Read Batak Angkola 2 RAJA-RAJA 1 Bible Online

2 RAJA-RAJA 1 - Batak Angkola bible

2 RAJA-RAJA 1

¹Dung jumolo si Ahab raja ni Israel i, mangalo ma Luat Moab tu Israel.

²Sanoli madabu ma si Ahasia raja ni Israel i sian jandela di tirket parginjang na di bagas godangnia i di Samaria, jabat do posi. Jadi disuru ia ma halak manyapai tu si Baal-Zebub debata ni halak Ekron di Pilistin, sanga na malum dope hilalaonnia sanga nada.

³Tapi disuru Surusuruan Ni TUHAN ma si Elia panurirang na sian Tisbe i, kehe mandapotkon angka suruan ni Raja Ahasia i mandok, “Adong he na so adong be Debata di Israel umbaen na ra hamu kehe mangido panogu-noguon tu Baal-Zebub debata ni halak Ekron i?

⁴Dokkon hamu ma tu raja i na nidok ni TUHAN songon on, ‘Nada ra malum be hilalaonmu, mate noma ho!’ ” Dipalalu si Elia ma na nidok ni TUHAN i.

⁵Jadi mulak ma angka suruanna i tu raja i, “Biasi mulak hamu?” ning raja i manyapai.

⁶Dialusi halahi, “Na ro do sada bayo mandapotkon hami jana disuru ia hami mulak anso hami dok tu raja i na nidok ni TUHAN tu raja i, ‘Adong he na so adong be Debata di Israel umbaen na nisurumu mangido panogu-noguon tu Baal-Zebub debata ni halak Ekron i? Nada malum be hilalaonmu; mate noma ho!’ ”

⁷Bia tompa ni bayo i? ning raja i manyapai.

⁸“Mamake baju juba jana marbobat huling-kuling ni binatang do,” ning halahi. “O, si Elia do i!” ning raja i marsurak.

⁹Jadi disuru ia ma kehe sada parpangkat, rap dohot lima pulu halak laho manangkup si Elia. Kehe ma parpangkat i jana dapot halahi ma si Elia topet juguk-juguk di sada dolok. “Bia do naposo ni Debata,” ning parpangkat i, “Disuru raja i do ho anso manuat!”

¹⁰“Jadi anggo na tutu do au naposo ni Debata,” ning si Elia mangalusi, “Sai mijur ma api sian ginjang manutung ho dohot sude paranganmi lopus abis!” Manigor mijur ma api santongkin i manutung parpangkat i dohot paranganna na lima pulu halak i.

¹¹Jadi disuru raja i muse ma sahalak parpangkat na asing rap dohot lima pulu halak nari. Kehe ma halahi jana didok halahi ma tu si Elia, “Bia do ale naposo ni Debata, diparentahon raja i do anso manigor manuat ho saonnari!”

¹²“Anggo na tutu do au naposo ni Debata,” ning si Elia mangalusi, “Sai mijur ma nian api sian langit manutung ho rap dohot sude paranganmi!” Manigor mijur ma api ni Debata manutung parpangkat i dohot paranganna na lima pulu halak i sude.

¹³Disuru raja i ma sanoli nari sahalak parpangkat rap dohot lima pulu halak nari. Manangkok ma parpangkat i tu dolok i; jadi dung lalu ia tu jolo ni si Elia, marsinggang ma ia jana didok ia ma, “Mangido ampun ma hami o, ale naposo ni Debata! Ibo ma rohamu mida au dohot angka parangankon; ulang ma dimatehon hami!

¹⁴Dua parpangkat na asing rap dohot parangan ni halahi na mate dipangan api na sian langit; tapi mangido ma au, ibo ma rohamu mida au!”

¹⁵Manigor mangkuling ma Surusuruan Ni TUHAN tu si Elia, “Ulang ho mabiar! Ihutkon ma manuat sian dolok i.” Jadi kehe ma si Elia rap dohot parpangkat i mandapotkon raja i.

¹⁶Jadi didok si Elia ma tu raja i, “Didok TUHAN: Na nisurumu do mangido panogu-noguon tu Baal-Zebub debata ni halak Ekron — songon dia ma na so adong Debata di Israel na gabe panyapaan — jadi nada ra be ho malum; mate noma ho!”

¹⁷Jadi mate ma si Ahasia songon na nidok ni TUHAN markite-hite si Elia. Nada adong anak sinuan tunas ni si Ahasia, jadi si Joram angginia ma gabe raja manggonti ia. Di taon paduahon dung si Joram anak ni si Josafat gabe raja ni Juda, disi ma i tarjadi.

¹⁸Barita na masa na asing i taringot tu pambaenan ni Raja Ahasia madung disuratkon di Buku Sejarah Ni Raja-raja Israel.