Read Batak Angkola 2 RAJA-RAJA 11 Bible Online

2 RAJA-RAJA 11 - Batak Angkola bible

2 RAJA-RAJA 11

¹Disi tarbege tu si Atalia taringot tu hamamate ni anaknia si Ahasia i, diparentahon ia ma anso dibunu sude horong ni si Ahasia.

²Si Joas anak ni si Ahasia i pe saotik nari noma anso hona bunu rap dohot angka dakdanak ni raja i na deba nari; tapi malua do ia dibaen si Joseba namborunia i. Boru ni si Jerobeam do anggo si Joseba jana iboto ni si Ahasia asing ina. Dioban ma si Joas dohot na parorot ia jana ditabunihon tu sada bilik di Bagas Ni Debata.

³Onom taon honokna dipature-ture si Joseba dakdanak i di bagasan Bagas Ni Debata, i ma salolot si Atalia mamarenta gabe ratu.

⁴Di taon papituhon dipiohon Malim Joyada ma angka parpangkat pangawal ni ratu i dohot angka pangawal ni bagas godang anso marsuo dohot ia di Bagas Ni Debata. Disuru ia ma halahi disi marsumpa laho mandalankon sangkapnia. Dung i dipatidahon ia ma tu halahi si Joas anak ni Raja Ahasia i,

⁵jana didok ia ma parenta, “Muda markarejo hamu di Ari Sabat, angkon manjago bagas godang ma hamu sapartolu;

⁶sapartolu nari manjago Horbangan Sur, jana sapartolu nari na asing i manjago di horbangan di pudi ni angka pangawal-pangawal na asing.

⁷Sidua rombongan na so martugas di Ari Sabat, manjago di Bagas Ni Debata ma sugari maniop podang na sintak laho mangondihon Raja Joas. Angkon jagoonmunu do ia sanga na tudia ia kehe jana sanga ise na mandonohi hamu angkon bunuonmunu do.”

⁹Dioloi angka parpangkat i do parenta ni si Joyada i jana dioban halahi be ma angka parangan ni halahi na markarejo dohot na so martugas di Ari Sabat i tusia.

¹⁰Dilehen si Joyada ma tu angka parpangkat i angka hujur dohot parince ni Raja Daud na disimpan di Bagas Ni Debata i.

¹¹Humaliang ni Bagas Ni Debata i sian jolo, dibaen ia ma panjago na marpodang na sintak laho mangondihon raja i.

¹²Dung i dioban si Joyada ma si Joas tu ruar, mamake tuku di uluna i, jana dilehen ia tu si Joas tona ni Debata. Diangkat ma si Joas gabe raja jana dibaen ma boa-boana tu rayat. Martopapi ma rayat jana marsurahi, “Horas ma di raja i!”

¹³Dibege Ratu Atalia ma surak-surak ni pangawal dohot rayat i. Diompoti ia ma kehe tu Bagas Ni Debata tu inganan ni jolma na bahat i.

¹⁴Diida ia ma disi raja na imbaru i jongjong di lambung ni, di jolo ni pintu masuk tu Bagas Ni Debata mangihutkon adatna di na mangangkat angka raja. Dihaliangi angka parpangkat dohot angka parsarune do si Joas. Marmoga-moga do sude rayat i marsurahi jana laing dipalu muse ma sarune. Disibakkon si Atalia ma pakeannia tanda ni muruknia jana marsurak ma ia, “Pargabus! Pargabus!”

¹⁵Didok si Joyada tu angka parpangkat i, “Oban hamu ma ia tu ruar mamolus sian antara ni barisan ni pangawal i, jana bunu sanga ise na giot paluahon ia.” Nada giot si Joyada dibunu di Bagas Ni Debata si Atalia.

¹⁶Jadi ditangkup halahi ma ia, lalu dioban halahi ma tu bagas godang. Disi ma di jolo ni pintu Horbangan Kudo, di bunu ia.

¹⁷Disuru Malim Joyada ma Raja Joas dohot rayat mambaen parjanjian dohot TUHAN paboa na gabe halak ni TUHAN halahi; disuru ia muse ma raja i mambaen parjanjian dohot rayat.

¹⁸Dung i masuk ma rayat i laho mangarumpakkon parkaulan ni Baal; disegohon ma sude langgatanna dohot angka patungna jana dibunu ma si Matan malim ni Baal i di jolo ni angka langgatan i. Disuru si Joyada ma pangawal na manjago Bagas Ni Debata.

¹⁹Jadi rap dohot angka parpangkat, angka pangawal ni raja dohot angka pangawal ni bagas godang, ditaruhon ia ma Raja Joas sian Bagas Ni Debata lalu tu bagas godang, diudurkon rayat i sude. Masuk ma si Joas sian Horbangan Pangawal jana dipajuguk ia ma di karosi harajaan.

²⁰Marjop ni roha ma rayat sudena. Gabe sonang ma muse kota ni halahi i dung hona bunu si Atalia di bagas godang i.

²¹Marumur pitu taon ma si Joas di na gabe raja ia di Juda.