Read Batak Angkola 1 RAJA-RAJA 9 Bible Online

1 RAJA-RAJA 9 - Batak Angkola bible

1 RAJA-RAJA 9

¹Dung sidung dipajongjong si Salomo Bagas Ni Debata dohot bagas godang ni raja i dohot sude na nisangkaphonNia,

²dipatidahon TUHAN ma mangulahi diriNia tu si Salomo songon na tarjadi di Gibeon.

³Didokkon TUHAN ma tu si Salomo, “Madung Hubege tangiangmu, jana rap dohot on Hupatangkas ma, bahaso bagas na dung nipajongjongmon gabe inganan na mardohonan ma on salolot-lolotna muda giot manyomba Au. Huparate-atehon jana Hujagohon pe inganan on.

⁴Muda disomba ho Au mardongan roha na ias songon amamu si Daud jana dioloi ho angka uhum dohot parentangKu,

⁵patulusonKu do janjingKu na tu amamu si Daud i bahaso na tongtong do adong sahalak sian pomparanNia na gabe raja di Israel.

⁶Tapi muda dihudukkon ho sanga pomparanmu Au jana nada dioloi angka uhum dohot parentangKu gabe manyomba tu angka debata na asing,

⁷gabe paruaronKu ma bangsongKu Israel sian luat na dung Hulehen di halahi. Au pe tinggalkononKu ma bagas parsombaan na dung Hudokkon gabe inganan na dung mardohonan laho marsomba tu Au. Sanga didia pe halak Israel angkon dilayasi jana dipartatai halak.

⁸Bagas parsombaan on, angkon gabe tiranggong, pola tehe sude halak na mamolus disi gabe homang jana tarsonggot. Dohonon ni halahi ma, ‘Biasi dibaen TUHAN i songon i tu luat on dohot tu bagas parsombaan on?’

⁹Alusan ni halak ma, ‘Hara ni na dung ditinggalkon halahi do TUHAN Debata ni halahi, na maroban ompung ni halahi ruar sian Mesir. Madung disomba halahi angka debata sileban. Hara ni i ma baen diparo TUHAN Parmaraan tu halahi.’ ”

¹⁰Dua pulu taon honokna si Salomo pauli Bagas Ni Debata dohot bagas godang ni raja i.

¹¹Sude hayu ares na sian Libanon dohot hayu ares na somal bope sude sere na porlu di si Salomo sipakeon tu pambangunan i madung dilehen Raja Hiram disia. Dung sidung karejo i, dilehen Raja Salomo ma tu si Hiram dua pulu kota na di Luat Galilea.

¹²Dung i kehe ma si Hiram mangaligi, tapi nada jop rohania mida na nilehenna i.

¹³Ning ia ma tu si Salomo, “Kahanggingku, songon on ma pangalaho ni angka kota na nilehenmi di au?” Hara ni i ma baen na laing didok goar ni luat i Kabul.[5]

¹⁴Lobi dope sian opat ribu kilogram sere na nitongos ni si Hiram tu si Salomo.

¹⁵Karejo paksa do dibaen Raja Salomo di na pajongjong Bagas Ni Debata dohot bagas godang ni raja i, benteng ni kota i bope dohot manimbun tano sabola Selatan ni kota i. Dos do pangalahona dibaen ia di na pajongjong kota Hasor, Megido dohot Geser. (

¹⁶Kota Geser i ma kota na niporangi bope na nitaluhon ni halak Mesir najolo, dibunu do halak kota i jana disurbu kota i. Di pudi ni ari dipasahat ma kota i gabe silehen-lehen tu borunia na marbagas dohot si Salomo.

¹⁷Gabe si Salomo ma pauli kota i mangulahi.) Marhite karejo paksa muse do dipajongjong si Salomo mangulahi kota Bet-Horon.

¹⁸Baalat, Tamar na di Halongonan Juda

¹⁹angka kota inganan ni balanjo, angka kota inganan ni kudo dohot angka kareta porang ni raja, dohot sude angka na asing di Jerusalem, Libanon maradu sude sanga di dia sajo pe di bagasan harajaannia, songon na dung disangkaphonnia.

²⁰Na mangkarejohon karejo paksa i, dipili si Salomo do sian pomparan ni bangso Kanaan na so dibunu ni halak Israel di na laho mangingani luat i halahi. I ma angka bangso Amori, Het, Peris, Hewi dohot bangso Jebus, lopus sadari on tongtong do gabe hatoban pomparan ni i.

²²Anggo halak Israel nada diloas si Salomo gabe hatoban, dibaen do karejo ni halahi gabe tentara, pagawe, panglima, komandan ni pasukan na markareta dohot pasukan na markudo.

²³Lima ratus lima pulu pagawe na gabe hasahatan ni halak na karejo paksa di piga-piga inganan sipaulion ni si Salomo.

²⁴Tano na di Habincaran ni kota i ditimbun si Salomo do i dung mimbar daborunia boru ni raja Mesir i sian Kota Ni si Daud tu bagas ni raja na nipajongjong ni si Salomo disia.

²⁵Tolu noli sataon dipasahat si Salomo do haul situtungon dohot haul haluaan di ginjang ni langgatan na nipajongjongnia di TUHAN i. Songon i ma dibaen si Salomo pasidungkon karejo na pauli Bagas Ni Debata.

²⁶Di angkatan lautnia, dipauli Raja Salomo do angka kapal di Esion-Geber na di lambung ni Elot di topi ni Laut Rara na di Luat Edom.

²⁷Disuru Raja Hiram do angka angkatan laut na ummalo, sian angka kapalnia, anso marlayar dohot angkatan laut ni si Salomo.

²⁸Kehe ma halahi marlayar tu Ofir, dioban halahi ma sian i opat bolas ribu kilogram sere di si Salomo.