulak ma si Ahab lalu modom ma ia di podomannia manjorbing adop dingding i jana nada ra ia mangan.

⁵Didapotkon si Isebel dadaborunia i ma si Ahab jana disapai ia ma, “Biasi dehe marsak ho? Hara ni aha umbaen so ra mangan ho?”

⁶Dialusi si Ahab ma, “Hara ni na so tabo do huhilala pambaen ni si Nabot. Por rohangku manobusi kobun anggurnia i, sanga muda giot rohania, nigonti disia dohot kobun na asing. Hape inda ra ia!”

⁷“Raja do ho!” ning si Isebel. “Ngot ma ho anso mangan. Pasonang ma rohamu, harana hulehen pe di ho kobun anggur ni si Nabot i!”

⁸Dung i dibaen si Isebel ma surat, na nitanda tanganan dohot na nisegel ni si Ahab. Ditongoskon ia ma surat i tu angka pamimpin dohot angka pangituai ni rayat na di Jisreel.

⁹Songon on ma isi ni surat i, “Baen hamu ma boa-boa anso marpuaso rayat jana piohon hamu ma halahi anso marlagut; di parpunguan i lehen hamu ma juguhan ni si Nabot di juluan.

¹⁰Suru hamu ma dua halak na jahat juguk di jolonia jana ditudu ma ia na mamurai Debata dohot raja. Dung i oban hamu ma ia tu balian ni kota jana nidangguran ma ia dohot batu lopus mate.”

¹¹Dipatulus angka pamimpin dohot angka pangituai ni rayat Jisreel ma parenta ni si Isebel i.

¹²Dibaen halahi ma boa-boa anso puaso rayat i. Dung i dipiohon halahi ma angka jolma i marlagut jana dibaen ma juguhan ni si Nabot di juluan.

¹³Juguk ma dua halak na jahat adop si Nabot, jana dituhas halahi na dua ma si Nabot di jolo ni halak na bahat i na dung mamurai Debata dohot raja. Jadi hara ni i ma dalanna dioban ia tu balian ni kota lalu didangguri dohot batu lopus mate.

¹⁴Dipalalu ma tu si Isebel sanga songon dia pardalanna mamunu si Nabot i.

¹⁵Disi dijagit si Isebel barita i, didok ia ma tu si Ahab, “Ma mate si Nabot. Saonnari kehe bo ho mambuat kobun anggur na so nigadisnia i tu ho.”

¹⁶Kehe ma si Ahab manigor jana dibaen ia ma kobun anggur i gabe ia nampunasa.

¹⁷Jadi didok TUHAN ma tu si Elia, panurirang na sian Tisbe i,

¹⁸“Di kobun anggur ni si Nabot i do saonnari si Ahab raja ni Samaria i, laho mambaen kobun i gabe ia nampunasa. Jadi kehe ma ho tusi,

¹⁹jana palalu ma tusia, Au TUHAN mandok songon on, ‘Dung mamunu jolma, mangarampas dope! Jadi hara ni i dilatan ni anjing ma mudarmu di inganan ni pandilatan ni angka anjing di mudar ni si Nabot i!’ ”

²⁰Disi diida si Ahab si Elia, didok ia ma, “O alongku, dipaihut-ihut ho ma au, atehe?” “Tutu do,” ning si Elia mangalusi. “Angke dibaen ho do hajahatan na tarlobi di panatapan ni TUHAN,

²¹jadi songon on ma na nidok ni TUHAN salaho tu ho, ‘ParoonKu ma bala tu ho. PaorotonKu ma ho jana sandok halaklahi di bagasmu, na matobang dohot na poso, pangabisonKu noma.

²²Angkon songon isi ni bagas ni Raja Jerobeam anak ni si Nebat i hamu sabagas dohot songon isi ni bagas ni si Baesa anak ni si Ahia i, hara ni na dung mardosa halak Israel patunda ni ho jabat tarsunggul murukKu dibaen ho.’

²³Jana salaho tu si Isebel, didok TUHAN do na giot papanganan ni anjing pamatangnia i di tonga-tonga ni kota Jisreel.

²⁴Sanga ise sian hamu na sabagas na mate di kota, papanganan ni anjing ma i, jana na mate di balian ni kota, papanganan ni unggas sipangan bangke ma i.”

²⁵Nada jungada adong halak na songon si Ahab situtu ni rohana mambaen na jahat di adopan ni TUHAN. Hara ni panyosoi ni si Isebel na nibuatnia i ma sudena hajahatan i dibaen ia.

²⁶Dipambaeni si Ahab do angka dosa na paila-ilahon; disomba ia do gana-ganaan songon pambaen ni halak Amori, i ma angka jolma na niusir ni TUHAN morot sian tano Kanaan di parmasuk ni halak Israel tu luat i.

²⁷Dung sidung si Elia na mandok hata i, disibakkon si Ahab ma pakeannia lalu digonti ia ma dohot abit goni tanda ni na manyosal ia. Puaso ma ia jana modom pe laing marbaju goni ma ia jana muda mardalan, murhing ma torus bohinia.

²⁸Didok TUHAN ma tu Panurirang Elia,

²⁹“Diida ho dehe sanga songon dia dipaserep si Ahab rohania di jolongKu? Nada be paroonKu bala i hara ni i salolot mangolu ia. Dung di anaknia pe anso ro baenonKu hasusaan i.”