Read Batak Angkola 2 RAJA-RAJA 16 Bible Online

2 RAJA-RAJA 16 - Batak Angkola bible

2 RAJA-RAJA 16

¹Di taon papitu bolaskon mamarenta Raja Pekah anak ni si Remalia di Israel, gabe raja ma si Ahas anak ni si Jotam di Juda.

²Marumur dua pulu taon ma ia di hatiha i jana onom bolas taon honokna mamarenta ia di Jerusalem. Nada diihutkon ia tiruan na denggan sian Raja Daud, ompuna i, tapi angka pangalaho na nihagigihon ni TUHAN, Debatania do dibaenia.

³Tiruan ni angka raja ni Israel do diihutkon ia, salangkan anaknia sandiri pe dipasahat ia do gabe haul tu gana-ganaan, mangihutkon hasomalan na so ture di angka jolma na hona usir ni TUHAN sian Luat Kanaan di na masuk halak Israel tu luat i.

⁴Dipelehon si Ahas do angka haul jana ditutung ia do hamonyan di angka inganan pamelean ni debata di angka dolok dohot di toru ni angka hayu na rumbun-rumbun.

⁵Di hatiha i dikuasoi raja Edom ma mangulahi kota Elat jana diusir ia ma angka halak Juda na maringanan disi. Dung i ro ma halak Edom jana laing maringanan di kota i ma halahi lopus tu sadari on. Laing di hatiha i ma ro si Resin raja ni Siria dohot si Pekah raja ni Israel mamorangi dohot manghobuk Jerusalem, tapi anggo si Ahas nada tartaluhon halahi.

⁷Disuru si Ahas ma partonaan tu si Tiglat-Pileser raja ni Asur mandok songon on, “Naposomu na burju do au; jadi hara ni i, ro ma ho paluahon au sian raja ni Siria dohot Israel na topet mamorangi au.”

⁸Ditongoskon ia muse ma siluania sere dohot perak na sian Bagas Ni Debata, dohot sinadongan na sian bagas ni raja.

⁹Dioloi Raja Tiglat-Pileser do pangidoan ni si Ahas i, diroro ia ma kota Damaskus lalu dirampas ia. Dioban ia ma halak kota i tu Kir gabe taban, jana dibunu ia ma anggo Raja Resin.

¹⁰Di na kehe Raja Ahas tu Damaskus laho mandapoti Raja Tiglat-Pileser, diida ia ma langgatan di kota i. Laing ditongoskon ia ma tudosan ni langgatan i tu Malim Uria di Jerusalem singkop dohot ukuranna sudena.

¹¹Gabe dipajongjong si Uria ma sada langgatan dos dohot gambaran dohot ukuran na nijagitnia i, jana dipasidung ia ma i painte so mulak si Ahas.

¹²Disi lalu si Ahas sian Damaskus, diida ia ma hape madung sidung langgatan i.

¹³Jadi dihaulkon ia ma haul binatang dohot haul gandum di ginjangna i, lalu diduruskon ia ma haul anggur dohot mudar na sian haul pardamean.

¹⁴Diida si Ahas ma anggo langgatan tumbaga na nihasurungkon tu TUHAN, payak di antara ni Bagas Ni Debata dohot langgatan na imbaru i. Jadi gabe dipaimbar ia ma langgatan tumbaga i sian jolo ni Bagas Ni Debata tu sabola Utara ni langgatannia na imbaru i.

¹⁵Dung i didok ia ma tu si Uria, “Pake ma langgatanku na godang on panutungan ni haul manyogot dohot haul borngin na nihaulkon ni raja dohot rayat, jana duruskon ma disi haul anggur na sian rayat. Laing siram ma langgatan i dohot mudar ni sude binatang na nihaulkon. Jana langgatan tumbaga i padiar ma au mamakesa.”

¹⁶Dipatulus si Uria ma sanga aha na niparentahon ni raja i.

¹⁷Dung i dibungkar si Ahas ma sude angka kareta tumbaga na nipake di Bagas Ni Debata, jana dipartalduskon ia ma angka sambong sian angka kareta i. Bak tumbaga na di tanggurung ni sidua bolas lombu tumbaga i pe laing dibuat ia do i jana dipayakkon ia marojahan di batu.

¹⁸Jadi laho mambaen sonang roha ni raja Asur, dirorak si Ahas ma balerong ni raja na di Bagas Ni Debata, laing ditutup ia muse ma pintu hamasuhan ni raja na disi.

¹⁹Barita na asing taringot tu Raja Ahas madung disuratkon di Buku Sejarah Ni Raja-raja Juda.

²⁰Marujung ma ngolu ni si Ahas jana dikuburkon ma di kuburan ni raja di Kota Ni si Daud. Anaknia na margoar si Hiskia ma gabe raja gontinia.