Read Batak Angkola 2 RAJA-RAJA 21 Bible Online

2 RAJA-RAJA 21 - Batak Angkola bible

2 RAJA-RAJA 21

¹Marumur dua bolas taon ma si Manase di na mamungka ia gabe raja di Juda jana lima pulu lima taon honokna ia mamarenta di Jerusalem. Si Hebsiba do goar ni inangnia.

²Mardosa do si Manase tu TUHAN hara ni na niihutkonnia angka hasomalan na jahat sian angka bangso na nipaorot ni TUHAN sian Kanaan di na laho masuk halak Israel tu luat i.

³Angka inganan pamelean ni gana-ganaan na dung disegohon ni amangnia si Hiskia, dipajongjong ia mangulahi. Dipajongjong ia angka langgatan anso marsomba tu Baal, jana dipambaeni ia angka patung ni Dewi Asera, songon na nibaen ni si Ahab raja ni Israel i. Laing disomba si Manase muse do angka bintang.

⁴Madung didok TUHAN, Bagas Ni Debata do inganan paribadatan tuSia, hape disi muse noma dipajongjong ia angka langgatan laho manyomba angka debata.

⁵Dibaen ia do angka langgatan manyomba bintang di na dua emper ni Bagas Ni Debata i.

⁶Dipelehon ia do anaknia ditutung songon haul. Laing dipadalan si Manase on muse do hadatuon na mangaligi nasib, aji dohot na mangido panogu-noguon tu angka begu. Na borat do pardosaonnia maradopkon TUHAN, gabe pasunggul-sunggul muruk ni TUHAN.

⁷Dibaen ia do gambar ni Dewi Asera di Bagas Ni Debata, hape nian anggo inganan i madung didok TUHAN tu si Daud dohot si Salomo anak ni si Daud i, “Di bagasan bagasKu na di Jerusalem on, na dung Hutodo sian luat na dua bolas sian angka marga ni Israel, angkon dison ma bangsongKu maribadat tu Au.

⁸Jana muda dioloi bangso Israel sude parentangKu jana diihutkon halahi angka tona na nipasahat ni si Musa naposongKi tu halahi, gabe nada padiaronKu halahi dipaorot sian luat na dung Hulehen tu ompu ni halahi.”

⁹Hape nada ra halak Juda mangoloi TUHAN. Gari ada mur mardosai do halahi dibaen si Manase, jumahat sian dosa na nibaen ni angka bangso na di Kanaan na nipaorot ni TUHAN di parmasuk ni bangso ni Tuhan tu luat i.

¹⁰Jadi gabe didok TUHAN ma marhite angka panurirang, angka naposoNa songon on,

¹¹“Na jorbut do jahat ni Raja Manase, dao dope jumorbut pangalahonia ulang pado pangalaho ni halak Kanaan; jana marhite angka gana-ganaannia na nipaturenia, patunda ni i ma gabe mardosa halak Juda.

¹²Hara ni i, Au, TUHAN, Debata na nisomba ni bangso Israel, paroonKu ma bala godang tu Jerusalem dohot tu Juda lopus tarsonggot sanga ise halak na umbege taringot tusi.

¹³UhumanKu ma Jerusalem songon Samaria dohot si Ahab raja ni Israel i rap dohot pomparanna na Huuhumi i. PaspasonKu ma ias Jerusalem, songon pinggan na nibasu jana dipatungkap.

¹⁴Angka halak kota i na tinggal dope padiaronKu ma gabe soroon ni angka musuna na giot mamupusi dohot mangarampas luat ni halahi.

¹⁵BaenonKu ma sudena i tu bangsongKu hara ni na mardosa halahi tu Au jana dipasunggul-sunggul halahi murukKu mamungka sian parruar ni ompu ni halahi sian Mesir lopus tu sadari on.”

¹⁶Na lobi bahat do dibunu si Manase halak na so marsala jabat do durus mudar sap di Jerusalem. I ma dosa na nibaennia tamba ni na mambaen halak Juda gabe mardosa tu TUHAN hara ni na mamele gana-ganaan.

¹⁷Barita na asing taringot tu Raja Manase dohot taringot tu angka dosa na nibaennia, madung disuratkon di Buku Sejarah Ni Raja-raja Juda.

¹⁸Marujung ma ngolu ni si Manase, jana dikuburkon di Kobun Bagas godang, i ma Kobun Usa. Anaknia si Amon ma gabe raja gontinia.

¹⁹Marumur dua pulu dua taon ma si Amon di na gabe raja ia di Juda jana dua taon honokna ia mamarenta di Jerusalem. Inangnia, margoar si Mesulemet boru ni si Harus, halak Jotba.

²⁰Laing songon amangnia i, ia pe mardosa do tu TUHAN.

²¹Ditiru ia do angka pangalaho ni amangnia jana disombai ia do angka gana-ganaan na nisomba ni amangnia i.

²²Ditadingkon ia do TUHAN, Debata na nisomba ni angka ompunia jana dilanggar ia do angka parenta ni TUHAN.

²³Mambaen kompolotan ma angka pagawe ni Raja Amon mangalo ia, jana di bunu ma ia di bagas godang.

²⁴Tapi dibunu halak Juda do angka na mamunu i jana diangkat halahi ma si Josia anak ni si Amon gabe raja manggontihon amangna i.

²⁵Barita na asing taringot tu si Amon, madung disuratkon di Buku Sejarah Ni Raja-raja Juda.

²⁶Dikubur ma si Amon di kuburan na di Kobun Usa. Anaknia si Josia ma gabe raja gontinia.