Read Batak Angkola 2 RAJA-RAJA 14 Bible Online

2 RAJA-RAJA 14 - Batak Angkola bible

2 RAJA-RAJA 14

¹Di taon paduahon dung mamarenta si Joas anak ni si Joahas di Israel, gabe raja ma si Amasia anak ni si Joas di Juda.

²Marumur dua pulu lima taon ma ia di hatiha i jana dua pulu sambilan taon honokna ia mamarenta di Jerusalem. Si Joadan do inangnia boru sian Jerusalem i.

³Dipatupa si Amasia do na pasonangkon roha ni TUHAN. Tapi nada songon si Daud ompuna i ia, angke songon amana,

⁴laing nada disegohon ia angka inganan pamelean ni debata gabe laing torus do anggo rayat mamele dohot manutung hamonyan disi.

⁵Disi mamungka togu parjuguknia gabe raja, disuru bunu ia ma manigor angka pagawe na mamunu amangnia.

⁶Tapi anggo dakdanak ni angka pagawe i, nada dipabunuhon ia, angke diihutkon ia do parenta ni TUHAN na di bagasan Buku Ni si Musa i na mandok, “Ulang nimatehon ama-ama hara ni hajahatan ni angka dakdanakna, jana ulang nimatehon angka dakdanak hara ni hajahatan ni simatobangna. Sanga ise pe, hum hara ni hajahatanna sandiri do na tola nimatehon.”

⁷Di sada parporangan dibunu si Amasia do sampulu ribu parangan ni Edom di Rura Na Ancim, jana dibuat ia kota Sela jana digoari ia ma kota i gabe Jokteel. Lalu tu sadari on laing Jokteel do goar ni kota i.

⁸Dung i disuru si Amasia ma utusan mandapotkon si Joas raja ni Israel laho mangalap-alapi anso marporang halahi.

⁹Tapi disuruhon si Joas ma utusan na maroban alus songon on, “Sanoli martona ma tada-tada di partoran Libanon tu sada bona ni sampinur, ‘O sampinur, lehen ma borumi di anakku gabe parsondukna.’ Tapi dung salpu i mamolus ma sada binatang harangan, didege-dege ma tada-tada i.

¹⁰Hara ni na dung talu dibaen ho halak Edom ale Amasia, gabe ginjang ma rohamu. Dumengganan ma marmoga-moga ho hara ni hamonanganmi, di bagasmu ma ho. Aha ma gunana di ho mangalap-alapi hasusaan na hum pabaen-baen mago tu ho sandiri dohot tu rayatmu?”

¹¹Tapi nada diampirkon si Amasia i. Jadi gabe kehe ma Raja Joas dohot angka dongannia tu Bet-Semes na di Juda jana marporang ma ia mangalo si Amasia.

¹²Talu ma pasukan ni si Amasia, marmulahan ma sude parajuritnia tu bagasna be.

¹³Ditangkup si Joas ma si Amasia, masuk ma ia tu Jerusalem jana ditapor ia ma parik ni kota i adong dua ratus meter, mamungka sian Horbangan Efraim lalu tu Horbangan Suhi.

¹⁴Sude sere dohot perak na niidania, dohot sude parkokas ni Bagas Ni Debata dohot sude sinadongan na di bagas godang, dibuat ia sudena lalu dioban ia rap dohot piga-piga halak nari jolma gabe taban tu Samaria.

¹⁵Barita na asing taringot tu Raja Joas, dohot habetengonnia di parporangan mangalo si Amasia raja ni Juda, madung disuratkon di Buku Sejarah Ni Raja-raja Israel.

¹⁶Jumolo ma si Joas jana dikuburkon di kuburan ni raja-raja di Samaria. Anaknia si Jerobeam II ma manggonti ia gabe raja.

¹⁷Dung mate si Joas raja ni Israel i, laing mangolu dope si Amasia raja ni Juda i lima bolas taon nari.

¹⁸Dung i adong ma kompolotan di Jerusalem laho mamunu ia. Hara ni i gabe maporus ma ia tu Lakis, tapi laing dikojar angka musuna i do ia tusi jana dibunu ma ia disi. Dioban do bangkenia i markudo mulak tu Jerusalem, lalu dikubur di kuburan ni raja-raja di Kota Ni si Daud. Gabe diangkat rayat ni Juda ma si Usia anak ni si Amasia gabe raja. Marumur onom bolas taon dope hatiha i si Usia. Barita na asing taringot tu Raja Amasia, madung disuratkon di Buku Sejarah Ni Raja-raja Juda.

²²Dung hamamate ni amangna i, dirampas si Usia ma mangulahi kota Elat jana dibangun ia ma i mangulahi.

²³Di taon palima bolaskon mamarenta si Amasia di Juda, gabe raja ma si Jerobeam II anak ni si Joas di Israel jana opat pulu sada taon honokna ia mamarenta di Samaria.

²⁴Mardosa do ia tu TUHAN, angke diihutkon ia do hajahatan ni Raja Jerobeam I na mambaen halak Israel gabe mardosa.

²⁵Si Jerobeam II on ma na mambuat sude luat ni Israel mangulahi, mamungka sian dalan tu Hamot di Utara lalu tu Laut Mate di Selatan. Domu do i tu janji ni TUHAN, Debata ni Israel marhite naposoNa Panurirang Junus anak ni si Amitai halak Gathefer i.

²⁶Diida TUHAN do sanga songon dia hancitna halak Israel jana umpe adong sahalak na mangurupi halahi.

²⁷Nada giot agohonon ni TUHAN Israel salolot-lolotna, jadi hara ni i ditolong TUHAN ma halahi marhite Raja Jerobeam II.

²⁸Barita na asing taringot tu Raja Jerobeam II, taringot tu habetengonnia di angka parporangan bope sanga songon dia dibaen ia mangarampas Damaskus dohot Hamat di halak Israel, sudena i madung disuratkon di Buku Sejarah Ni Raja-raja Israel.

²⁹Mate ma si Jerobeam II jana dikubur di kuburan ni raja-raja. Anaknia si Zakaria ma gabe raja manggonti ia.