Read Batak Angkola 2 RAJA-RAJA 15 Bible Online

2 RAJA-RAJA 15 - Batak Angkola bible

2 RAJA-RAJA 15

¹Di taon padua pulu pituhon mamarenta Raja Jerobeam II di Israel gabe raja ma si Usia anak ni si Amasia di Juda.

²Marumur onom bolas taon dope ia hatiha i jana mamarenta ma ia di Jerusalem lima pulu dua taon honokna. Si Jekolya do inangnia boru sian Jerusalem i.

³Laing songon amangna dipatupa si Usia do angka pangalaho na pasonangkon roha ni TUHAN.

⁴Tapi anggo angka inganan pamelean tu debata sileban nada disegohon ia, jadi anggo rayat laing tong do mamelehon haul tusi dohot manutung hamonyan.

⁵Huliton do ia dibaen TUHAN, jorbut sajo. Hara ni na so marnamalum nyaenia i, gabe dipaasing ma ia di sada bagas, jana dipalua ma ia sian angka karejonia lopus mate ia. Anaknia na margoar si Jotam ma mamarenta rayat i songon wakilnia.

⁶Barita na asing taringot tu Raja Usia, madung disuratkon di Buku Sejarah Ni Raja-raja Juda.

⁷Jumolo ma Raja Usia jana dikuburkon di kuburan ni raja-raja di Kota Ni si Daud. Anaknia si Jotam ma gabe raja manggonti ia.

⁸Di taon patolu pulu salapankon mamarenta Raja Usia di Juda gabe raja ma si Zakaria anak ni si Jerobeam II di Israel jana mamarenta ia di Samaria onom bulan honokna.

⁹Tudos tu angka raja na mamarenta di jolonia, ia pe laing mardosa do tu TUHAN. Diihutkon ia do hajahatan ni Raja Jerobeam I, na dung mambaen halak Israel gabe mardosa.

¹⁰Mambaen kompolotan ma si Salum anak ni si Jabes mangalo Raja Zakaria, jana mamunusa di Jibleam, jana ia gabe raja manggontihonsa.

¹¹Jadi songon i ma dalanna anso tulus sanga aha na nijanjihon ni TUHAN tu Raja Jehu bahaso pomparannia lopus tu sundut paopatkon do gabe raja ni Israel. Barita na asing taringot tu Raja Zakaria madung disuratkon di Buku Sejarah Ni Raja-raja Israel.

¹³Di taon patolu pulu sambilankon mamarenta Raja Usia di Juda, gabe raja ma si Salum di Israel. Hum sabulan do ia mamarenta di Samaria

¹⁴hara ni na ro si Menahem anak ni si Gadi sian Tirsa tu Samaria mamunu si Salum, jana gabe raja ia manggonti si Salum.

¹⁵Di pardalanannia sian Tirsa, disegohon ia ma kota Tapuah rap dohot sude halak kota i dohot angka luat na humaliang i; dibolai ia ma butuha ni angka ina na denggan pamatangna. Na so ra do tunduk tusia halak kota i umbaen na dibaen ia songon i. Barita na asing taringot tu si Salum, dohot parpokatan na nibaennia, madung disuratkon di Sejarah Sejarah Ni Raja-raja Israel.

¹⁷Di taon patolu pulu sambilankon mamarenta Raja Usia di Juda gabe raja na si Menahem anak ni si Gadi di Israel jana mamarenta ia di Samaria sampulu taon honokna.

¹⁸Salolot mangolu ia, sai mardosa do ia tu TUHAN hara ni na mangihutkon hajahatan ni Raja Jerobeam i, na mambaen halak Israel gabe mardosa.

¹⁹Dompak ro si Pul[6] raja ni Asur mamorangi Israel, dilehen si Menahem ma tusia 34.000 kilo perak anso diurupi ia pahotkon kuaso ni si Menahem di Israel.

²⁰Sian angka halak na kayo di Israel do dijagit si Menahem hepeng i, di na nipaksania sandok halak anso mangalehen lima pulu be hepeng perak. Jadi gabe ditinggalkon si Pul ma luat i jana mulak ma ia tu tanonia sandiri.

²¹Barita na asing taringot tu Raja Menahem madung disuratkon di Buku Sejarah Ni Raja-raja Israel.

²²Marujung ma ngolunia jana dikuburkon, jana anaknia si Pekahya ma gabe raja gontinia.

²³Di taon palima puluhon mamarenta Raja Usia di Juda, gabe raja ma si Pekahya anak ni si Menahem di Israel jana mamarenta ma ia di Samaria dua taon honokna.

²⁴Mardosa do ia tu TUHAN hara ni na niihutkonnia hajahatan ni Raja Jerobeam I na mambaen halak Israel mardosa.

²⁵Sahalak sian angka tentarania na marpangkat, na margoar si Pekah anak ni si Remalia, mambaen kompolotan rap dohot lima pulu halak na sian Gilead, lalu dibunu halahi ma si Pekahya di sada benteng di bagas godang na di Samaria rap dohot dua halak na asing na margoar si Argob dohot si Arye. Dung i gabe raja ma si Pekah manggontihon si Pekahya.

²⁶Barita na asing taringot tu si Pekahya madung disuratkon di Buku Sejarah Ni Raja-raja Israel.

²⁷Di taon palima pulu duahon mamarenta Raja Usia di Juda, gabe raja ma si Pekah anak ni si Remalia di Israel. Dua pulu taon honokna mamarenta ia di Samaria.

²⁸Mardosa do ia tu TUHAN hara ni na niihutkonnia hajahatan ni Raja Jerobeam I na mambaen halak Israel mardosa.

²⁹Di hatiha ni si Pekah mamarenta, dirampas si Tiglat-Pileser raja ni Asur ma kota Iyon, Abel-Bet-Maaka, Janoah, Kedes, Hasor, Luat Gilead, Galilea dohot Naftali. Dioban ia muse ma halak kota i gabe taban tu Asur.

³⁰Di taon padua puluhon mamarenta Raja Jotam anak ni si Usia di Juda, mambaen kompolotan ma si Hosea anak ni si Ela mangalo Raja Pekah jana dibunu ia ma si Pekah, lalu ia ma gabe raja manggontisa.

³¹Barita na asing taringot tu Raja Pekah madung disuratkon di Buku Sejarah Ni Raja-raja Israel.

³²Di taon paduahon mamarenta Raja Pekah anak ni si Remalia di Israel, gabe raja ma si Jotam anak ni si Usia di Juda.

³³Marumur dua pulu lima taon ma ia di hatiha i, jana onom bolas taon honokna ia mamarenta di Jerusalem. Si Jerusa do inangnia boru ni si Zadok.

³⁴Dipatupa si Jotam do angka pangalaho na pasonangkon roha ni TUHAN, songon na nibaen ni amangnia si Usia.

³⁵Tapi anggo angka inganan parsombaan ni debata nada disegohon ia, jadi laing torus do anggo rayat mamelehon haul dohot na manutung hamonyan disi. Si Jotam on ma na mambangun Horbangan Utara na di Bagas Ni Debata.

³⁶Di hatiha ni si Jotam mamarenta, mamungka ma ditongos TUHAN si Resin raja ni Siria dohot si Pekah raja ni Israel laho mamorangi Juda. Barita na asing taringot tu Raja Jotam, madung disuratkon di Buku Sejarah Ni Raja-raja Juda.

³⁸Jumolo ma ia jana dikuburkon di kuburan ni raja-raja di Kota Ni si Daud jana anaknia na margoar si Ahas ma gabe raja gontinia.