Read Batak Angkola 2 RAJA-RAJA 2 Bible Online

2 RAJA-RAJA 2 - Batak Angkola bible

2 RAJA-RAJA 2

¹Dapot ma hatihana di TUHAN laho mangangkat si Elia tu banua ginjang markite-hite halingsungsung. Hatiha i madung kehe si Elia dohot si Elisa sian Gilgal;

²jadi di tonga dalan didok si Elia ma tu si Elisa, “Dison ma ho; disuru TUHAN do anggo au kehe tu Betel!” Tapi dialusi si Elisa ma, “Mangasahon TUHAN na mangolu i dohot mangasahon hosamu Amang, nada giot tadingkononku ho Amang.” Jadi gabe rap ma halahi manoruskon pardalanan tu Betel.

³Ro ma sarombongan panurirang na maringanan disi mandapotkon si Elisa jana manyapai, “Diboto ho dehe na giot buaton ni TUHAN di ari on tuanmi jana tinggalkononna ho?” “Olo huboto do i,” ning si Elisa. “Tapi tuk ma i, indangkon be sai tahatai taringot tusi.”

⁴Dung i didok si Elia ma tu si Elisa, “Dison ma ho; disuru TUHAN do au tu Jeriko.” Tapi dialusi si Elisa ma, “Hara ni TUHAN na mangolu i bope hara ni ho Amang, nada ra au manadingkon ho Amang.” Jadi gabe rap kehe ma halahi na dua tu Jeriko.

⁵Ro ma sarombongan panurirang na maringanan disi mandapotkon si Elisa, disapai halahi ma, “Diboto ho dehe na giot buaton ni TUHAN di ari on tuanmi jana tinggalkononna noma ho?” “Olo, huboto do i,” ning si Elisa mangalusi. “Tapi madung i, indangkon be sai tahata-hatai taringot tusi.”

⁶Dung i didok si Elia ma tu si Elisa, “Dison ma ho; disuru TUHAN do au tu Batang aek Jordan.” Tapi dialusi si Elisa ma, “Hara ni TUHAN na mangolu i, bope hara ni ho Amang, nada giot tinggalkononku Amang.” Jadi kehe ma halahi

⁷tu Batang aek Jordan jana mangihut ma tu halahi panurirang lima pulu halak nari. Jadi maradian ma halahi di topi ni batang aek i, jana panurirang silima pulu halak i marjongjongan ma nada sadia dao sian halahi.

⁸Ditalduskon si Elia ma jubania i, dibalun ia jana dilipatkon ia ma tu batang aek i. Jadi marbagi dua ma aek i, lopus tardalani ia dohot si Elisa tandolan na mahiang i.

⁹Dung di bariba, disapai si Elia ma tu si Elisa, “Aha do giotmu baenonku tu ho painte so dibuat TUHAN au, maninggalkon ho?” Dialusi si Elisa ma, “Pateankon ma Amang tu au kuaso[1] ni Amang i, anso gabe au panggonti ni Amang.”

¹⁰“Na maol do i,” ning si Elia. “Tapi muda diida ho au di na giot buaton ni TUHAN au, tulus do pangidoanmi. Muda inda diida ho au, nada tulus pangidoanmi.”

¹¹Laing mangkobar-kobari do halahi di na mardalan i. Jadi ompot ma ro sada kareta na marapi na nitarik ni kudo na marapi mayirang halahi na dua, jadi diangkat halingsungsung ma si Elia tu banua ginjang.

¹²Disi diida si Elisa manigor marsurak ma ia, “Amang Elia! O Amang! Halak na godang di Israel! Nada adong be ho!” Jadi mago ma si Elia sian parnidaan ni si Elisa. Hara ni marsakna disibakkon si Elisa ma jubania bola dua.

¹³Dung i dijomput ia ma juba ni si Elia na madabu i, mulak ma ia jongjong di topi ni Batang aek Jordan i.

¹⁴Dung i dilipatkon ia ma juba ni si Elia i tu aek i didok ia ma, “Di dia dehe TUHAN, Debata ni si Elia i?” Dung bola dua aek i dilipat ia, taripar ma ia tu bariba.

¹⁵Diida panurirang silima pulu halak na sian Jeriko ma ia, jana didok halahi ma, “Pinda do kuaso ni si Elia i tu si Elisa!” Kehe ma halahi mandapotkon ia marsomba di jolonia

¹⁶jana didok halahi ma, “Lima pulu halak hami on, sude do na gogo-gogo. Hara ni i, beta ma tajalahi si Elia tuanmi. Betak na nioban ni Tondi Ni TUHAN do ia tu dolok sanga tu rura, gabe ditadingkon ia disi.” “Indangkon pola!” ning si Elisa mangalusi.

¹⁷Tapi laing disosak-sosak halahi ma ia lopus ra. Jadi kehe ma panurirang silima pulu halak i manjalahi si Elia jabat tolu ari, hape nada marsuo halahi.

¹⁸Dung i mulak ma halahi mandapotkon si Elisa na topet painte-intehon di Jeriko. “Hudok hian do tu hamu, indangkon sai kehe!” ning si Elisa tu halahi.

¹⁹Jadi ro ma piga-piga halak sian Jeriko mandapotkon si Elisa mandok, “Songon na niida ni amang jeges ni kota on, hape aekna nada denggan; jana gabe sai haambungan angka ina na marorot pamatangna dibaensa.”

²⁰“Buat hamu ma mangkuk na imbaru,” ning si Elisa, “Jana baen hamu ma sira tu bagasan.” Jadi dioban halahi ma tusia na nipangidonia i.

²¹Jadi kehe ma si Elisa tu mual ni aek mandanggurkon sira i tu bagasan aek i jana didok ia ma, “On ma na nidok ni TUHAN, ‘Hupapita ma aek on anso ulang be sai mambaen hamatean sanga haambungan!’ ”

²²Mamungka sian i pita ma aek i, songon na nidok ni si Elisa i.

²³Dung i kehe ma si Elisa sian Jeriko tu Betel. Di tonga dalan marroan ma angka dakdanak sian kota mangalayas-layasi tusia, “O palpal, palpal, morot ho sian on!” ning halahi marsurahi.

²⁴Manaili ma si Elisa manatap halahi jana diburai ia ma halahi mangasahon goar ni TUHAN. Jadi manigor ro ma dua gompul boru-boru sian ramba i manyibak-nyibak opat pulu dua halak sian dakdanak i.

²⁵Dipatorus si Elisa ma pardalanannia tu Dolok Karmel, dung i mulak tu Samaria.