Read Batak Angkola 1 RAJA-RAJA 22 Bible Online

1 RAJA-RAJA 22 - Batak Angkola bible

1 RAJA-RAJA 22

¹Dua taon honokna nada adong tarjadi porang antara ni Israel dohot Siria.

²Tapi di taon patoluhon ro ma si Josafat raja ni Juda mandapotkon si Ahab raja ni Israel.

³Dompak so i madung didok si Ahab hian tu angka perwirania i, “Hita do nampuna kota Ramot na di Gilead i. Biasi nada tarampas i sian raja ni Siria.”

⁴Jadi di na ro si Josafat, disapai si Ahab ma tusia, “Ra dehe ho rap dohot au mamorangi Ramot?” “Anggo rap do hita ra do au,” ning si Josafat, “songon i muse do tentara dohot pasukanku na markudo i.

⁵Tapi dumenggan ma jolo taparsapahon tu TUHAN.”

⁶Jadi dipalagut si Ahab ma hira-hira opat ratus halak panurirang jana disapai ia ma tu halahi, “Tola dehe kehe au mamorangi Ramot sanga nada?” “Tola do!” ning halahi. “Lehenon ni TUHAN do hamonangan tu raja i.”

⁷Tapi disapai si Josafat ma mangulahi, “Adong dope ulaning panurirang na asing na gabe parhiteanta laho manyapai hagiot ni TUHAN?”

⁸Dialusi si Ahab ma, “Adong dope sada nari, i ma si Mika anak ni si Jimla. Tapi goyak do rohangku mida i, harana na so jungada dope hum saragam panyurirangonnia na denggan tu au; hum na so ture do sude.” “Ulang ma dok songon i!” ning si Josafat.

⁹Jadi gabe dipiohon si Ahab ma sahalak pagawe ni bagas godang, disuruhon ia ma manigor kehe mangalap si Mika.

¹⁰Topet hatiha marpakean harajaan ma si Ahab dohot si Josafat di karosi harajaan di inganan pardegean ni gandum di jolo ni horbangan Samaria jana marroan ma sude panurirang i mangadop laho paboahon panyurirangonna be.

¹¹Sahalak sian panurirang i na margoar si Zedekia anak ni si Kenaana, dibaen ia angka tanduk sian bosi jana didok ia ma tu si Ahab, “On ma na nidok ni TUHAN, ‘Dohot tanduk on ma porangan ni raja i Siria jana malantuk ma halahi.’ ”

¹²Satuju do sude panurirang na asing i jana didok halahi ma, “Diporangi ma Ramot, jana mardenggan do parporangan i. Lehenon ni TUHAN do hamonangan di raja i.”

¹³Jadi di na kehe angka pagawe na nisuru mangalap si Mika i, laing didok halahi ma tusia, “Sude panurirang na asing i madung mandok panyurirangonna be, monang do raja i. Jadi hara ni i, laing denggan ma disurirangkon tuan i.”

¹⁴Tapi dialusi si Mika ma, “Mangasahon TUHAN na mangolu i, hujanjihon ma, sanga aha na nidok ni TUHAN tu au, laing i do na giot palaluonku.”

¹⁵Dung lalu si Mika di jolo ni Raja Ahab, disapai raja i ma, “Mika! Tola dehe Raja Josafat dohot au kehe mamorangi Ramot sanga nada?” “Porangi ma!” ning si Mika. “Madung tontu marhasil tuan i. Lehenon ni TUHAN do i hamonangan di tuan i.”

¹⁶Dialusi si Ahab ma, “Muda mangasahon TUHAN do ho tu au mandok hata, na tutu i ma dokkon. Piga noli angkon dokkononku paingotkon ho salaho tusi?”

¹⁷Dialusi si Mika ma, “Huida do tentara ni halak Israel marserak di dolok-dolok. Songon biri-biri na so marparmahan do halahi. Jadi hara ni i gabe didok TUHAN do salaho tu halahi, ‘Nada adong pamimpin ni angka jolma on; padiar ma mulak halahi di bagasan hatorkisan.’ ”

¹⁸Jadi didok si Ahab ma tu si Josafat, “Na he tutu do na hudok i tu ho? Nada jungada disurirangkon ia na ture salaho tu au! Hum na jahat sajo do!”

¹⁹Didok si Mika ma mangulahi, “Saonnari tangihon ma sanga aha na nidok ni TUHAN! Huida do TUHAN jongjong di juguhan hasangapanNa di banua ginjang, jana sude surusuruanNa jongjong di lambungNia.

²⁰Disapai TUHAN ma, ‘Ise dehe na manyosoi si Ahab anso ra ia kehe lalu dibunu di Ramot muse?’ Jadi adong ma sian tonga-tonga ni surusuruan i na mandok songon on, adong na mandok songon i.

²¹Ujungna ro ma sada tondi. Dipadonok ia ma tu TUHAN jana didok ia ma, ‘Au ma manggabusi ia.’

²²‘Bia ma?’ ninna TUHAN manyapai. Dialusi Tondi i ma, ‘Kehe pe au jana hubaen ma anso sude panurirang ni si Ahab i margabus.’ Didok TUHAN ma, ‘Denggan, baen ma anggo songon i, harana manjadi do i anggo ho manggabusi ia.’ ”

²³Ujungna didok si Mika ma, “Bia baenon, i ma na tarjadi! TUHAN do mambaen angka panurirang ni tuan i margabus tu tuan i, angke na dung ditontuhon TUHAN do laho padondonkon bala tu tuan i!”

²⁴Jadi ro ma tu jolo si Zedekia anak ni si Kenaana mandonohi Panurirang Mika dipastap ia ma bohina i jana didok ia ma, “Mamungka sadihari lakna ditadingkon Tondi Ni TUHAN au laho mandok hata tu ho?”

²⁵Dialusi si Mika ma, “Idaonmu do i annon di na masuk ho martabuni tu kamar pudi.”

²⁶“Tangkup jana oban ma ia tu si Amon walikota i dohot tu si Joas anak ni raja i,” ning Raja Ahab.

²⁷“Suru anso dikurungkon halahi ia di hurungan, jana dilehen ia mangan dohot minum saotik sajo lopus mulak au horas torkis.”

²⁸Didok si Mika ma, “Muda horas torkis do tuan i mulak, i ma tandana na so mandok hata TUHAN marhite sian au! Tu hamu sude ma na hudok on!”

²⁹Dung i kehe ma si Ahab raja ni Israel dohot si Josafat raja ni Juda mamorangi kota Ramot na di Gilead.

³⁰Didok si Ahab ma tu si Josafat, “Manyamar ma jolo au anso dohot au masuk tu parporangan i, tapi anggo ho laing mamake pakean hasangapan ma.” Songon i ma dibaen raja Israel i kehe tu parporangan i.

³¹Dompak i anggo sitolu pulu dua halak panglima ni tentara Siria i madung diparentahon rajana i ulang pola mamorangi sanga na ise pe asing sian raja ni Israel i sajo.

³²Jadi di na niida ni halahi Raja Josafat, diambang halahi do ia ibana raja ni Israel. Jadi gabe maju ma halahi mamorangi si Josafat, tapi dung marsurak ia,

³³diboto halahi ma na so raja ni Israel ia, gabe mantak ma halahi mangkojarsa.

³⁴Tapi na so pola pamotoanna hian, adong ma sahalak tentara Siria i paluahon anak ni panania, na manombus baju porang ni si Ahab topet di parsambunganna i gabe margasa ma ia dibaensa, “Ma hona au!” ning si Ahab manggora na maroban karetania i. “Putar, oban ma au ruar sian parporangan on!”

³⁵Di na laing torus porang i, sai jongjong ma Raja Ahab ditungkol di bagasan karetania i, adop tentara ni Siria i. Martere ma mudarna i sian gasana i mangalongkoi lante ni kareta i. Bornginna i marujung ma ngolunia.

³⁶Marayak lusut ma mataniari diparentahon ma anso marmulahan tentara ni halak Israel tu kota dohot tu luatna be,

³⁷harana ma jumolo raja i. Gabe marmulahan ma halahi jana dikuburkon ma bangke ni si Ahab di Samaria.

³⁸Dompak na paiaskon karetania i di Dano Samaria, topet hatiha maridi disi angka dadaboru jalang, didilati anjing ma mudar i sian kareta i, songon na nidok ni TUHAN i.

³⁹Barita na asing salaho tu Raja Ahab, taringot tu bagas godang na sian gading dohot sude kota na nipajongjongnia madung disuratkon di Buku Sejarah Ni Raja-raja Israel.

⁴⁰Dung marujung ngolu ni si Ahab, anaknia si Ahasia ma gabe raja manggontihon ia.

⁴¹Di taon paopatkon mamarenta si Ahab di Israel, gabe raja ma si Josafat anak ni si Asa di Juda.

⁴²Marumur tolu pulu lima taon ma ia hatiha i. Dua pulu lima taon honokna mamarenta ia di Jerusalem. Inangnia goarna si Asuba boru ni si Silhi.

⁴³Laing songon amangna si Asa na mamarenta di jolonia, dipatulus si Josafat do sanga aha na denggan di parnidaan ni TUHAN.

⁴⁴Tapi anggo angka inganan parsombaan ni gana-ganaan nada dironcohon ia, jadi laing manghaulkon haul do anggo rayat jana manutungi hamonyan disi.

⁴⁵Denggan muse do hubungan ni si Josafat dohot raja Israel.

⁴⁶Barita na asing salaho tu si Josafat taringot tu habetenganna dohot angka parporangannia madung disuratkon di Buku Sejarah Ni Raja-raja Juda.

⁴⁷Diagohon ia do sian harajaannia i sude halaklahi dohot dadaboru na so ture na mangoloi di angka langgatan ni gana-ganaan na laing tading sian tingki ni si Asa, amangna i.

⁴⁸Di hatiha i, topet do nada adong raja ni halak Edom, jadi hum kapala daerah do sahalak na mamarenta disi.

⁴⁹Laho mambuat sere sian Ofir, dibaen si Josafat ma angka kapal sian Tarsis; tapi nada tulus kapal i marlayar hara ni na sego di Esion-Geber.

⁵⁰Dipangidohon Raja Ahasia na sian Israel ma anso rap marlayar angka halaknia dohot angka halak ni si Josafat, tapi dijua si Josafat do i.

⁵¹Dung i marujung ma ngolu ni si Josafat jana dikuburkon ma di kuburan ni raja-raja di Kota Ni si Daud. Anaknia si Joram ma gabe raja manggontihon ia.

⁵²Di taon papitubolaskon mamarenta Raja Josafat di Juda, gabe raja ni Israel di Samaria ma si Ahasia anak ni si Ahab jana dirajai ia ma Israel dua taon honokna.

⁵³Mardosa do ia maradopkon TUHAN marhite sian na mangihutkon tiruan ni amangna si Ahab dohot si Isebel inangna i dohot sian Raja Jerobeam na mambaen halak Israel gabe mardosa.

⁵⁴Marsomba jana mangoloi tu Baal do ia. Jana laing songon amangna i na mamarenta di jolonia, laing disungguli ia muse do muruk ni TUHAN, Debata na nisomba ni halak Israel.