Read Batak Angkola 2 RAJA-RAJA 18 Bible Online

2 RAJA-RAJA 18 - Batak Angkola bible

2 RAJA-RAJA 18

¹Di taon patoluhon mamarenta Raja Hosea anak ni si Ela di Israel, gabe raja ma si Hiskia anak ni si Ahas di Juda.

²Marumur dua pulu lima taon ma ia hatiha i jana dua pulu sambilan taon honokna mamarenta ia di Jerusalem. Si Abi do goar ni inangnia boru ni si Zakaria.

³Dipatupa si Hiskia do na pasonangkon roha ni TUHAN mangihutkon tiruan ni ompuna Raja Daud.

⁴Angka inganan pamelean ni gana-ganaan, disegohon ia; angka tugu ni debata dirumpakkon ia, jana angka patung ni debata boru-boru Asera ditaporkon ia. Laing disegohon si Hiskia muse do ulok tumbaga na nibaen ni si Musa, na margoar Nehustan. Harana lopus tu hatiha i laing ditutung halak dope hamonyan laho mamparsangapi ulok tumbaga i.

⁵Sian sude raja ni Juda, na di jolonia dohot na di pudinia, nada adong be na songon si Hiskia. Dihaporsayai ia do TUHAN, Debata ni Israel,

⁶jana burju do ia tu TUHAN i. Nada unjung dialo ia TUHAN, sandok parenta ni TUHAN na nilehenNa marhite si Musa, disitutui si Hiskia do mangoloi sudena i.

⁷Hara ni i ma umbaen na sai diurupi TUHAN ia gabe manjadi sanga aha pe na nikarejohonnia. Mamberontak do ia tu raja Asur jana nada ra ia tunduk tusi.

⁸Ditaluhon ia halak Pilistin jana dirampasi ia inganan ni halahi, mamungka sian kota na ummenek lalu tu kota na gumodang, tarmasuk ma disi Gasa dohot luat na humaliang.

⁹Di taon paopatkon dung mamarenta si Hiskia, i ma taon papituhon dung mamarenta Raja Hosea di Israel, ro ma si Salmaneser raja ni Asur mamorangi Israel jana dihobuk ia Samaria.

¹⁰Dung dihobuk tolu taon, madabu ma Samaria; di taon paonomkon ma i masa dung mamarenta si Hiskia jana di taon pasambilankon dung mamarenta si Hosea.

¹¹Dung i dioban raja Asur ma halak Israel gabe taban tu Asur; dibaen ia ma deba sian halahi di Hala, deba di lambung ni Batang aek Habor di Luat Gosan, jana na deba nari di angka kota na di Luat Madai.

¹²Madabu pe Samaria, hara ni na so mangoloi do angka halak Israel tu TUHAN, Debata ni halahi, digagai halahi parjanjian na nibaen ni TUHAN dohot halahi jana dilanggar halahi sude parenta ni si Musa naposo ni TUHAN i. Nada ra halahi manangihon dohot mangoloi.

¹³Di taon paopat bolaskon dung mamarenta Raja Hiskia, diporangi si Sanherib raja ni Asur ma angka kota na marbenteng di Juda lopus ditaluhon.

¹⁴Gabe ditongos si Hiskia ma tu si Sanherib na topet di Lakis tona songon on hatana, “Ma sala au. Jadi hara ni i hupangido sugari sura nian rade ma tuan i mangantak parporangan on maradopkon hami; sanga aha na nipangido ni tuan i hulehen pe.” Alus ni si Sanherib, angkon tongoson ni si Hiskia do sampulu ribu kilo perak dohot sere saribu kilo.

¹⁵Jadi sude perak na adong di Bagas Ni Debata dohot na di bagasan kas ni bagas godang, ditongos si Hiskia ma tu si Sanherib.

¹⁶Sere na di angka pintu ni Bagas Ni Debata dohot angka na nibaen ni si Hiskia sandiri di pamalpal ni angka pintu i, dibuat ia muse ma i jana ditongoskon ia tu si Sanherib.

¹⁷Tapi laing disuru raja Asur dope sian Lakis sada pasukan sibahat-bahat laho mamorangi Jerusalem. Pasukan i na nipimpin ni tolu halak soridadu, i ma panglima parhobas ni siinumon dohot kapala pangawal ni raja. Lalu ma halahi tu kota i jana diingani halahi ma dalan na margoar Ladang Panyucian di lambung ni undung-undung hapuasan ni aek na sian tobat parginjang.

¹⁸Dung i disuru halahi ma halak mamiohon Raja Hiskia. Jadi ro ma tolu halak pagawe ni Raja Hiskia, mandapotkon halahi, i ma si Elyakim anak ni si Hiskia kapala ni sirajai arta di bagas godang ni raja, si Sebna sekretaris ni negara, dohot si Joah anak ni si Asap bendahara ni negara.

¹⁹Didok sahalak parpangkat ni Asur i ma tu halahi, “Pasahat hamu ma tu Raja Hiskia hata ni raja Asur on: ‘Biasi, songon halak na gogo ho dihilala ho?

²⁰Diambang ho do lakna tuk ma hata sajo laho manggonti siasat dohot hagogoon ni tentara! Ise dehe lakna na nipangasahonmu, umbaen na puluk ho mangalo Asur?

²¹Dipangasahon ho ma hape Mesir, tudos tu na martungkotkon arung do i; maponggol ma tungkotmi, hona susuk muse ma tanganmi. Songon i ma halak Mesir di sude halak na mararop roha tusi.’ ”

²²Dung i didok parpangkat i muse ma, “Sanga betak na didok hamu do na mararop roha tu TUHAN, Debatamunu i hamu? Di na niparentahon ni si Hiskia lakna anso hum di jolo ni langgatan na di Jerusalem i sajo manyomba halak Juda dohot Jerusalem, inda he langgatan dohot angka inganan parsombaan tu TUHAN i sandiri na nisego-segonia?

²³Saonnari tahan ma au martaru mangasahon goar ni raja Asur, sugari dilehen pe di hamu dua ribu kudo, pasti nada adong halak dapot hamu sabahat ni i manenggetsa!

²⁴Hum maradopan dohot perwiranami na partoru pe, nada tuk dope hamu alo-aloni i. Hape diarop rohamunu ma tongoson ni Mesir bantuan kareta porang dohot pasukan na markudo!

²⁵Na diambang hamu do lakna hami porangi hamu jana hami taluhon so pola dohot pangurupion ni TUHAN? TUHAN sandiri do marsuru hami mamorangi dohot mangaroncohon hamu!”

²⁶Jadi didok si Elyakim, si Sebna dohot si Joah ma tu parpangkat i, “Marhata Aram ma da tuan i tu hami, hami astui do i. Ulang pola marhata Ibrani, naron diastui rayat na di ginjang ni tembok ni kota on.”

²⁷Dialusi parpangkat i ma, “Ulang diambang hamu diutus raja Asur au laho palaluhon sudena on tu hamu dohot tu rajamunu i sajo. Laing dohot do tu rayat na di tembok i hami mandok hata, na rap mangankon kotoranna dohot hamu sandiri dohot na minum aek na menekna sandiri.”

²⁸Dung i jongjong ma parpangkat i jana marsurak ma ia di hata Ibrani, “Tangihon hamu! Songon on pandok ni raja Asur:

²⁹‘Ulang hamu ra dipaoto-oto si Hiskia; nada tarpalua ia hamu.

³⁰Ulang patangi-tangi hamu pangelek-eleknia anso mararop roha tu TUHAN. Ulang diambang hamu ra TUHAN paluahon hamu sanga mangambati tentara ni Asur laho mangarampas kotamunu.

³¹Ulang patangi-tangi hamu si Hiskia. Au raja Asur mamarentahon tu hamu anso ruar hamu sian kota i, menyerah ma hamu. Panganonmunu ma muse batu ni anggur sian kobunmunu sandiri, hatonggihononmunu ma batu ni anggur sian suan-suananmunu sandiri, jana inumonmunu ma aek sian sumurmunu sandiri,

³²lopus hupabungkas hamu tu sada luat na tudos tu luatmunu sandiri. Adong do disi kobun anggur na mangalehen anggur suha di hamu, adong do ladang ni gandum na mangalehen topung sipanganonmunu. Bahat do di luat i bona ni zetun, miak zetun dohot aer ni loba. Muda ra hamu mangihutkon na huparentahon tu hamu, mangolu ma hamu, nada mate. Ulang patangi-tangi hamu anggo si Hiskia. Hum na paoto-otohon hamu do i anso diambang hamu ro TUHAN laho paluahon hamu.

³³Unjung ma he adong debata ni bangso na asing paluahon luatna sandiri sian kuasongku?

³⁴Di dia ma he debata ni Luat Hamot dohot Arpad? Di dia ma he debata ni Sefarwaim, debata ni Hena dohot debata ni Iwa? Adong ma he na ro paluahon Samaria?

³⁵Debata dia ma he na jungada paluahon luatna sian kuasongku? Jadi ulang dihirim hamu tarbaen TUHAN laho paluahon Jerusalem!’ ”

³⁶Tarhohom ma halak Jerusalem umbege hata i umpe sangkababa hata didok halahi, boti madung didok Raja Hiskia anso sip sajo halahi.

³⁷Jadi disibakkon si Elyakim, si Sebna dohot si Joah ma pakean ni halahi hara ni marsakna. Jadi kehe ma halahi paboahonna tu raja i sanga aha na nidok ni parpangkat ni Asur i.