Read Batak Angkola 2 RAJA-RAJA 20 Bible Online

2 RAJA-RAJA 20 - Batak Angkola bible

2 RAJA-RAJA 20

¹Laing di ombas i baroon ma Raja Hiskia hancit sajo jabat giot mate ia. Ditopot Panurirang Jesaya anak ni si Amos ma ia jana didok ma tusia, “Madung ditonahon TUHAN anso dihobasi raja i sandok karejo, angke nada malum be raja i. Nada sadia honok nari be anso marujung ngolu ni raja i.”

²Manjorbing ma raja i adop dingding martangiang,

³“TUHAN, ingot ma na dung huoloi Ho sian burju dohot situtu ni rohangku. Sai hugogo do anso hupatulus hagiotMu.” Lalu mangangguk ma si Hiskia.

⁴Ditadingkon si Jesaya ma si Hiskia, tapi dompak so ruar ia sian tonga ni bagas godang i, disuru TUHAN ma ia

⁵mangulahi mandapotkon si Hiskia raja ni bangso ni TUHAN jana dipalalu ia ma tona on, “Au do TUHAN na nisomba ni ompumu si Daud, madung Hubege tangiangmi jana Huida do ilu ni matami. Hupamalum pe ho; ancogot haduan kehe ma ho tu Bagas Ni Debata.

⁶Mangolu dope ho lima bolas taon nari. Hupalua pe ho dohot kota Jerusalem sian tangan ni Asur. OndihononKu do kota on hara ni goarKu sandiri bope hara ni parjanjianKu dohot naposongKu si Daud.”

⁷Jadi disuru si Jesaya ma halak mangapuskon batu ni gala-gala na nigiling tu baro ni raja i.

⁸Marsapa ma Raja Hiskia, “Aha do tandana paboa na giot pamalumon ni TUHAN au jana tolu ari nari na giot tarbaen au ma kehe tu Bagas Ni Debata?”

⁹Dialusi si Jesaya ma, “Lehenon ni TUHAN do i di ho tanda paboa na patulusonNia janjiNia. Saonnari aha ma na dipangido roha ni raja i: Halinu ni jom mataniari na nibaen ni Raja Ahas i, maju sampulu langka sanga mundur sampulu langka?”

¹⁰Didok si Hiskia ma, “Anggo pamajuhon halinuna i do sampulu langka, mura do i. Jadi, mundur ma baen sampulu langka.”

¹¹Martangiang ma si Jesaya tu TUHAN, gabe dipamundur TUHAN ma halinu i sampulu baris di tudu-tudu ni jom mataniari i.

¹²Laing di ombas i tarbege ma tu raja ni Babel, i ma si Merodak Baladan anak ni si Baladan na baru malum Raja Hiskia sian nyaena i. Gabe disuru ia ma halak maroban surat dohot silua tu si Hiskia.

¹³Disambut si Hiskia ma angka suruan i jana dipatidahon ia ma sandok sinadongannia, i ma sere dohot perak, angka parmasak dohot miak na huskus dohot sude panjamaan ni tentarania singkop. Nada adong umpe saragam be di bagas godang dohot di sude harajaannia na nitabunihonnia tu halahi.

¹⁴Dung i mangadop ma Panurirang Jesaya tu Raja Hiskia jana marsapa ma ia, “Na sian dia do angka halak i? Aha didok halahi?” Dialusi si Hiskia ma, “Na sian Babel do halahi, sian luat sihadaoan.”

¹⁵“Aha na niligi ni halahi di bagas godang?” ning si Jesaya mangulahi manyapai. “Sudena diligi halahi!” ning si Hiskia. “Nada adong be sanga na aha di bagasan panyimpanan ni arta di bagas godang ni raja na so hupatidahon tu halahi.”

¹⁶Jadi didok si Jesaya ma tu raja i, “Didok TUHAN do

¹⁷paboa na giot ro ma hatihana horusonna tu Babel dohot sude sinadongan na di bagas godangmon dohot na dung dipalagut-lagut ni ompumu lalu tu sadari on. Nada adong na tading.

¹⁸Sian angka pahompumu pe adong ma na giot obanonna jana dibaen gabe pagawe ni bagas godang laho mangoloi raja ni Babel.”

¹⁹Dialusi Raja Hiskia ma, “Denggan do Tona Ni TUHAN na nipasahatmu tu au.” Songon i didok ia alusnia, na diambangnia do na tongtong dame jana sonang harajaannia i salolot mangolu ia.

²⁰Barita na asing taringot tu si Hiskia, taringot tu angka jasa ni hagogoonnia dohot sanga songon dia pambaenannia di tobat dohot bondar hapuasan ni aek na tu kota, sudena i madung disuratkon di Buku Sejarah Ni Raja-raja Juda.

²¹Marujung ma ngolu ni si Hiskia gabe anaknia si Manase ma gabe raja gontinia.