Read Batak Angkola 2 RAJA-RAJA 13 Bible Online

2 RAJA-RAJA 13 - Batak Angkola bible

2 RAJA-RAJA 13

¹Di taon padua pulu toluhon dung mamarenta si Joas anak ni si Ahasia di Juda, gabe raja ma si Joahas anak ni si Jehu di Israel jana mamarenta ma ia di Samaria pitu bolas taon honokna.

²Laing songon Raja Jerobeam na mamarenta dompak so ia, mardosa do si Joahas tu TUHAN jana laing hara ni ia mardosa muse ma halak Israel. Nada jungada ditadingkon ia angka pangalahonia na jahat i.

³Jadi gabe muruk ma TUHAN tu Israel, jana dipadiar TUHAN ma sanga piga-piga noli ro si Hasael raja ni Siria dohot anakna si Benhadad manaluhon Israel.

⁴Jadi martangiang ma si Joahas tu TUHAN, jana ditangihon TUHAN ma tangiangnia i angke diida ia ma sanga songon dia hacitna pambaenan ni raja Siria i mamisat halak Israel.

⁵Jadi dilehen TUHAN ma sahalak pamimpin di halak Israel na paluahon halahi sian gomgoman ni Siria, lopus marsonang-sonang halahi mangulahi mangolu songon di mulana.

⁶Tapi haru songon i pe laing nada mantak halahi mambaen angka dosa na dipungka ni Raja Jerobeam. Laing dipadiar halahi do patung ni debata boru-boru Asera hot di Samaria.

⁷Dibunu raja Siria i do bangso Israel, jabat do hum lima pulu tentara na markudo tinggal, hum sampulu kareta porang jana hum sampulu ribu halak sajo noma parajurit sian tentara ni si Joahas.

⁸Barita na asing taringot tu Raja Joahas dohot sude na denggan hara ni hagogoonnia, madung disuratkon di Buku Sejarah Ni Raja-raja Israel.

⁹Mate ma ia jana dikuburkon di Samaria. Anaknia si Joas ma manggonti gabe raja.

¹⁰Di taon patolu pulu pituhon dung mamarenta si Joas di Juda, gabe raja ma si Joas anak ni si Joahas di Israel jana mamarenta ia di Samaria onom bolas taon honokna.

¹¹Laing mardosa muse do ia tu TUHAN dibaen diihutkon ia do hajahatan ni Raja Jerobeam na mambaen gabe mardosa halak Israel.

¹²Barita na asing taringot tu si Joas dohot sude habetengonnia di parporangan mangalo si Amasia, raja ni Juda madung disuratkon di Buku Sejarah Ni Raja-raja Israel.

¹³Mate ma si Joas jana dikubur di kuburan ni angka raja di Samaria. Anaknia si Jerobeam II ma gabe raja manggonti ia.

¹⁴Sanoli posi ma marnyae si Elisa, jana ro ma Raja Joas mangaligi ia. Dung diida ia na giot mate noma si Elisa, tangis ma raja i jana didok ia ma, “Amang, Amang, pangondian godang ni Israel.”

¹⁵“Buat ma sior dohot pana!” ning si Elisa tusia. Dibuat si Joas ma i,

¹⁶jadi disuru si Elisa ma ia manyintak pana i. Disintak raja i ma siorna i, jana dipayakkon si Elisa ma tangannia di tangan ni raja i.

¹⁷Dung i hombar tu na nidok ni panurirang i, dibuka raja i ma jandela na adop Siria. “Palua ma panami!” ning si Elisa. Disi dipalua raja i pana i, marsurak ma panurirang i mandok, “Ho ma pana ni TUHAN, dohot pana i ma taluhonon ni TUHAN Siria. Marporang ma ho mangalo Siria di Afek lopus talu halahi baenonmu.”

¹⁸Dung i disuru buat si Elisa ma tu Raja Joas angka pana na asing i jana dilipatkon tu tano i. Dilipat raja i ma tano i tolu noli, dung i diantak ia.

¹⁹Muruk ma si Elisa lalu didok ia ma, “Angkon adong nian lima sanga onom noli lipatkononmu gabe tarsarsarkon ho ma bangso Siria. Tapi saonnari hum tolu noli sajo do taluhononmu halahi.”

²⁰Nada sadia honok mate ma si Elisa jana dikuburkon. Di hatiha i pinomatna sanoli sataon laing na ro do halak Moab mamorangi Luat Israel.

²¹Sanoli hatiha mangubur na mate halak, tompu ma diida halahi ro garombolan ni Moab. Manigor disampakkon halahi ma bangke i tu bagasan kuburan ni si Elisa, kehe halahi marlojongi. Disi dais bangke i tu holi-holi ni si Elisa i, gabe mangolu ma mangulahi lalu jongjong.

²²Salolot si Joas mamarenta, sai na disosak ni si Hasael raja ni Siria i do halak Israel.

²³Tapi nada unjung dihalupahon TUHAN bangsoNia i. Ibo jana denggan do rohaNia tu halahi. Nada dipadiar Ia halahi dipasude tapi ditolong Ia do halahi, hara ni parjanjianNia dohot si Abraham, si Ishak dohot si Jakob.

²⁴Dung i mate ma si Hasael raja ni Siria i, jana anaknia si Benhadad ma gabe raja.

²⁵Jadi ditaluhon si Joas raja ni Israel i ma si Benhadad tolu noli jana dibuat ia ma mangulahi angka kota na nirampas ni si Benhadad di hatiha ni Raja Joahas amang ni si Joas mamarenta.